വൈത്തിരി ദേശീയ പാതയില്‍ പൂക്കോട് വെറ്ററിനറി സര്‍വകലാശാലയ്ക്ക് സമീപം ലക്കിടി വളവില്‍ മണ്ണിടിഞ്ഞു വീണു. ലക്കിടി വളവ് വീതികൂട്ടല്‍ പ്രവൃത്തി നടക്കുന്ന സ്ഥലത്താണ് മണ്ണിടിഞ്ഞ് വീണത്. ഇടിഞ്ഞ ഭാഗം നികത്തുന്നതിനിടെ മുകളില്‍ നിന്ന് കനത്ത തോതില്‍ മണ്ണും കല്ലും മരങ്ങളും താഴേയ്ക്ക് പതിക്കുകയായിരുന്നു. പൊലീസ് എത്തി വാഹനങ്ങളെ നിയന്ത്രിച്ചാണ് കടത്തിവിട്ടിരുന്നത്.

50 അടിയോളം ഉയരത്തില്‍ നിന്നാണ് മണ്ണും കല്ലും റോഡിലേയ്ക്ക് പതിക്കുന്നത്. നിരവധി മരങ്ങള്‍ താഴേയ്ക്ക് പതിക്കാന്‍ തക്ക വിധത്തില്‍ ഭീഷണിയായി നില്‍ക്കുന്നുണ്ട്. ഇതുവഴിയുള്ള യാത്രക്കാര്‍ ജാഗ്രത പാലിക്കണമെന്ന് നിര്‍ദ്ദേശമുണ്ട്. വണ്‍വേ ആയിട്ടാണ് വാഹനങ്ങള്‍ കടത്തിവിടുന്നത്.

രണ്ട് വര്‍ഷങ്ങള്‍ക്ക് മുമ്പാണ് ലക്കിടി വളവ് വാര്‍ത്തകളില്‍ നിറഞ്ഞിരുന്നത്. രണ്ട് വിദ്യാര്‍ത്ഥികളുടെ അപകട മരണമായിരുന്നു വിവാദങ്ങള്‍ക്ക് തുടക്കമിട്ടത്. വിദ്യാര്‍ത്ഥികളുടെ മരണത്തിന് ശേഷം വളവ് നിവര്‍ത്തണമെന്ന ആവശ്യവുമായി പഞ്ചായത്ത് അധികൃതര്‍ തന്നെ രംഗത്ത് എത്തുകയായിരുന്നു. മാത്രമല്ല വളവിലെ കാടുവെട്ടിത്തെളിച്ചതിനോടൊപ്പം പഞ്ചായത്തധികൃതര്‍ റോഡിന് വശത്തുള്ള മണ്‍തിട്ടയും നീക്കാന്‍ ആരംഭിച്ചു.

ഇതോടെ തങ്ങളുടെ അനുമതിയില്ലാതെ പാതയോരം നിരപ്പാക്കുന്നതിനെതിരെ ദേശീയ പാതാ ഉദ്യോഗസ്ഥര്‍ രംഗത്ത് വന്നു. പ്രവൃത്തി നിര്‍ത്തിവെപ്പിക്കുകയും ചെയ്തു. തര്‍ക്കം മുതലെടുത്ത് ചിലര്‍ മണ്ണുമാന്തിയന്ത്രം ഉപയോഗിച്ച് ലോഡ് കണക്കിന് മണ്ണിടിച്ച് സ്വകാര്യ വ്യകതിയുടെ സ്ഥലത്ത് കൊണ്ടുപോയി ഇടുകയുമായിരുന്നു. സ്വകാര്യവ്യക്തികള്‍ നഷ്ടപരിഹാരം നല്‍കി പ്രശ്നം ഒതുക്കാന്‍ ശ്രമിച്ചെങ്കിലും നടന്നില്ല. യന്ത്രം ഉപയോഗിച്ച് വലിയ തോതില്‍ മണ്ണിടിച്ചതിനാല്‍ ബാക്കിയുള്ള മണ്‍ത്തിട്ട മഴയില്‍ ഇടിഞ്ഞുവീഴാനുള്ള സാധ്യത ഏറെയായിരുന്നു.