സമവാക്യങ്ങള്‍ മാറുന്നു... നാര്‍ക്കോട്ടിക് ജിഹാദ് പരാമര്‍ശത്തില്‍ പാലാ ബിഷപ്പിന് പിന്തുണയുമായി കൂറ്റന്‍ റാലി; വിവിധ ക്രൈസ്തവ സംഘടനകള്‍, പി.സി ജോര്‍ജ്, ബിജെപി പ്രവര്‍ത്തകര്‍, കത്തോലിക്ക കോണ്‍ഗ്രസ് പ്രവര്‍ത്തകര്‍ എന്നവര്‍ ഒന്നിച്ചെത്തിയതോടെ ബിഷപ്പ് ഹൗസ് പരിസരം മാറിമറിഞ്ഞു
പാലാ ബിഷപ്പ് മാര്‍ ജോസഫ് കല്ലറങ്ങാട്ടിലിന്റെ നാര്‍ക്കോട്ടിക് ജിഹാദ് പ്രസംഗം വലിയ ഒച്ചപ്പാടാണ് ഉണ്ടാക്കിയിരിക്കുന്നത്. നാര്‍ക്കോട്ടിക് ജിഹാദ് പരാമര്‍ശത്തില്‍ പാലാ ബിഷപ്പ് മാര്‍ ജോസഫ് കല്ലറങ്ങാട്ടിന് പിന്തുണയുമായി ബിഷപ്‌സ് ഹൗസിന് മുന്നില്‍ റാലി. ബിഷപ്പിനെതിരെ പ്രതിഷേധം ഉയരുന്ന സാഹചര്യത്തിലാണ് വിവിധ സംഘടനകള്‍ പിന്തുണ പ്രഖ്യാപിച്ച് ബിഷപ്പ് ഹൗസിന് മുന്നില്‍ എത്തിയത്.
വിവിധ ക്രൈസ്തവ സംഘടനകള്‍, പി.സി ജോര്‍ജ്, ബിജെപി പ്രവര്‍ത്തകര്‍, കത്തോലിക്ക കോണ്‍ഗ്രസ് പ്രവര്‍ത്തകര്‍ എന്നിവര്‍ പിന്തുണയറിയിച്ച് എത്തി. ബിജെപി നേതാക്കളായ എന്‍ ഹരി, നോബിള്‍ മാത്യു എന്നിവര്‍ പങ്കെടുത്തു. പി.സി ജോര്‍ജാണ് യോഗം ഉദ്ഘാടനം ചെയ്തത്. ഇന്ന് തന്നെ കത്തോലിക്ക സഭയുടെ ജാഥയും നടക്കും.
അതേസമയം ബിഷപ്പിന്റെ പ്രസംഗത്തെ ന്യായീകരിച്ച് പാലാ രൂപത രംഗത്തെത്തി. ബിഷപ്പിന്റെ പ്രസ്താവന ഏതെങ്കിലും സമുദായത്തിന് എതിരല്ല. സമൂഹത്തിലെ അപകടകരമായ പ്രവണതകളെക്കുറിച്ചുള്ള മുന്നറിയിപ്പാണ്. ആരെയും വേദനിപ്പിക്കാന്‍ ശ്രമിച്ചിട്ടില്ല. തിന്മയുടെ വേരുകള്‍ പിഴുതെറിയാനുള്ള സമൂഹത്തിന്റെ കടമ ഓര്‍മിപ്പിക്കുകയാണ് ചെയ്തതെന്ന് പ്രസ്താവനയില്‍ രൂപത വ്യക്തമാക്കി.
തെറ്റിദ്ധാരണാജനകമായ പ്രചാരണങ്ങള്‍ അവസാനിപ്പിക്കണമെന്നും ആവശ്യപ്പെട്ടു.അതേസമയം, വിവാദ പ്രസംഗത്തിന്റെ പൂര്‍ണ രൂപം സഭയെ പിന്തുണയ്ക്കുന്ന ദീപിക പത്രത്തില്‍ പ്രസിദ്ധികരിക്കുകയുംചെയ്തു.
പാലാ ബിഷപ്പിനെ ഇരിങ്ങാലക്കുട ബിഷപ്പ് പിന്തുണച്ചെങ്കിലും മറ്റു സഭകള്‍ അകലം പാലിക്കുകയാണ്. കോണ്‍ഗ്രസ് നേതാക്കള്‍ ബിഷപ്പിനെ തള്ളിപറഞ്ഞെങ്കിലും യു.ഡി.എഫിലെ കേരള കോണ്‍ഗ്രസ് ജോസഫ് വിഭാഗവും മാണി സി കാപ്പന്‍ എം.എല്‍എയും ന്യായീകരിച്ചു. ക്രൈസ്തവ വിശ്വാസ റാലിബിഷപ്പിനെതിരെ മുസ്ലീം ഐക്യവേദി നടത്തിയ പ്രകടനത്തിന് പിറകേ ബിഷപ്പിനെ പിന്തുണച്ച് െ്രെകസ്തവ വിശാസികളുടെ രണ്ടു റാലി ഇന്നലെ പാലായില്‍ നടന്നു.
ബി.ജെ.പി ജില്ലാ പ്രസിഡന്റ് നോബിള്‍ മാത്യൂ, സംസ്ഥാന സെക്രട്ടറി എന്‍.ഹരി എന്നിവര്‍ പങ്കെടുത്തു. ജനപക്ഷം നേതാവ് പി.സി.ജോര്‍ജ് പ്രസംഗിച്ചു. കേരള കോണ്‍ഗ്രസ് (ജെ) ജില്ലാ പ്രസിഡന്റ് സജി മഞ്ഞകടമ്പില്‍, മഹിളാ കോണ്‍ഗ്രസ് ജില്ലാ പ്രസിഡന്റ് നിര്‍മല ജിമ്മി തുടങ്ങിയവര്‍ ഐക്യദാര്‍ഢ്യം പ്രഖ്യാപിച്ചു.
നിയമസഭാ തിരഞ്ഞെടുപ്പ് കാലത്ത് ലൗ ജിഹാദ് വിവാദം ഉയര്‍ത്തിയ കേരള കോണ്‍ഗ്രസ് എം ചെയര്‍മാന്‍ ജോസ് കെ മാണി ഇതുവരെ പ്രതികരിച്ചില്ല. വിവാദം പാര്‍ട്ടി ചര്‍ച്ച ചെയ്തിട്ടില്ലെന്നാണ് ജനറല്‍ സെക്രട്ടറി സ്റ്റീഫന്‍ ജോര്‍ജ് പറഞ്ഞത്.
മതസ്പര്‍ധ വളര്‍ത്തുന്ന പ്രസംഗം നടത്തിയ ബിഷപ്പിനെതിരെ ജാമ്യമില്ലാ വകുപ്പുകള്‍ ചേര്‍ത്ത് കേസെടുക്കണമെന്ന് കോട്ടയത്തും തൃശൂരും ഉന്നത പൊലീസ് ഉദ്യോഗസ്ഥര്‍ക്ക് പരാതി നല്‍കിയിട്ടും കേസെടുക്കുന്നില്ലെന്ന് മുസ്ലീം സംഘടനകള്‍ കുറ്റപ്പെടുത്തി.
മുസ്ലിം, ക്രിസ്ത്യന്‍ സമുദായങ്ങളെ തമ്മിലടിപ്പിക്കാനുള്ള സംഘപരിവാര്‍ അജണ്ടയില്‍ കേരളം വീണുപോവരുതെന്ന് പ്രതിപക്ഷ നേതാവ് വി.ഡി. സതീശന്‍ പറഞ്ഞു. പാലാ ബിഷപ്പിന്റെ പ്രസ്താവന ആയുധമാക്കി കേരളത്തിന്റെ സാമുദായികമൈത്രി തകര്‍ക്കാനുള്ള ശ്രമങ്ങളെ കാണാതെ പോകരുത്. രണ്ട് മതങ്ങള്‍ തമ്മിലുള്ള കലഹമാണ് അത്തരക്കാര്‍ ലക്ഷ്യമിടുന്നത്. ഈ മതങ്ങള്‍ തമ്മില്‍ അകല്‍ച്ചയുണ്ടാകണമെന്ന് ആഗ്രഹിച്ച് കുറേപ്പേര്‍ ഇതിനുപിന്നില്‍ നില്‍ക്കുന്നു എന്നും കുറ്റപ്പെടുത്തി.
https://www.facebook.com/Malayalivartha
