സംസ്ഥാന ചരിത്രത്തില് തന്നെ ആദ്യമായാണ് യുവജന സഹകരണ സംഘങ്ങള് നിലവില് വരുന്നത്; യുവ ശക്തിയെ ഗുണപരമായി ഉപയോഗിക്കുന്നതിന്റെ ഭാഗമായാണ് നടപടി; വ്യത്യസ്തമായ ആശയങ്ങളുമായാണ് യുവജനങ്ങള് സഹകരണ സംഘം രജിസ്റ്റര് ചെയ്യാന് മുന്നോട്ട് വന്നത്; സംസ്ഥാന സര്ക്കാരിന്റെ 100 ദിന കര്മ്മ പരിപാടിയുടെ ഭാഗമായി തീരുമാനിച്ച യുവജന സഹകരണ സംഘങ്ങള് സെപ്റ്റംബര് 6 തിങ്കളാഴ്ച ബഹു. മുഖ്യമന്ത്രി ഉദ്ഘാടനം ചെയ്യുമെന്ന് സഹകരണ മന്ത്രി
ബഹു. സഹകരണം, രജിസ്ട്രേഷന് മന്ത്രിയുടെ വാര്ത്താ സമ്മേളനത്തിലെ പ്രസക്ത ഭാഗങ്ങൾ ഇങ്ങനെ ; സംസ്ഥാന സര്ക്കാരിന്റെ 100 ദിന കര്മ്മ പരിപാടിയുടെ ഭാഗമായി തീരുമാനിച്ച യുവജന സഹകരണ സംഘങ്ങള് സെപ്റ്റംബര് 6 തിങ്കളാഴ്ച ബഹു. മുഖ്യമന്ത്രി ഉദ്ഘാടനം ചെയ്യും. 25 സഹകരണ സംഘങ്ങളാണ് തീരുമാനിച്ചതെങ്കിലും ഇതുവരെ 26 സഹകരണ സംഘങ്ങള് രജിസ്റ്റര് ചെയ്തു കഴിഞ്ഞു.
സംസ്ഥാന ചരിത്രത്തില് തന്നെ ആദ്യമായാണ് യുവജന സഹകരണ സംഘങ്ങള് നിലവില് വരുന്നത്. യുവ ശക്തിയെ ഗുണപരമായി ഉപയോഗിക്കുന്നതിന്റെ ഭാഗമായാണ് നടപടി. വ്യത്യസ്തമായ ആശയങ്ങളുമായാണ് യുവജനങ്ങള് സഹകരണ സംഘം രജിസ്റ്റര് ചെയ്യാന് മുന്നോട്ട് വന്നത്.
വ്യത്യസ്ത ആശയങ്ങളില് നിന്നും വിശദമായ പരിശോധനകളുടെ അടിസ്ഥാനത്തിലാണ് സംഘങ്ങളെ തിരഞ്ഞെടുത്തത്. ഈ സഹകരണ സംഘങ്ങളില് വായ്പാ പ്രവര്ത്തനങ്ങളില്ല. സംരംഭകരായാണ് പ്രവര്ത്തിക്കുന്നത്. 18 വയസു മുതല് 45 വയസുവരെയുള്ളവര്ക്കായിരിക്കും യുവജന സഹകരണ സംഘങ്ങളില് അംഗത്വം നല്കുക.
ഐടി, നിര്മ്മാണം, കാര്ഷികം, മാലിന്യ നിര്മ്മാര്ജ്ജനവും പുനരുപയോഗവും, വാണിജ്യം, ഉല്പ്പാദനം, വിപണനം, സിനിമ, ഇക്കോ ടൂറിസം, ജൈവ കൃഷി മേഖലകളിലാണ് സഹകരണ സംഘങ്ങള് പ്രവര്ത്തിക്കുന്നത്. കാറ്ററിംഗ് രംഗവും പ്രവര്ത്തന മേഖലയായി തിരഞ്ഞെടുത്തിരിക്കുന്നത്.
തൊഴില് ഉപകരണങ്ങള് വിതരണം ചെയ്യുന്ന സംഘങ്ങള്, അവശ്യ സാധനങ്ങള് മൊബൈല് ആപ്പിലെ രജിസ്ട്രേഷനിലൂടെ വീട്ടിലെത്തിക്കുന്ന സഹകരണ സംഘങ്ങള്, ചലച്ചിത്ര, ദൃശ്യ മാധ്യമ മേഖല ആവശ്യമായ സൗകര്യങ്ങള് ഒരുക്കുന്ന സഹകരണ സംഘങ്ങള്, പുസ്തക പ്രസാധനത്തിനും അച്ചടിക്കുമുള്ള സഹകരണ സംഘം, ജൈവ, അജൈവ മാലിന്യങ്ങള് ശേഖരിച്ച് പുനരുപയോഗത്തിന് ഉതകുന്ന തരത്തില് മാറ്റിയെടുക്കുന്ന സഹകരണ സംഘം, തൊഴിലാളികളെ ലഭ്യമാക്കുന്ന സംഘം, എല്ലാ തൊഴിലുകള്ക്കും ആവശ്യമായ പണി ആയുധങ്ങള് ലഭ്യമാക്കുന്ന സംഘം ഇങ്ങനെ വൈവിദ്ധ്യമായ പ്രവര്ത്തനങ്ങളാണ് യുവജന സഹകരണ സംഘങ്ങള് നടത്തുക.
യുവജന സഹകരണ സംഘങ്ങളുടെ സംസ്ഥാനതല ഉദ്ഘാടനം തിരുവനന്തപുരം ജില്ലയില് വട്ടിയൂര്ക്കാവ് കേന്ദ്രമാക്കി രജിസ്റ്റര് ചെയ്ത യൂത്ത് ബ്രിഗേഡ് സംരംഭക സഹകരണ സംഘത്തില് വച്ച് സെപ്റ്റംബര് ആറിന് വൈകിട്ട് നാലു മണിക്ക് ബഹുമാനപ്പെട്ട മുഖ്യമന്ത്രി ശ്രീ. പിണറായി വിജയന് നിര്വഹിക്കും.
ബഹു. സഹകരണ വകുപ്പ് മന്ത്രി വി.എന്. വാസവന് അദ്ധ്യക്ഷത വഹിക്കും. ബഹു. വിദ്യാഭ്യാസം, തൊഴില് വകുപ്പ് മന്ത്രി വി.ശിവന്കുട്ടി, തിരുവനന്തപുരം മേയര് ആര്യാ രാജേന്ദ്രന്, വട്ടിയൂര്ക്കാവ് എംഎല്എ വി.കെ. പ്രശാന്ത്, സഹകരണ വകുപ്പ് സെക്രട്ടറി ശ്രീമതി. മിനി ആന്റണി ഐഎഎസ്, സഹകരണ സംഘം രജിസ്ട്രാര് പി.ബി. നൂഹു ഐഎഎസ് എന്നിവര് ഉദ്ഘാടന ചടങ്ങില് പങ്കെടുക്കും.
https://www.facebook.com/Malayalivartha
