ഇത്രയ്ക്ക് പ്രതീക്ഷിച്ചില്ല... താലിബാന്റെ ആദ്യ ഇടക്കാല സര്ക്കാരിന്റെ ടീം കണ്ട് ഞെട്ടിത്തരിച്ച് ലോകം; ഭീകരനായി യു.എന്. പ്രഖ്യാപിച്ചിട്ടുള്ള മുല്ല മുഹമ്മദ് ഹസന് അഖുന് പ്രധാനമന്ത്രി; മുല്ല ഒമറിന്റെ മകന് മുല്ല യാക്കൂബ് ആക്ടിംഗ് പ്രതിരോധമന്ത്രി
ഏറെ ആകാംക്ഷയ്ക്കൊടുവില് അഫ്ഗാനിസ്ഥാനില് സര്ക്കാര് രൂപീകരിക്കുന്നതിന്റെ വാര്ത്ത പുറത്ത് വന്നിരിക്കുകയാണ്. ആഴ്ചകള് നീണ്ട അനിശ്ചിതത്വത്തിനൊടുവില് അഫ്ഗാനിസ്ഥാനില് ഇടക്കാല താലിബാന് സര്ക്കാരിനെ പ്രഖ്യാപിച്ചു. ഭീകരനായി യു.എന്. പ്രഖ്യാപിച്ചിട്ടുള്ള മുല്ല മുഹമ്മദ് ഹസന് അഖുന്ദാണ് പ്രധാനമന്ത്രി.
താലിബാന്റെ നയരൂപീകരണ സമിതിയായ റെഹ്ബാരി ശൂരയുടെ മേധാവിയായ ഹസന് അഖുന്ദ്, 1996മുതല് 2001 വരെ അധികാരത്തിലിരുന്ന താലിബാന് സര്ക്കാരില് വിദേശകാര്യമന്ത്രിയായിരുന്നു.
പ്രധാനമന്ത്രിയാവുമെന്ന് കരുതിയിരുന്ന മുല്ല ബരാദര് ഒന്നാം ഉപ പ്രധാനമന്ത്രിയും മൗലവി ഹനാഫി രണ്ടാം ഉപപ്രധാനമന്ത്രിയുമാകുമെന്ന് താലിബാന് വക്താവ് സബിഹുള്ള മുജാഹിദ് വാര്ത്താസമ്മേളനത്തില് അറിയിച്ചു.
താലിബാന് സ്ഥാപക നേതാക്കളിലൊരാളായ മുല്ല ഒമറിന്റെ മകന് മുല്ല യാക്കൂബാണ്ആക്ടിംഗ് പ്രതിരോധമന്ത്രി. ഹഖാനി നെറ്റ്വര്ക്ക് വിഭാഗം തലവന് സിറാജ് ഹഖാനിക്കാണ് ആഭ്യന്തര വകുപ്പിന്റെ ചുമതല.അമിര്ഖാന് മുത്താഖിയാണ് വിദേശകാര്യമന്ത്രി. ഷേര് അബ്ബാസ് സ്റ്റാനെക്സായി സഹവിദേശകാര്യമന്ത്രിയാണ്. നിയമ വകുപ്പ് അബ്ദുള് ഹക്കീമിനാണ്.
മുല്ല അബ്ദുള് ഘനി ബരാദറുടെ നേതൃത്വത്തില് ദോഹ കേന്ദ്രമാക്കി പ്രവര്ത്തിച്ചിരുന്ന താലിബാന് വിഭാഗവും പാകിസ്ഥാന് ചാരസംഘടനയായ ഐ.എസ്.ഐയുടെ സ്വാധീനത്തില് കിഴക്കന് അഫ്ഗാനിസ്ഥാനില് പ്രവര്ത്തിക്കുന്ന ഹഖാനി നെറ്റ്വര്ക്കും തമ്മിലുള്ള അധികാരത്തര്ക്കമാണ് സര്ക്കാര് രൂപീകരണം നീണ്ടു പോകാനിടയാക്കിയത്.കഴിഞ്ഞദിവസം കാബൂളിലെത്തിയ ഐ.എസ്.ഐ മേധാവി ഫയിസ് ഹമീദിന്റെ സാന്നിദ്ധ്യത്തില് നടന്ന ചര്ച്ചയിലാണ് ധാരണയായത്. താലിബാന് പരമോന്നത നേതാവ് ഹൈബത്തുള്ള അഖുന്ദ്സാദയാണ് അഖുന്ദിനെ പ്രധാനമന്ത്രിയായി നിര്ദ്ദേശിച്ചത്.ഹൈബത്തുള്ള അഖുന്ദ് സാദ ഭരണമേല്നോട്ടം വഹിക്കും.
കാബൂളില് പാക് വിരുദ്ധ റാലിപഞ്ച്ഷീര് പിടിച്ചെടുക്കാന് പാക് വ്യോമസേന താലിബാനെ സഹായിച്ചുവെന്നാരോപിച്ച് കാബൂളില് സ്ത്രീകള് അടക്കം നടത്തിയ പാക് വിരുദ്ധറാലിക്ക് നേരെ താലിബാന് ഭീകരര് വെടിവച്ചു. ആര്ക്കും പരിക്കേറ്റതായി റിപ്പോര്ട്ടില്ല.'പാകിസ്ഥാന് അഫ്ഗാന് വിട്ടു പോവുക' എന്ന മുദ്രാവാക്യം മുഴക്കി പാക് എംബസിക്ക് മുന്നിലാണ് നൂറുകണക്കിനാളുകള് പ്രതിഷേധിച്ചത്.
മന്ത്രിസഭാ രൂപീകരണത്തില് പാകിസ്ഥാന് ഇടപെടുന്നതില് പ്രതിഷേധിച്ച് ഐ.എസ്.ഐ സംഘം താമസിക്കുന്ന കാബൂള് സെറിന ഹോട്ടലിലേക്ക് നീങ്ങിയ പ്രതിഷേധക്കാര്ക്ക് നേരെയും വെടിവച്ചു. അതേസമയം, അഫ്ഗാനിസ്ഥാനില് ഐക്യരാഷ്ട്രസഭയുടെ നേതൃത്വത്തിലുള്ള ജീവകാരുണ്യ പ്രവര്ത്തനങ്ങള് തുടരാന് ധാരണയായി. ഐക്യരാഷ്ട്രസഭയുടെ ജീവകാരുണ്യ വിഭാഗം തലവന് മാര്ട്ടിന് ഗ്രിഫ്ത്ത്സ് താലിബാന് നേതൃത്വവുമായി നടത്തിയ കൂടിക്കാഴ്ചയിലാണിത്.
എല്ലാ വിഭാഗം ജനങ്ങള്ക്കും ജീവകാരുണ്യസഹായം എത്തിക്കുമെന്നും സ്ത്രീകളും പുരുഷന്മാരുമടക്കമുള്ള മുഴുവന് ജീവകാരുണ്യ പ്രവര്ത്തകര്ക്കും സഞ്ചാര സ്വാതന്ത്ര്യം അനുവദിക്കുമെന്നും താലിബാന് ഉറപ്പുനല്കിയതായി യു.എന് സെക്രട്ടറി ജനറലിന്റെ വക്താവ് അറിയിച്ചു.
"
https://www.facebook.com/Malayalivartha
