ബാലരാമപുരത്ത് മാനസിക രോഗിയായ മകള്‍ അമ്മയെ തലയിൽ വെട്ടി വലിച്ചിഴച്ച് റോഡിൽ കൊണ്ടുവന്ന് കത്തിച്ചു. മൊട്ടമൂട്,കല്ലറക്കല്‍ ചാനല്‍ക്കരവീട്ടില്‍ അന്നമ്മ(88) യാണ്​ കൊല്ലപ്പെട്ടത്.

ഇന്ന് രാവിലെ എട്ട് മണിക്ക് മകള്‍ ലീല വീട്ടിനുള്ളില്‍ ​ വെച്ച്‌ അന്നമ്മയുടെ തലയില്‍ വെട്ടിയ ശേഷം വീടിന് പുറത്തേക്ക് കൊണ്ടിട്ട് കരിയില കൂട്ടിയിട്ട് കത്തിക്കുകയായിരുന്നു.

തല ഭാഗീകമായി കത്തിനശിച്ചു. തീ കത്തുന്നത്​ കണ്ട് ഓടിയെത്തിയ പരിസര വാസികള്‍ തീ കെടുത്തിയതോടെയാണ് സംഭവം പുറത്തറിയുന്നത്.

അഞ്ച് മക്കളുള്ള അന്നമ്മ മാനസിക രോഗിയായ മകളുമായിട്ടാണ് താമസിക്കുന്നത്. കൊലപാതകത്തിന് ശേഷം വീട്ടിനുള്ളില്‍ കയറി കതകടച്ച്‌ കിടന്നുറങ്ങുകയായിരുന്ന ലീലയെ നരുവാമൂട് പൊലീസ് അറസ്റ്റ് ചെയ്തു.