ഇന്നലെ പ്രധാനമന്ത്രി നരേന്ദ്ര മോദിക്ക് സുരേഷ് ഗോപി പേരത്തെ നല്‍കുന്ന ചിത്രം കണ്ടപ്പോള്‍ എല്ലാവര്‍ക്കും അത്ഭുതം. പന്തളത്തില്‍ മുളപ്പിച്ച പേരത്തെ സുരേഷ് ഗോപി എങ്ങനെ ഡല്‍ഹിയിലെത്തിച്ചെന്ന്.

പ്രധാനമന്ത്രിയുടെ അഭിനന്ദനത്തിനു പകരം ജയലക്ഷ്മി സമ്മാനിച്ചതാണ് ഈ പേരത്തൈ. ഇനി അതു പ്രധാനമന്ത്രിയുടെ വസതിയില്‍ വളരും. ജൈവകൃഷി ചെയ്യുന്ന വിദ്യാര്‍ഥികളെ പ്രോത്സാഹിപ്പിക്കുന്നതിന്റെ ഭാഗമായി പ്രധാനമന്ത്രി നരേന്ദ്ര മോദി അഭിനന്ദന കത്തുകള്‍ അയയ്ക്കാറുണ്ട്.

ഇത്തരത്തില്‍ അഭിനന്ദനം ലഭിച്ച പന്തളം ഉളനാട് ആഞ്ജനേയത്തില്‍ കെ.എസ്.സജീവന്റെ മകള്‍ 10ാം ക്ലാസുകാരി ജയലക്ഷ്മി പ്രധാനമന്ത്രിക്കു സമ്മാനിക്കുന്നതിനായി താന്‍ നട്ടു വളര്‍ത്തിയ പേരയുടെ തൈ പത്തനാപുരം ഗാന്ധിഭവന്‍ സന്ദര്‍ശിച്ച സുരേഷ് ഗോപി എംപിയെ ഏല്‍പിക്കുകയായിരുന്നു. പ്രധാനമന്ത്രിക്ക് ഇത് കൈമാറുമെന്ന ഉറപ്പു നല്‍കിയാണ് അദ്ദേഹം മടങ്ങിയത്.

ഇന്നലെ രാവിലെ ഡല്‍ഹിയിലെത്തി പ്രധാനമന്ത്രിയെ കണ്ട സുരേഷ് ഗോപി ജയലക്ഷ്മിയുടെ സമ്മാനം കൈമാറി. ഇക്കാര്യം ചിത്രം സഹിതം അദ്ദേഹം ഫെയ്‌സ്ബുക്കില്‍ പങ്കുവച്ചു. ഔദ്യോഗിക വസതിയില്‍ തൈ നടുമെന്നു പ്രധാനമന്ത്രി ഉറപ്പു നല്‍കിയതായും അദ്ദേഹം പറഞ്ഞു.

ജൈവകൃഷിയോടു താല്‍പര്യമുള്ള ജയലക്ഷ്മി മണ്ണിര കംപോസ്റ്റും മറ്റും ഉണ്ടാക്കി വീട്ടുമുറ്റം പച്ചക്കറിത്തോട്ടവും ഫലവൃക്ഷത്തോട്ടവുമാക്കി മാറ്റിയിരിക്കുകയാണ്. കുട്ടിക്കര്‍ഷകര്‍ക്കുള്ള സംസ്ഥാന സര്‍ക്കാരിന്റെ കര്‍ഷതിലകം അവാര്‍ഡ് നേടിയിരുന്നു.

പത്താനാപുരം ഗാന്ധിഭവന്‍ സന്ദര്‍ശനത്തിനിടെയാണ് ജയലക്ഷ്മി എന്ന പെണ്‍കുട്ടി താന്‍ നട്ടുവളര്‍ത്തിയ പേരയുടെ തൈ സുരേഷ് ഗോപിക്ക് നല്‍കിയത്. ജയലക്ഷ്മിയുടെ ആഗ്രഹപ്രകാരം താനിത് പ്രധാനമന്ത്രിക്ക് സമ്മാനിക്കാമെന്ന് സുരേഷ് ഗോപി അന്ന് ഉറപ്പുനല്‍കിയിരുന്നു. അതാണിപ്പോള്‍ സപലമായത്.

വാഗ്ദാനം ചെയ്തതുപോലെ ഫലവൃക്ഷതൈ പ്രധാനമന്ത്രി നരേന്ദ്ര മോദിക്ക് കൈമാറി. പ്രധാനമന്ത്രി അത് പൂര്‍ണഹൃദയത്തോടെ സ്വീകരിക്കുകയും തന്റെ ഔദ്യോഗിക വസതിയില്‍ നട്ടുപിടിപ്പിക്കാമെന്ന് ഉറപ്പ് നല്‍കുകയും ചെയ്തുവെന്ന് സുരേഷ് ഗോപി വ്യക്തമാക്കി. അദ്ദേഹത്തിന്റെ ഔദ്യോഗിക ബംഗ്ലാവിന്റെ മുറ്റത്ത് ഇത് നട്ടിട്ട് പത്തനാപുരത്തുള്ള ഒരു കുഞ്ഞിന്റെ തൈ എന്റെ മുറ്റത്ത് വളരുന്നു എന്നൊരു ഇന്ത്യന്‍ പ്രധാനമന്ത്രി പറയുമെന്ന പ്രതീക്ഷയും സുരേഷ്‌ഗോപി പങ്കുവെച്ചു. എന്തായാലും ഇതൊരു വലിയ സന്ദേശമാണ്, ശുദ്ധ ജനാധിപത്യത്തിന്റെ സന്ദേശം എന്നും സുരേഷ് ഗോപി പറഞ്ഞു.

സുരേഷ് ഗോപിയുടെ കുറിപ്പ്

പത്തനാപുരത്തെ ഒരു വീട്ടുമുറ്റത്ത് ചിന്താശീലയായ ഒരു പെണ്‍കുട്ടി നട്ടുവളര്‍ത്തിയ വൃക്ഷത്തൈ ഇനി ഇന്ത്യന്‍ പ്രധാനമന്ത്രിയുടെ വസതിയില്‍ വളരാന്‍ തയാറെടുക്കുന്നു. ഗാന്ധിഭവന്‍ സന്ദര്‍ശനത്തിനിടെ ജയലക്ഷ്മി എനിക്ക് കൈമാറിയ പേര വൃക്ഷ തൈ വാക്ക് പറഞ്ഞത് പോലെ ഞാന്‍ പ്രധാനമന്ത്രിയ്ക്ക് ഇന്നലെ കൈമാറി. പ്രധാനമന്ത്രി അത് തുറന്ന മനസോടെ സ്വീകരിക്കുകയും തന്റെ ഔദ്യോഗിക വസതിയുടെ വളപ്പില്‍ അത് നടാമെന്ന് ഉറപ്പുനല്‍കുകയും ചെയ്തു.

പത്തനാപുരത്ത് നിന്ന് ഒരു കുഞ്ഞ് മോള് കൊടുത്തയച്ച ചെടി അദ്ദേഹത്തിന്റെ കയ്യില്‍ എത്തിയിട്ടുണ്ടെങ്കില്‍, അദ്ദേഹത്തിന്റെ ഔദ്യോഗിക ബംഗ്ലാവിന്റെ മുറ്റത്ത് ഇത് നട്ടിട്ട് പത്തനാപുരത്തുള്ള ഒരു കുഞ്ഞിന്റെ തൈ എന്റെ മുറ്റത്ത് വളരുന്നു എന്നൊരു ഇന്ത്യന്‍ പ്രധാനമന്ത്രി പറയുന്നതും നാളെ നമുക്ക് പ്രതീക്ഷിക്കാം. എന്തായാലും ഇതൊരു വലിയ സന്ദേശമാണ്, ശുദ്ധ ജനാധിപത്യത്തിന്റെ സന്ദേശം