അച്ഛന് പിന്നാലെ ഏക ആശ്രയമായിരുന്ന അമ്മയെയും വിധി തട്ടിയെടുത്ത നടുക്കത്തിൽ ഉപ്പും മുളകും ടെലിവിഷൻ സീരീയൽ താരം ജൂഹി രുസ്തഗി. കഴിഞ്ഞ ദിവസമാണ് ഇരുമ്പനത്ത് വാഹനാപകടത്തില്‍ അമ്മയെ ജൂഹിക്ക് നഷ്ടപ്പെട്ടത്. ഇരുമ്പനം സീപോര്‍ട്ട്-എയര്‍പോര്‍ട്ട് റോഡില്‍ എച്ച്‌പിസിഎല്ലിനു മുന്നിൽ രാവിലെ പതിനൊന്നേ മുക്കാലോടെയായിരുന്നു അപകടം.

ജൂഹിയുടെ സഹോദരൻ ചിരാഗ് രുസ്തഗിക്കൊപ്പം ഇരുചക്ര വാഹനത്തിന് പിന്നിൽ യാത്ര ചെയ്യുകയായിരുന്നു ഭാഗ്യലക്ഷ്മി.പിന്നാലെ വന്ന കുടിവെള്ള ടാങ്കര്‍ ഇടിച്ചതോടെ തെറിച്ചു വീണ ഭാഗ്യലക്ഷ്മിയുടെ ശരീരത്തിലൂടെ ലോറി കയറിയിറങ്ങുകയായിരുന്നു. ഭാഗ്യലക്ഷ്മിയുടെ മൃതദേഹം സണ്‍റൈസ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ഇന്ന് എരുവേലി ശാന്തി തീരം പൊതുശ്മശാനത്തിൽ ആയിരിക്കും സംസ്‌കാരം. ചിരാഗ് രുസ്തഗിക്ക് അപകടത്തിൽ നിസ്സാര പരിക്കേറ്റു.

ബിസിനസുകാരനായ രഘുവീര്‍ ശരണ്‍ റുസ്തഗി ആണ് ജൂഹിയുടെ പിതാവ്. അദ്ദേഹം നേരത്തെ അന്തരിച്ചിരുന്നു. പിന്നീട് ജൂഹിയുടെയും സഹോദരന്റെയും ഏക ആശ്രയമായിരുന്നു അമ്മ ഭാഗ്യലക്ഷ്മി. ഫ്‌ളവേഴ്‌സിന്റെ 'ഉപ്പും മുളകും' ടിവി പരമ്പരയിൽ ലച്ചുവെന്ന കഥാപാത്രമായാണ് ജൂഹി പ്രേക്ഷകരുടെ ഇഷ്ട താരമായത്.

പലപ്പോഴും അമ്മയെ കുറിച്ച്‌ അഭിമുഖങ്ങളില്‍ വികാരഭരിതയായി താരം സംസാരിച്ചിട്ടുണ്ട്. ഇപ്പോൾ ജൂഹിയുടെ അമ്മയുടെ വിയോഗ വാര്‍ത്ത അറിഞ്ഞതിന്‌റെ ഞെട്ടലിലാണ് ഉപ്പും മുളകും ആരാധകര്‍. ഉപ്പും മുളകും ഗ്രൂപ്പുകളില്‍ എല്ലാം ജൂഹിയുടെ അമ്മയ്ക്ക് ആദരാഞ്ജലികള്‍ നേര്‍ന്നുളള പോസ്റ്റുകള്‍ വരുന്നുണ്ട്.

അതേ സമയം നടിയുടെ സഹോദരന്‍ ചിരാഗിന്‌റെ ആരോഗ്യാവസ്ഥയെ കുറിച്ചുളള റിപ്പോര്‍ട്ടുകള്‍ പുറത്ത് വന്നിട്ടില്ല. നടിയുടെ സഹോദരന് ഒന്നും സംഭവിക്കരുതേ എന്ന പ്രാര്‍ത്ഥനകളിലാണ് ആരാധകര്‍. പിതാവിന്‌റെ വിയോഗം വലിയ ശൂന്യത ആയിരുന്നുവെന്നും അതുമായി പൊരുത്തപ്പെടാന്‍ കുറച്ചുകാലം എടുത്തുവെന്നും നടി പറഞ്ഞിരുന്നു. അച്ഛന് കേരളവും മലയാളികളെയും ഒരുപാട് ഇഷ്ടമായിരുന്നു എന്നും നടി പറഞ്ഞു. അങ്ങനെയാണ് ഒരു മലയാളി പെണ്‍കുട്ടിയെ തന്നെ തേടി പിടിച്ച് ജൂഹിയുടെ പിതാവ് വിവാഹം കഴിച്ചത്.

ജനപ്രിയ പരമ്പരയായ ഉപ്പും മുളകിലൂടെയാണ് ലച്ചു അഥവാ ജൂഹി പ്രശസ്തയാകുന്നത്. ചോറ്റാനിക്കര മഹാത്മാഗാന്ധി പബ്ലിക് സ്കൂളിൽ വിദ്യാർത്ഥിയായിരിക്കെയാണ് ജൂഹി ഉപ്പും മുളകും എന്ന സീരിയലിൽ എത്തിയത്. ഉപ്പും മുളകിന്റെ വിധായകൻ ഉണ്ണികൃഷ്ണന്റെ മകൻ അനന്തകൃഷ്ണൻ ജൂഹിയുടെ സുഹൃത്തായിരുന്നു. ഒരു പിറന്നാൾ ആഘോഷത്തിന് പങ്കെടുക്കാൻ സുഹൃത്തിന്റെ വീട്ടിൽ പോയതാണ് ജൂഹിയുടെ ജീവിതത്തിൽ വഴിത്തിരിവായത്.

രാജസ്ഥാൻ സ്വദേശിയായ അച്ഛൻ രഘുവീർ ശരൺ രുസ്‌തഗിയ്ക്ക് താന്‍ അഭിനേത്രിയാവുന്നതിനോട് താല്‍പര്യമായിരുന്നുവെന്നും പപ്പയുടെ ആഗ്രഹം പോലെ ആര്‍ടിസ്റ്റായി മാറുകയായിരുന്നുവെന്നും ജൂഹി വെളിപ്പെടുത്തിയിരുന്നു. മെഗാസീരിയലുകള്‍ കണ്ട് കണ്ണീര്‍വാര്‍ത്തു മടുത്ത കുടുംബപ്രേക്ഷകര്‍ക്ക് പുതുമ സമ്മാനിച്ചുകൊണ്ടെത്തിയ പരമ്പര മിനിസ്ക്രീൻ പ്രേക്ഷകർ ഏറ്റെടുക്കുകയും.

ജൂഹി പ്രേക്ഷകരുടെ പ്രിയപ്പെട്ട ലച്ചുവും ആവുകയായിരുന്നു. എന്നാൽ ഉപ്പും മുളകിൽ നിന്നും പിന്നീട് വിട്ടുനിന്ന ലച്ചു ഉപ്പും മുളകും താരങ്ങള്‍ ഒന്നിച്ച ഏരിവും പുളിയും എന്ന പരിപാടിയില്‍ അടുത്തിടെ അഭിനയിച്ചിരുന്നു. ഉപ്പും മുളകിന് ശേഷം ചാനല്‍ പരിപാടികളിലൂടെ ലച്ചു വീണ്ടും പ്രേക്ഷകര്‍ക്ക് മുന്‍പില്‍ എത്തി. ഡോ റോവിനുമായുള നടിയുടെ വിവാഹ നിശ്ചയം മുന്‍പ് കഴിഞ്ഞതാണ്. ഇപ്പോള്‍ നടിയുടെ വിവാഹത്തിന് മുമ്പുള്ള അമ്മയുടെ വിയോഗം ആരാധകരെയും സങ്കടത്തിലാഴ്ത്തിയിരിക്കുകയാണ്‌.