കെ.റ്റി ജലീല്‍ ബി ജെ പിയില്‍ ചേരുമോ? മുഖ്യമന്ത്രിക്കാണ് സംശയം. കെ.റ്റി.ജലീലിന്റെ കട്ടയും പടവും മുഖ്യമന്ത്രി പിണറായി വിജയന്‍ മടക്കി.

താന്‍ ബി ജെ പി യുടെ കൈയിലെ ചട്ടുകമാകരുതെന്നാണ് നേരിട്ട് വിളിച്ചു വരുത്തി മുഖ്യമന്ത്രി പറഞ്ഞത്. ഇനിയും പി.കെ.കുഞ്ഞാലിക്കുട്ടിക്ക് പിന്നാലെ നടന്നാല്‍ ജലീലിന് അബ്ദുള്ളക്കുട്ടിയുടെ ഗതി വരുമെന്നാണ് ലഭിക്കുന്ന സൂചനകള്‍.

അസഹനീയമായ ദേഷ്യമാണ് ജലീലിനോട് മുഖ്യമന്ത്രിക്ക് ഉണ്ടായിരിക്കുന്നത്. ലീഗിലെ സമുന്നതനായ നേതാവിനെ വ്യക്തിപരമായി അധിക്ഷേപിക്കുന്ന തരത്തിലാണ് ജലീല്‍ പെരുമാറുന്നതെന്ന ചിന്തയാണ് മുഖ്യമന്ത്രിക്കും സി പി എമ്മിനുമുള്ളത്. ജലീലിന്റെ നീക്കങ്ങളെ എടുത്തു ചാട്ടമായി കരുതുകയാണ് മുഖ്യമന്ത്രി.

ജലീലിന്റെ നീക്കങ്ങളിലുള്ള അതൃപ്തി മുഖ്യമന്ത്രി കോടിയേരിയെ അറിയിച്ചതായാണ് ലഭിക്കുന്ന സൂചനകള്‍. കോടിയേരിയാണ് ജലീലിനെ പോലുള്ളവരെ കൈകാര്യം ചെയ്യുന്നത്. പിണറായി ഇത്തരം വര്‍ത്തമാനങ്ങള്‍ ജലീലിനെ പോലുള്ളവരുമായി നടത്താറില്ല. കോടിയേരിക്കാണ് പാര്‍ട്ടി നേതാക്കളെ കൈകാര്യം ചെയ്യേണ്ട ചുമതല. വിജയരാഘവനും ഇത്തരം കാര്യങ്ങള്‍ കൈകാര്യം ചെയ്യാറില്ല. സീനിയര്‍ നേതാവാണ് കോടിയേരി. വിജയരാഘവന്‍ അങ്ങനെയല്ല.



സഹകരണ ബാങ്കിലെ ക്രമക്കേട് ഇഡി അന്വേഷിക്കണമെന്ന കെ.ടി.ജലീലിന്റെ ആവശ്യമാണ് മുഖ്യമന്ത്രി തള്ളിയത്. ഇ ഡി ചോദ്യം ചെയ്തശേഷം ജലീലിന് ഇഡിയില്‍ കൂടുതല്‍ വിശ്വാസം വന്നിരിക്കാമെന്നു മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു. സഹകരണ മേഖലയിലെ കാര്യങ്ങള്‍ ഇഡി കൈകാര്യം ചെയ്യേണ്ട വിഷയമല്ലെന്ന് മുഖ്യമന്ത്രി അടിവരയിട്ട് പ്രഖ്യാപിച്ചു.

സഹകരണ സ്ഥാപനത്തിന്റെ കാര്യത്തില്‍ തീരുമാനമെടുക്കേണ്ടതു സംസ്ഥാനമാണ്. സാധാരണ ഗതിയില്‍ ഇത്തരമൊരു ആവശ്യം ജലീല്‍ ഉന്നയിക്കേണ്ട കാര്യമല്ല. ഇവിടെ ആവശ്യമായ അന്വേഷണം നടക്കുന്നുണ്ട്. കുറ്റം കണ്ടെത്തിയാല്‍ ശക്തമായ നടപടി സ്വീകരിക്കും.



കെ.ടി.ജലീല്‍ ആരോപണം ഉന്നയിച്ച എആര്‍ നഗര്‍ സര്‍വീസ് സഹകരണ ബാങ്കിന്റെ കാര്യത്തില്‍ നടപടി വൈകിയതു കോടതിയില്‍ സ്റ്റേ ഉള്ളതിനാലാണെന്നും മുഖ്യമന്ത്രി പറഞ്ഞു. എആര്‍ നഗര്‍ ബാങ്കില്‍ കോടികളുടെ അഴിമതി നടക്കുന്നതായും ഇത് ഇഡി അന്വേഷിക്കണമെന്നും ജലീല്‍ ആവശ്യപ്പെട്ടിരുന്നു.

ജലീലിനെ മുമ്പും പിണറായിക്ക് വിശ്വാസമുണ്ടായിരുന്നില്ല. അതുകൊണ്ടാണ് അദ്ദേഹം സ്വതന്ത്രനായി തന്നെ മുന്നണിയില്‍ തുടരുന്നത്. ജലീലിനെതിരെ സ്വര്‍ണ്ണക്കടത്തില്‍ ആരോപണങ്ങള്‍ ഉയര്‍ന്നതു കൊണ്ടാണ് അദ്ദേഹത്തിന് പിണറായി മന്ത്രി സ്ഥാനം നല്‍കാതിരുന്നത്.

പിണറായിക്ക് എതിരെ ശബ്ദിക്കാന്‍ ജലീലിന് ധൈര്യമില്ല. അതു കൊണ്ടു തന്നെ പിണറായിക്ക് ജലീല്‍ മറുപടി നല്‍കില്ല. പിണറായിയോട് തന്റെ ഭാഗം ന്യായീകരിക്കാനുള്ള ശ്രമങ്ങളാണ് ഇപ്പോള്‍ മുഖ്യമന്ത്രി നടത്തി കൊണ്ടിരിക്കുന്നത്. എന്നാല്‍ അതിനുള്ള അവസരം അദ്ദേഹം നല്‍കുന്നില്ല.

കെ.റ്റി. ജലീലിന്റെ നീക്കങ്ങള്‍ അന്വേഷിക്കാന്‍ മുഖ്യമന്ത്രി നിര്‍ദ്ദേശം നല്‍കിയിട്ടുണ്ട്. അദ്ദേഹം ആരെയൊക്കെയാണ് കാണുന്നതെന്ന് സി പി എം നിരീക്ഷിക്കും.