ആളുകളെ കണ്ടാല്‍ പറന്നുചെന്ന് കൊത്തിയിരുന്ന ആക്രമണകാരിയായ പരുന്തിനെ പിടികൂടി. ചിങ്ങോലി പന്ത്രണ്ടാം വാര്‍ഡില്‍ വൈദ്യശാലയ്ക്ക് പടിഞ്ഞാറ് പേരാത്ത് ഭാഗത്തുള്ള വീടുകളില്‍ നിന്ന് ആളുകള്‍ക്ക് പുറത്തിറങ്ങാനാവാത്ത വിധം അക്രമകാരിയിയരുന്ന പരുന്തിനെയാണ് ഹരിപ്പാട് നിന്ന് നാട്ടുകാര്‍ പിടികൂടിയത്.

വീടിന് പുറത്ത് തലവെട്ടം കണ്ടാല്‍ പറന്നുവന്ന് ആക്രമിക്കുന്ന രീതിയായിരുന്നു പരുന്തിന്റേത്. ഇതുമൂലം ഭയന്നാണ് നാട്ടുകാര്‍ കഴിഞ്ഞിരുന്നത്. പരുന്തിന്റെ ആക്രമണത്തില്‍ പേരാത്ത് തെക്കതില്‍ സരോജിനി മരുമകള്‍ ജയന്തി, ഹരി, അമല, നീതു കൃഷ്ണ എന്നിവര്‍ക്ക് പരിക്കേറ്റിരുന്നു.

പരുന്തിന്റെ ശല്യം കാരണം ഭീതിയോടെ കഴിഞ്ഞിരുന്ന ജനങ്ങള്‍ ഗ്രാമസഭയില്‍ വിവരമറിയിക്കുകയും തുടര്‍ന്ന് ഗ്രാമപഞ്ചായത്ത് അംഗമായ ബി അന്‍സിയ റാന്നി ഫോറസ്റ്റ് ഡിവിഷനില്‍ വിവരം അറിയിക്കുകയും ചെയ്തിരുന്നു.

പിന്നീട് നാട്ടുകാര്‍ എല്ലാവരും ചേര്‍ന്ന് വല ഉപയോഗിച്ച് പരിക്കേല്‍ക്കാതെയാണ് പരുന്തിനെ പിടികൂടിയത്. ഗ്രാമപഞ്ചായത്തംഗം ബി ആന്‍സിയുടെ വീട്ടില്‍ ആണ് ഇപ്പോള്‍ പരുന്തിനെ സൂക്ഷിച്ചിരിക്കുന്നത്. ഇന്ന് പരുന്തിനെ ഫോറസ്റ്റ് ഉദ്യോഗസ്ഥര്‍ക്ക് കൈമാറും.