ഗര്ഭിണിയുമായി പോയ ആംബുലന്സ് പോസ്റ്റിലിടിച്ച് മറിഞ്ഞ് അപകടം; സംഭവത്തിൽ നാല് പേര്ക്ക് ഗുരുതരമായി പരിക്കേറ്റു
പത്തനംതിട്ടയില് നിന്നും ഗര്ഭിണിയുമായി തിരുവല്ലയിലേക്കെത്തിയ ആംബുലന്സ് പോസ്റ്റിലിടിച്ച് മറിഞ്ഞു. ഇരുമ്ബ് പോസ്റ്റിലിടിച്ചുണ്ടായ അപകടത്തില് നാല് പേര്ക്ക് ഗുരുതരമായി പരിക്കേറ്റു.
എട്ടു മാസം ഗര്ഭിണിയായിരുന്ന സീതത്തോട് ചരിവുകാലായില് വീട്ടില് റസീന സെയ്ദുമായി തിരുവല്ല പുഷ്പഗിരി ആശുപത്രിയിലേക്ക് എത്തിയ ആംബുലന്സാണ് അപകടത്തില് പെട്ടത്. റസീനയുടെ പിതൃ സഹോദരി പത്തനംതിട്ട പള്ളിപ്പടിഞ്ഞാറേതില് നബീസ മുസ്തഫ, നബീസയുടെ മകള് സാലിക, റസീനയുടെ ഭര്തൃ മാതാവ് പാറയ്ക്കല് സാഹിദ എന്നിവര്ക്കാണ് പരിക്കേറ്റത്.
മാഞ്ഞാടി ജങ്ഷനില് ഞായറാഴ്ച രാത്രി പത്തരയോടെയായിരുന്നു അപകടം. അപകടത്തെ തുടര്ന്ന് തലകീഴായി മറിഞ്ഞ ആംബുലന്സില് നിന്നും റോഡിലേക്ക് തെറിച്ചു വീണ നാലു പേരേയും നാട്ടുകാര് തിരുവല്ല പുഷ്പഗിരി മെഡിക്കല് കോളേജ് ആശുപത്രിയില് എത്തിക്കുകയായിരുന്നു. റസീനയെ അടിയന്തിര ശസ്ത്രക്രിയക്ക് വിധേയയാക്കി കുഞ്ഞിനെ പുറത്തെടുത്തു. കുഞ്ഞിനെ വെന്റിലേറ്ററില് പ്രവേശിപ്പിച്ചു.
അപകടത്തില് ഗുരുതര പരിക്കേറ്റ റസീന ഐ.സി.യുവില് തുടരുകയാണ്. തലയ്ക്ക് സാരമായി പരിക്കേറ്റ സാഹിദയെ കോട്ടയം മെഡിക്കല് കോളേജ് ആശുപത്രിയിലേക്ക് മാറ്റി. നബീസയെയും സാലികയെയും റൂമിലേക്ക് മാറ്റിയിട്ടുണ്ട്. പെരുനാട് സ്വദേശിയായ ആംബുലന്സ് ഡ്രൈവര്ക്ക് നിസാര പരിക്കേറ്റു.
https://www.facebook.com/Malayalivartha
