പ്രാര്‍ത്ഥനകള്‍ വിഫലമായി..... തൃക്കളത്തൂരിലുണ്ടായ വാഹനാപകടത്തില്‍ പരിക്കേറ്റ് ആശുപത്രിയില്‍ കഴിഞ്ഞിരുന്ന യുവാവും യാത്രയായി... ഇന്നലെ മൃതദേഹം വീട്ടിലെത്തിയപ്പോള്‍ 'ഹരിക്കുട്ടാ' എന്ന് വിളിച്ച് അലമുറയിട്ട് കരയുന്ന അമ്മയെ ആശ്വസിപ്പിക്കാനാവാതെ ബന്ധുക്കള്‍, അച്ഛനുമ സഹോദരനും ആകെ തകര്‍ന്ന നിലയില്‍, പ്രിയപ്പെട്ടവനെ കാണാന്‍ കൂട്ടുകാരും കണ്ണീരോടെ....

നാട്ടുകാരുടെയും വീട്ടുകാരുടെയും പ്രാര്‍ഥനകള്‍ മുഴുവന്‍ വിഫലമാക്കിയാണ് നാലാമത്തെ യുവാവും യാത്രയായത്. കഴിഞ്ഞ ദിവസം തൃക്കളത്തൂരിലുണ്ടായ വാഹനാപകടത്തില്‍ പരുക്കേറ്റു കോലഞ്ചേരിയിലെ സ്വകാര്യ ആശുപത്രിയില്‍ ചികിത്സയില്‍ കഴിഞ്ഞിരുന്ന പുറപ്പുഴ മൂക്കിലിക്കാട്ട് രാജേന്ദ്രന്റെ മകന്‍ അമര്‍നാഥ് ആര്‍. പിള്ള (20) ഇന്നലെ പുലര്‍ച്ചെ മരണത്തിനു കീഴടങ്ങിയത്.

അമര്‍നാഥിന്റെ സഹോദരന്‍ ആദിത്യനും അമ്മയുടെ സഹോദരിയുടെ മക്കളായ വിഷ്ണുവും അരുണും തിങ്കളാഴ്ച തന്നെ മരിച്ചിരുന്നു. മാതൃസഹോദരിമാരുടെ മക്കളായ നാല് പേരും അടുത്ത സുഹൃത്തുക്കളുമായിരുന്നു.

ട്രെയിനില്‍ ബംഗളൂരിലേക്ക് പോയ സംഘം രണ്ട് കാറിലായിരുന്നു തിരികെവന്നത്. തൃക്കളത്തൂരില്‍വച്ച് യുവാക്കള്‍ സഞ്ചരിച്ചിരുന്ന കാര്‍ ലോറിയുമായി കൂട്ടിയിടിക്കുകയായിരുന്നു.

ഇന്നലെ വൈകിട്ട് 5.30ന് അമര്‍നാഥിന്റെ മൃതദേഹം പുറപ്പുഴ കഠാരക്കുഴിയിലെ വീട്ടിലേക്ക് കൊണ്ടുവന്നത്. 'ഹരിക്കുട്ടാ' എന്ന് വിളിച്ച് അലമുറയിട്ട് കരയുന്ന അമ്മ സജിനിയെ എങ്ങനെ ആശ്വസിപ്പിക്കണമെന്നറിയാതെ ബന്ധുക്കള്‍ കുഴങ്ങി.

അച്ഛന്‍ രാജേന്ദ്രന്‍ പിള്ളയും സഹോദരന്‍ അനന്ദകൃഷ്ണനും ആകെ തകര്‍ന്ന് നില്‍ക്കുകയായിരുന്നു.  സഹോദരന്‍ ആദിത്യന്റെ ചിതയ്ക്കരികിലാണ് അമര്‍നാഥിനും ചിതയൊരുക്കിയത്. പ്രിയപ്പെട്ടവനെ കാണാന്‍ കണ്ണീരോടെ കൂട്ടുകാരും എത്തിയിരുന്നു.