കെണി വച്ച് കുടുക്കിയ കൈക്കൂലി ട്രാപ്പ് കേസില്‍ ആഗസ്റ്റ് 16 മുതല്‍ ജയിലില്‍ റിമാന്റില്‍ കഴിയുന്ന സെക്ഷന്‍ ഫോറസ്റ്റ് ഓഫീസര്‍ക്ക് ജാമ്യമില്ല. തിരുവനന്തപുരം വിജിലന്‍സ് സ്‌പെഷ്യല്‍ കോടതിയാണ് പ്രതിക്ക് ജാമ്യം നിഷേധിച്ചത്.


റിമാന്റ് പ്രതിയായ സാമൂഹിക വനവല്‍ക്കരണ വിഭാഗം തിരുവനന്തപുരം മരുതംകുഴി ഡെപ്യൂട്ടി ഫോറസ്റ്റ് കണ്‍സര്‍വേറ്റര്‍ ഓഫീസിലെ സെക്ഷന്‍ ഫോറസ്റ്റ് ഓഫീസര്‍ കെ. കെ. സലീമിന്റെ ജാമ്യ ഹര്‍ജിയാണ് കോടതി തള്ളി ഉത്തരവായത്.

അന്വേഷണം പുരോഗമിക്കുന്ന ഘട്ടത്തില്‍ ഔദ്യോഗിക സ്വാധീനമുള്ള പ്രതിയെ ജാമ്യം നല്‍കി സ്വതന്ത്രനാക്കിയാല്‍ തെളിവു നശിപ്പിക്കുമെന്നും സാക്ഷികളെ സ്വാധീനിച്ചും ഭീഷണിപ്പെടുത്തിയും മൊഴി തിരുത്തിക്കാനിടയുണ്ടെന്നും നിരീക്ഷിച്ചാണ് വിജിലന്‍സ് ജഡ്ജി എം. ബി. സ്‌നേഹലത പ്രതിക്ക് ജാമ്യം നിരസിച്ചത്.


ആറ്റിങ്ങല്‍ സ്വദേശിയായ കരാറുകാരന്റെ 4 ലക്ഷം രൂപയുടെ ബില്‍ തുക മാറി നല്‍കാന്‍ തുകയുടെ 35 % ആയ 1.4 ലക്ഷം രൂപ കൈക്കൂലി ആവശ്യപ്പെട്ട് ആദ്യ ഗഡുവായി 70, 000 രൂപ വാങ്ങിയ കേസിലാണ് വിജിലന്‍സ് സലീമിനെ കെണിയൊരുക്കി അറസ്റ്റ് ചെയ്തത്.




2021 ആഗസ്റ്റ് 16 ന് ഉച്ച തിരിഞ്ഞ് 3 മണിയോടെ മരുതംകുഴി സോഷ്യല്‍ ഫോറസ്ട്രി ഓഫീസില്‍ വച്ച് തുക വാങ്ങവേ തൊണ്ടി സഹിതം കൈയ്യോടെ പിടികൂടുകയായിരുന്നു. വിജിലന്‍സ് ഓഫീസില്‍ വച്ച് ഫിനോഫ്തലിന്‍ പൊടി വിതറിയ നോട്ടുകള്‍ കരാറുകാരന് നല്‍കി മുന്‍ നിശ്ചയപ്രകാരം വിജിലന്‍സുമൊത്ത് മരുതംകുഴി ഓഫീസില്‍ ചെല്ലുകയായിരുന്നു.



വിവിധ ഡിപ്പാര്‍ട്ടുമെന്റുകളിലെ രണ്ട് ഔദ്യോഗിക സാക്ഷികളെയും ഒപ്പം കൂട്ടിയാണ് വിജിലന്‍സ് കൃത്യ സ്ഥലത്ത് ചെന്നത്. സലീം പണം വാങ്ങിയ ഉടന്‍ പുറത്തിറങ്ങിയ കരാറുകാരന്‍ നല്‍കിയ സിഗ്‌നല്‍ പ്രകാരം ഉടന്‍ ഓഫീസ് മുറി വളഞ്ഞ വിജിലന്‍സ് സംഘം സലീമിന്റെ കൈവിരലുകള്‍ വിജിലന്‍സ് കൊണ്ടു ചെന്ന പൊട്ടാസ്യം പെര്‍മാംഗനേറ്റ് ലായനിയില്‍ മുക്കിയപ്പോള്‍ ലായനി പിങ്ക് നിറമായി മാറി. കെണിപ്പണം കൈപ്പറ്റിയതായി ശാസ്ത്രീയമായി തെളിഞ്ഞതോടെ തൊണ്ടി സഹിതം പ്രതിയെ അറസ്റ്റ് ചെയ്യുകയായിരുന്നു.




വിജിലന്‍സ് എപ്പോള്‍ ആവശ്യപ്പെട്ടാലും 2 ഔദ്യോഗിക സാക്ഷികളെ ഡിപ്പാര്‍ട്ടുമെന്റു മേധാവി വിട്ടുനല്‍കണമെന്ന ചട്ടം നിലവിലുണ്ട്.വിവരം ലീക്കായി ട്രാപ്പ് പൊളിയാതിരിക്കാനായി ട്രാപ്പിന് എവിടേക്കാണ് കൊണ്ടു പോകുന്നതെന്ന് ഔദ്യോഗിക സാക്ഷികളെ മുന്‍കൂട്ടി അറിയിക്കേണ്ടതുമില്ല.


വിചാരണയില്‍ കൈക്കൂലി കൊടുക്കുന്ന വ്യക്തിക്ക് ഡെക്കോയി വിറ്റ്‌നസ് ( വശീകരണ സാക്ഷി) എന്ന നിയമ പരിരക്ഷയുമുണ്ട്. അതിനാല്‍ ട്രാപ്പ് കേസില്‍ പൊതു സേവകനെ കൈക്കൂലി നല്‍കി സ്വാധീനിക്കാന്‍ ശ്രമിച്ചെന്നാരോപിച്ച് പരാതിക്കാരനെതിരെ കേസെടുക്കാനുമാവില്ല.