മനപ്പായസം കുടിച്ച് കുടിയന്‍മാര്‍... കെ.എസ്.ആര്‍.ടി.സി. ബസ് സ്റ്റാന്റിലെ മദ്യ വില്‍പനയ്‌ക്കെതിരെ വിവാദം പൊടിപൊടിക്കുന്നു; കൊട്ടാരക്കര മാതൃകയുമായി പിന്തുണച്ച് ഗണേഷ് കുമാര്‍; നേരിട്ട് മദ്യക്കച്ചവടത്തിനില്ലെന്ന് കെ.എസ്.ആര്‍.ടി.സി.; ശ്രമിച്ചത് വരുമാനമുണ്ടാക്കാന്‍
മദ്യ വില്‍പന ശാലകള്‍ പ്രധാന ദേശീയ പാതകളില്‍ സ്ഥാപിക്കാന്‍ പാടില്ലെന്ന കോടതി വിധിയെ തുടര്‍ന്ന് ഇപ്പോള്‍ എവിടെയൊക്കെയാണെന്ന് ആര്‍ക്കും അറിയാന്‍ പാടില്ല. കുടിയന്‍മാരുടെ ഈ ദു:ഖം കണ്ടിട്ടോ എന്തോ ബസിറങ്ങുന്ന സ്ഥലത്ത് തന്നെ ബസ് സ്റ്റാന്റില്‍ തന്നെ മദ്യവില്‍പന ശാലകള്‍ തുടങ്ങുമെന്നുള്ള വാര്‍ത്തയാണ് വരുന്നത്. അങ്ങനെ വന്നാല്‍ ഇരുട്ടിന്റെ മറവില്‍ ബസ് സ്റ്റാന്റ് പരിസരം എന്താകുമെന്ന് കണ്ടറിയാം.
അതേസമയം കൊട്ടാരക്കര മാതൃകയുമായി കെ.ബി. ഗണേഷ്‌കുമാര്‍ എം.എല്‍.എ. രംഗത്തെത്തി. കൊട്ടാരക്കരയിലെ ബിവറേജസ് ഷോപ്പ് പ്രവര്‍ത്തിക്കുന്നത് സ്വകാര്യ ബസ്സ്റ്റാന്‍ഡിലെ കെട്ടിടത്തിലാണെന്നാണ് ഗണേഷ് ചൂണ്ടിക്കാട്ടിയത്.
ബിവറേജസ് കോര്പ്പറേഷന് കെട്ടിടം വാടകയ്ക്കു കൊടുക്കാന്‍ തീരുമാനിച്ചത് ഇത്രയും വലിയൊരു പൊല്ലാപ്പാകുമെന്ന് കെ.എസ്.ആര്‍.ടി.സി. പ്രതീക്ഷിച്ചിരുന്നില്ല. കെ.എസ്.ആര്‍.ടി.സി. നേരിട്ട് മദ്യക്കച്ചവടം തുടങ്ങി എന്ന വിധത്തിലാണ് വിമര്‍ശനങ്ങളും ആക്ഷേപങ്ങളും. സാമൂഹിക മാധ്യമങ്ങളില്‍ കണ്ടക്ടറെയും സ്‌റ്റേഷന്‍ മാസ്റ്ററെയുമൊക്കെ മദ്യവില്‍പ്പനക്കാരായി ചിത്രീകരിച്ചുകൊണ്ട് ട്രോളുകളുടെ പെരുമഴയാണ്.
ശമ്പളം നല്‍കാന്‍പോലും വഴിയില്ലാതെ വലയുന്ന കോര്പ്പറേഷന് വരുമാനം കൂട്ടാന്‍ സാധ്യമായതെല്ലാം ചെയ്യുന്നുണ്ട്. ടിക്കറ്റിതര വരുമാനം വര്‍ധിപ്പിക്കാന്‍ പരമാവധി കെട്ടിടങ്ങള്‍ വാടകയ്ക്കു കൊടുക്കാനാണ് ശ്രമം.
ഹൈക്കോടതി ഉത്തരവിനെത്തുടര്‍ന്ന് പുതിയ ഷോപ്പുകള്‍ക്ക് നെട്ടോട്ടമോടുന്ന ബിവറേജസ് കോര്പ്പറേഷന് യാദൃച്ഛികമായാണ് കെ.എസ്.ആര്‍.ടി.സി. മാര്‍ക്കറ്റിങ് വിഭാഗത്തിന്റെ മുന്നില്‍പ്പെട്ടത്. ബസ് സര്‍വീസിനും യാത്രക്കാര്‍ക്കും അസൗകര്യമുണ്ടാക്കരുത് എന്നുമാത്രമാണ് കെ.എസ്.ആര്‍.ടി.സി. മുന്നോട്ടുവെച്ച നിബന്ധന. മറ്റാരെക്കാളും കുറഞ്ഞതുകയ്ക്ക് കെട്ടിടം ലഭിക്കുമെന്നതാണ് ബിവറേജസ് കോര്‍പ്പറേഷന്റെ നേട്ടം.
ബിവറേജസ് കോര്‍പ്പറേഷനു വേണമെങ്കില്‍ കെ.എസ്.ആര്‍.ടി.സി.യുടെ സ്ഥലത്ത് കെട്ടിടങ്ങള്‍ നിര്‍മിക്കുകയും ചെയ്യാം. ഉപയോഗശൂന്യമായ ഭൂമി നിശ്ചിതകാലത്തേക്കു കൈമാറാന്‍ കെ.എസ്.ആര്‍.ടി.സി. തയ്യാറാണ്.
മാറ്റിസ്ഥാപിക്കേണ്ട 153 ഷോപ്പുകള്‍ക്ക് സ്ഥലം കണ്ടെത്താന്‍ ബിവറേജസ് ശ്രമം തുടങ്ങിയപ്പോള്‍ മുതല്‍ പല എതിര്‍പ്പുകള്‍ ഉയരുന്നുണ്ട്. സ്ഥലപരിമിതിയുള്ള ഷോപ്പുകള്‍ മാറ്റിസ്ഥാപിക്കാന്‍ കഴിഞ്ഞില്ലെങ്കില്‍ അവ പൂട്ടേണ്ടിവരും. ഇതിന്റെ നേട്ടം ബാറുടമകള്‍ക്കു ലഭിക്കും.
അതേസമയം കെ.എസ്.ആര്‍.ടി.സി. ബസ് ടെര്‍മിനല്‍ കോംപ്ലക്‌സുകളില്‍ മദ്യം വില്‍ക്കാനുള്ള സര്‍ക്കാര്‍ തീരുമാനത്തെ വിമര്‍ശിച്ച് കോണ്‍ഗ്രസ് നേതാവ് വി.എം. സുധീരന്‍ രംഗത്തെത്തി. പ്രതിഷേധമറിയിച്ച് മുഖ്യമന്ത്രിക്ക് സുധീരന്‍ കത്തയച്ചു. തെറ്റായ മദ്യനയം തിരുത്തണമെന്നും പുതിയ തീരുമാനത്തില്‍ നിന്ന് പിന്തിരിയണമെന്നും കത്തിലുണ്ട്.
ജനങ്ങളെ മദ്യം കുടിപ്പിച്ചേ തീരൂ എന്ന പിടിവാശിയില്‍ സര്‍ക്കാര്‍ സ്വീകരിക്കുന്ന നടപടികള്‍ ജനങ്ങളോട് കാണിക്കുന്ന കടുത്ത ദ്രോഹമാണ്. മദ്യശാലകള്‍ തുറന്നുവെച്ചത് കോവിഡ് വ്യാപനത്തിന് ഇടയാക്കിയത് വിസ്മരിക്കരുത്. വേണ്ടരീതിയില്‍ വസ്തുതകള്‍ വിലയിരുത്താതെ ഹൈക്കോടതി സിംഗിള്‍ബെഞ്ചിന്റെ ഭാഗത്തുനിന്നും വന്നിട്ടുള്ള ചില പരാമര്‍ശങ്ങള്‍ മറയാക്കിയാണ് സര്‍ക്കാരിന്റെ പ്രവര്‍ത്തനങ്ങളെന്നും സുധീരന്‍ കുറ്റപ്പെടുത്തി
കെ.എസ്.ആര്‍.ടി.സി. ഡിപ്പോകളില്‍ മദ്യവില്‍പ്പനശാലകള്‍ ആരംഭിക്കാനുള്ള സര്‍ക്കാര്‍ തീരുമാനം പിന്‍വലിക്കണമെന്ന് മന്നം സാംസ്‌കാരിക സമിതി നേതൃയോഗവും ആവശ്യപ്പെട്ടു.
"
https://www.facebook.com/Malayalivartha
