അതെങ്ങനെ ശരിയാകും... വര്‍ഷങ്ങള്‍ക്ക് മുമ്പ് പൊട്ടിക്കരയുന്ന ഐഎസ്ആര്‍ഒ ചെയര്‍മാന്‍ ഡോ.കെ.ശിവനെ പ്രധാനമന്ത്രി നരേന്ദ്ര മോദി ആശ്വസിപ്പിക്കുന്ന ചിത്രമുണ്ട്; ചന്ദ്രയാന്‍ ദൗത്യം പരാജയമെന്ന് പറഞ്ഞ് അന്ന് കളിയാക്കിയവര്‍ക്ക് ഇന്ന് തിരുത്തേണ്ടി വന്നു; ചരിത്രമായി ചന്ദ്രയാന്‍ 2 മാറി; രണ്ട് വര്‍ഷം കൊണ്ട് ചുറ്റിയത് 9,000 പ്രദക്ഷിണം
ചന്ദ്രയാന്‍ ദൗത്യം വിജയിക്കുമെന്ന് കണ്ട് പ്രധാനമന്ത്രി നരേന്ദ്രമോദി ഐഎസ്ആര്‍ഒ ആസ്ഥാനത്തെത്തിയിരുന്നു. എന്നാല്‍ അവസാന നിമിഷം പാളിയപ്പോള്‍ ഐഎസ്ആര്‍ഒ ചെയര്‍മാന്‍ ഡോ. കെ. ശിവന്‍ പൊട്ടിക്കരഞ്ഞു. അതിനിടയിലാണ് ഏറെ വൈകാരികമായ സംഭവമുണ്ടായത്.
നരേന്ദ്ര മോദി ഡോ. കെ. ശിവനെ കെട്ടിപ്പിടിച്ച് ആശ്വസിപ്പിക്കുന്ന കാഴ്ച വല്ലാത്തതായിരുന്നു. ചന്ദ്രയാന്‍ 2 പൂര്‍ണമായും ദൗത്യത്തില്‍ വിജയം കണ്ടില്ലെങ്കിലും രാജ്യം മുഴുവന്‍ ഇസ്‌റോയിലെ ശാസ്ത്രജ്ഞന്‍മാര്‍ക്കൊപ്പമാണ് എന്ന സന്ദേശമാണ് മോദി നല്‍കിയത്. ഞാന്‍ നിങ്ങള്‍ക്കൊപ്പം ഉണ്ടെന്നും ആത്മവിശ്വാസം കൈവെടിയെരുതെന്നും ശാസ്ത്രജ്ഞരോട് പ്രധാനമന്ത്രി നരേന്ദ്ര മോദിയും പറഞ്ഞു. അന്ന് മോദി പറഞ്ഞതിന് ഇന്ന് ഫലം കിട്ടി.
ചന്ദ്രനില്‍ ഇറങ്ങാനുള്ള ലാന്‍ഡര്‍ ലക്ഷ്യം കണ്ടില്ലെങ്കിലും ചന്ദ്രയാന്‍ 2 ദൗത്യത്തിന്റെ ഓര്‍ബിറ്റര്‍ പേടകം ചന്ദ്രനെ ചുറ്റി ചരിത്രമാവുകയാണ്. രണ്ടു വര്‍ഷം കൊണ്ട് ഒന്‍പതിനായിരത്തിലേറെ ഭ്രമണങ്ങളാണ് പൂര്‍ത്തിയാക്കിയത്.
ഈ പ്രയാണത്തിനിടെ ചന്ദ്രന്റെ മണ്ണിലെ മാംഗനീസും ക്രോമിയവും ഉള്‍പ്പെടെയുള്ള മൂലകങ്ങളുടെ കൃത്യമായ വിവരങ്ങള്‍ നല്‍കി ഗവേഷണലോകത്തെ വിസ്മയിപ്പിച്ചു. പുതുതായി കണ്ടെത്തിയ മൂലകങ്ങളില്‍ ഓക്‌സിജന്‍, അലൂമിനിയം, സിലിക്കണ്‍, കാത്സ്യം, ടൈറ്റാനിയം, ഇരുമ്പ് തുടങ്ങിയവയുമുണ്ട്. റിമോട്ട് സെന്‍സിംഗ് വഴിയാണ് മൂലക സാന്നിദ്ധ്യം കണ്ടെത്തിയതെന്ന് ഐ.എസ്.ആ.ഒ അറിയിച്ചു.
ചന്ദ്രയാന്‍2 രണ്ട് വര്‍ഷം പൂര്‍ത്തിയാക്കുന്നതിന്റെ ഭാഗമായി ഐ.എസ്.ആര്‍.ഒ ഫേസ്ബുക്കിലും യൂട്യൂബിലും തത്സമയം സംപ്രേഷണം ചെയ്ത രണ്ടു ദിവസത്തെ ചാന്ദ്രശാസ്ത്ര ശില്പശാലയിലാണ് ചെയര്‍മാന്‍ ഡോ. കെ. ശിവന്‍ പുതിയ വിവരങ്ങള്‍ പുറത്തുവിട്ടത്. 2019 സെപ്തംബര്‍ ആറിനാണ് ചന്ദ്രയാന്‍2 ചന്ദ്രന്റെ ഭ്രമണപഥത്തില്‍ എത്തിയത്.
പലത്മഗ്‌നീഷ്യം, അലൂമിനിയം, സിലിക്കണ്‍, കാത്സ്യം, ടൈറ്റാനിയം, ഇരുമ്പ്, സോഡിയം തുടങ്ങിയ മൂലകങ്ങളുടെ സാന്നിദ്ധ്യം പരിശോധിക്കാന്‍ രണ്ടാം ചന്ദ്രയാനിലെ ലാര്‍ജ് ഏരിയ സോഫ്റ്റ് എക്‌സ്‌റേ സ്‌പെക്ട്രോമീറ്റര്‍ പേലോഡ് ഫലങ്ങള്‍ ഗുണം ചെയ്‌തെന്ന് ഐ.എസ്.ആര്‍.ഒയുടെ ഗവേഷണരേഖ സൂചിപ്പിക്കുന്നു.
നേരത്തേയുള്ള ചാന്ദ്ര ദൗത്യങ്ങളില്‍ ശേഖരിച്ച മണ്ണ് സാമ്പിളുകളിലൂടെയാണ് മൂലകങ്ങളുടെ സാന്നിദ്ധ്യം സ്ഥിരീകരിച്ചിരുന്നത്. ചന്ദ്രയാന്‍ 2ലെ എട്ട് പേലോഡുകള്‍ റിമോട്ട് സെന്‍സിംഗിലൂടെയും ഇന്‍സിറ്റു സാങ്കേതിക വിദ്യയിലൂടെയുമാണ് നിരീക്ഷണം നടത്തുന്നത്.
2019 ജൂലായ് 22ന് വിക്ഷേപിച്ച ചന്ദ്രയാന്‍ 2 ലക്ഷ്യത്തിന് അല്പം അകലെ വച്ച് നിയന്ത്രണം നഷ്ടപ്പെട്ട് ലാന്‍ഡര്‍ ചന്ദ്രോപരിതലത്തില്‍ ഇടിച്ചുവീഴുകയായിരുന്നു. എന്നാല്‍ ഇന്ന് രാജ്യത്തിനാകെ അഭിമാനമായി ചന്ദ്രയാന്‍ മാറിയിരിക്കുകയാണ്.
ആന്തരിക സൗരയൂഥത്തിന്റെ പരിണാമം മനസിലാക്കാന്‍ ചന്ദ്രയാന്‍ 2 സഹായിക്കുമെന്നാണ് ഐ.എസ്.ആര്‍.ഒ ചെയര്‍മാന്‍ ഡോ. കെ. ശിവന്‍ പറയുന്നത്.
https://www.facebook.com/Malayalivartha
