സംസ്ഥാനത്ത് രാത്രികാല യാത്ര നിയന്ത്രണങ്ങള്‍ ആവശ്യമില്ലെന്നും ഞായറാഴ്ചകളിലെ ലോക്ക്ഡൗണ്‍ ഒഴിവാക്കണമെന്നും മുഖ്യമന്ത്രി വിളിച്ച യോഗത്തില്‍ വിദഗ്ദ്ധര്‍ നിര്‍ദേശം നല്‍കി.

ആള്‍ക്കൂട്ടം നിയന്ത്രിക്കാനുള്ള ക്രമീകരണങ്ങള്‍ ഉറപ്പാക്കി പരമാവധി മേഖലകള്‍ തുറക്കുകയാണ് വേണ്ടതെന്നും വിദഗ്ധര്‍ നിര്‍ദേശിച്ചു. കേരളത്തില്‍ നിലവിലുള്ള രോഗവ്യാപനത്തില്‍ കാര്യമായ ആശങ്ക വേണ്ടെന്നും വാക്‌സിനേഷന്‍ മികച്ച രീതിയില്‍ മുന്നോട്ടു പോകുന്നതിനാല്‍ അധികം വൈകാതെ രോഗവ്യാപനത്തിന്റെ തോതു നിയന്ത്രിക്കാനാകുമെന്നും വിദഗ്ദര്‍ അഭിപ്രായപ്പെട്ടു.

കോവിഡ് ബാധിതരെ ഗുരുതരാവസ്ഥയില്‍ ആശുപത്രികളില്‍ പ്രവേശിപ്പിക്കുന്നതിന്റെ എണ്ണം കുറഞ്ഞത് രോഗബാധ അപകടകരമല്ല എന്നതിന്റെ എന്നതിന്റെ സൂചനയാണെന്നും കേരളത്തിന്റെ സാമ്പത്തിക-സാമൂഹിക മേഖലകളെ കൂടുതല്‍ സജീവമാക്കാനുള്ള ആലോചനകള്‍ അത്യാവശ്യമാണെന്നും വിദഗ്ദര്‍ വിലയിരുത്തി.

സംസ്ഥാനത്ത് പ്രൈമറി സ്‌കൂളുകള്‍ തുറക്കാമെന്നും ആരോഗ്യവിദഗ്ധരുടെ യോഗത്തില്‍ നിര്‍ദേശമുയര്‍ന്നു.

അതേസമയം ഒന്നാം കൊവിഡ് വ്യാപനം ചെറുക്കുന്നതില്‍ മുന്നിട്ടുനിന്ന കേരളത്തിന് രണ്ടാം വ്യാപനത്തിലും ഒരു വീഴ്ചയുമുണ്ടായിട്ടില്ല. നിലവിലെ രോഗവ്യാപനത്തോതില്‍ കാര്യമില്ല. രോഗ തീവ്രതയും മരണനിരക്കും കുറയ്ക്കുന്നതില്‍ കേരളം വിജയിച്ചു. വിവിധ രാജ്യങ്ങളില്‍ നിന്നുള്ള വിദഗ്ദ്ധരും സംസ്ഥാനത്തെ എല്ലാ മെഡിക്കല്‍ കോളേജ് മേധാവികളും പങ്കെടുത്ത മൂന്ന് മണിക്കൂറോളം നീണ്ടുനിന്ന യോഗം കൊവിഡ് വ്യാപനത്തിന്റെയും പ്രതിരോധത്തിന്റെയും എല്ലാ മേഖലകളും പരിശോധിച്ചു.

വിദേശത്തു നിന്നുള്ളവര്‍ ഓണ്‍ലൈനായി പങ്കെടുത്തു. ഇതാദ്യമായാണ് രാജ്യത്ത് കൊവിഡിനെ കുറിച്ച് ഇത്ര സമഗ്രമായ യോഗം വിളിക്കുന്നത്.