മുട്ടയുമായി വന്ന ചരക്കുലോറി ഡിവൈഡറില്‍ കയറി മറിഞ്ഞ് ലക്ഷക്കണക്കിന്  മുട്ടകള്‍ റോഡില്‍ മറിഞ്ഞു പൊട്ടി ഒഴുകി.... അപകടത്തിന്റെ ശബ്ദം കേട്ട് ഓടിക്കൂടിയ നാട്ടുകാര്‍ ഡ്രൈവറെയും സഹായിയേയും രക്ഷപ്പെടുത്തി.

കഴിഞ്ഞ ദിവസം പുലര്‍ച്ചെ നാലിന് മഞ്ചേരി നഗരത്തില്‍ മലപ്പുറം റോഡില്‍ 22ാം മൈലിലാണ് അപകടം നടന്നത്. തമിഴ്നാട്ടിലെ നാമക്കല്‍ കോഴി ഫാമില്‍ നിന്ന് മഞ്ചേരി ഡെയ്‌ലി മാര്‍ക്കറ്റിലെ സിദ്ദീഖ് എഗ്ഗ് സ്റ്റോറിലേക്ക് മുട്ടയുമായി വരുന്ന ലോറിയാണ് മറിഞ്ഞത്.

സംഭവത്തില്‍ 10 ലക്ഷം രൂപയുടെ നഷ്ടം വന്നതായാണ് കണക്കാക്കുന്നത്. അപകടത്തെ തുടര്‍ന്ന് ലോറിയിലെ മുട്ട മുഴുവന്‍ റോഡില്‍ മറിഞ്ഞുപൊട്ടി പരന്നൊഴുകി. ലോറി നീക്കം ചെയ്യുന്നത് വരെ ഗതാഗതസ്തംഭനവുമുണ്ടായി.

മഴയും റോഡിലെ വെളിച്ചക്കുറവും ഡിവൈഡറില്‍ സിഗ്നല്‍ ലൈറ്റ് ഇല്ലാത്തതും അപകടത്തിന് കാരണമായെന്നാണ് നിരീക്ഷണം. തീരെ വീതി കുറഞ്ഞ റോഡില്‍ അടുത്തയിടെയാണ് പൊതുമരാമത്ത് വകുപ്പ് ഡിവൈഡറുകള്‍ സ്ഥാപിച്ചത്.

ഒട്ടേറെ തവണ ഇവിടെ അപകടമുണ്ടായിട്ടുണ്ട്. അപകടത്തിന്റെ ശബ്ദം കേട്ട് ഓടിക്കൂടിയ നാട്ടുകാര്‍ ഡ്രൈവര്‍ തമിഴ്നാട് സ്വദേശി രവിയെയും സഹായിയെയും രക്ഷപ്പെടുത്തി.