ഐഎഎസ് ഓഫീസറായിരുന്നിട്ടും തനിക്ക് അനുഭവിക്കേണ്ടിവന്ന മാനസിക പീഡനം ഓര്‍ത്ത് യുവ ഐഎഎസ് ഓഫീസര്‍ പറഞ്ഞു പോകുകയാണ്. ഇന്ത്യയില്‍ ഒരു പെണ്‍കുട്ടിയും ജനിക്കരുതേ എന്ന് പ്രാര്‍ഥിക്കാനേ എനിക്കു കഴിയൂ. യുവ ഐഎഎസ് ഓഫിസറായ റിജു ബാഫ്‌നയാണ് ഇങ്ങനെ തന്റെ ഫേസ്ബുക്കില്‍ പോസ്റ്റിട്ടിരിക്കുന്നത്. മണിക്കൂറുകള്‍ക്കുള്ളില്‍ നൂറുക്കണക്കിന് ഷെയറുകളാണ് ഈ കുറിപ്പിന് ലഭിച്ചത്.
ഒരു ഐഎഎസ് ഓഫിസറായിരുന്നിട്ടുപോലും തനിക്ക് നേരിടേണ്ടി വന്ന ദുരനുഭവമാണ് റിജുവിന്റെ ഈ പോസ്റ്റിനു പിന്നില്‍. മനുഷ്യാവകാശ കമ്മിഷനിലെ അംഗമായ സന്തോഷ് ചാബിക്കെതിരെ ലൈംഗിക അതിക്രമത്തിന് റിജു കേസ് ഫയല്‍ ചെയ്തതാണ് സംഭവങ്ങളുടെ തുടക്കം. അശ്ലീലമായ മെസേജുകള്‍ നിരന്തരം അയച്ചതിനെത്തുടര്‍ന്നാണ് ഇയാള്‍ക്കെതിരെ റിജു കേസ് ഫയല്‍ ചെയ്തത്. ഇതേത്തുടര്‍ന്ന് സന്തോഷ് ചാബിയെ ജോലിയില്‍ നിന്നും കലക്ടര്‍ ഉടനടി നീക്കി.
കേസില്‍ മൊഴി നല്‍കാന്‍ കോടതിയിലെത്തിയ റിജുവിന്റെ ചുറ്റും ഒരുകൂട്ടം അഭിഭാഷകര്‍ ഉണ്ടായിരുന്നു. ഇത്രയും പേര്‍ കേള്‍ക്കെ മൊഴി നല്‍കുന്നതില്‍ അസ്വസ്ഥയാണെന്നും അഭിഭാഷകരെ മാറ്റണമെന്നും റിജു ആവശ്യപ്പെട്ടു. ഉടന്‍ ഒരു അഭിഭാഷകന്‍ എന്നോട് പുറത്തുപോകാന്‍ പറയാന്‍ നിങ്ങള്‍ക്ക് എങ്ങനെ ധൈര്യമുണ്ടായി. ഇവിടെ ഞാനൊരു അഭിഭാഷകനാണ്. ഓഫിസില്‍ നിങ്ങള്‍ മേലധികാരിയായിരിക്കാം പക്ഷേ അത് കോടതിയിലല്ലെന്നും ഉച്ചത്തില്‍ വിളിച്ചു പറഞ്ഞു.
സ്വകാര്യത വേണമെന്ന് ഞാന്‍ ആവശ്യപ്പെടുന്നത് ഒരു ഐഎഎസ് ഓഫിസറായിട്ടല്ല മറിച്ച് ഒരു സ്ത്രീ എന്ന നിലയിലാണെന്നായിരുന്നു റിജുവിന്റെ മറുപടി. ഒരുപാട് സമയം തര്‍ക്കിച്ച ശേഷം അയാള്‍ അവിടെ നിന്നും പോയി. ഇത്തരം കേസുകളില്‍ മൊഴി നല്‍കുമ്പോള്‍ സ്ത്രീകള്‍ക്ക് സ്വകാര്യത വേണമെന്ന് മജിസ്‌ട്രേറ്റിനോട് പറഞ്ഞപ്പോള്‍ താങ്കള്‍ ചെറുപ്പമാണെന്നും പിന്നെന്തിനാണ് ഇങ്ങനെ ആവശ്യപ്പെടുന്നതെന്നുമായിരുന്നു മറുപടി.
ഈ രാജ്യത്ത് എല്ലായിടത്തും മണ്ടന്മാര്‍ വരിവരിയായി നില്‍ക്കുന്നുണ്ട്. ഇവിടെ പെണ്‍കുട്ടിയായി ജനിക്കുകയാണെങ്കില്‍ എല്ലായിടത്തും പൊരുതാനുള്ള ധൈര്യം സ്വയം നേടിയെടുക്കണമെന്ന ഉപദേശത്തോടെയാണ് റിജുവിന്റെ ഫേസ്ബുക്ക് കുറിപ്പ് അവസാനിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha