സ്‌കാനിങ് പരിശോധനക്കെത്തിയ യുവതിയെ ലൈംഗികമായി പീഡിപ്പിക്കാന്‍ ശ്രമിച്ച സംഭവത്തില്‍ എക്സ്‌റേ ക്ലിനിക് ഉടമയെ പോലീസ് അറസ്റ്റ് ചെയ്തു. കളമ്പുകാട് വരിക്കമാന്‍ തൊട്ടിയില്‍ സ്റ്റീഫനാണ്(57) പൊലീസ് പിടിയിലായത്. വെള്ളിയാഴ്ച ഉച്ചയ്ക്കാണ് കേസിന് ആസ്പദമായ സംഭവം. സ്റ്റീഫന്‍ കടുത്തുരുത്തി കല്ലറയില്‍ സ്വകാര്യ എക്സ്‌റേ ക്ലിനിക് നടത്തുകയാണ്.

എക്‌സ്‌റേ എടുക്കാന്‍ വന്നപ്പോള്‍ പ്രതി തന്റെ സ്വകാര്യ ഭാഗങ്ങളില്‍ സ്പര്‍ശിക്കുകയായിരുന്നുവെന്നാണ് യുവതി നല്‍കിയ പരാതിയില്‍ പറയുന്നത്. സ്‌കാനിങ്ങിന് എത്തിയത് 30 വയസ്സുള്ള യുവതിയാണ്. യുവതി അനുചിതമായ രീതിയില്‍ ശരീരത്തില്‍ സ്പര്‍ശിച്ചതോടെ ബഹളം വെച്ച് പുറത്തേയ്ക്കിറങ്ങി ഓടുകയായിരുന്നു.

തുടര്‍ന്ന് യുവതിയുടെ ബഹളം കേട്ടെത്തിയ സമീപവാസികള്‍ പോലീസില്‍ വിവരം അറിയിക്കുകയായിരുന്നു. ഉടന്‍ തന്നെ പോലീസ് എത്തുകയും എക്സ്‌റേ ക്ലിനിക് ഉടമയെ അറസ്റ്റ് ചെയ്യുകയും ചെയ്തു. പ്രതിയെ അറസ്റ്റ് ചെയ്തത് കടുത്തുരുത്തി സി. ഐ. കെ. ജെ.തോമസിന്റെ നേതൃത്വത്തിലുള്ള സംഘമാണ്. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.