'മത സൗഹാര്ദം കാത്ത് സൂക്ഷിക്കണം'; സമൂഹങ്ങള് തമ്മിലുള്ള ആത്മബന്ധം ഒരു കാരണവശാലും നഷ്ടപ്പെടാന് പാടില്ലെന്ന് ക്ലിമ്മീസ് കത്തോലിക്ക ബാവ
നാര്കോട്ടിക് വിവാദത്തിനിടെ മേജര് ആര്ച്ച് ബിഷപ് കര്ദിനാള് മാര് ബസേലിയോസ് ക്ലിമ്മീസ് കത്തോലിക്ക ബാവ മുന്കൈയെടുത്ത് തിരുവനന്തപുരത്ത് മത - സാമുദായിക നേതാക്കളുടെ യോഗം ചേര്ന്നു. പ്രമുഖ മുസ്ലിം സംഘടനകള് യോഗത്തില്നിന്ന് വിട്ടുനിന്നു. സമസ്ത കേരള ജംഇയ്യത്തുല് ഉലമ, സമസ്ത എ.പി. വിഭാഗം, ദക്ഷിണ കേരള ജംഇയ്യത്തുല് ഉലമ, ജമാഅത്തെ ഇസ്ലാമി എന്നീ സംഘടനകളാണ് വിട്ടുനിന്നത്. ചങ്ങനാശേരി ആര്ച് ബിഷപും യോഗത്തില് പങ്കെടുത്തില്ല.
മത സൗഹാര്ദം കാത്ത് സൂക്ഷിക്കണമെന്നും സമൂഹങ്ങള് തമ്മിലുള്ള ആത്മബന്ധം ഒരു കാരണവശാലും നഷ്ടപ്പെടാന് പാടില്ലെന്നും ക്ലിമ്മീസ് കത്തോലിക്ക ബാവ പറഞ്ഞു. അതിന് ഇത്തരത്തിലുള്ള ഫോറങ്ങള് പ്രാദേശികമായി സജീവമാകണം എന്നുള്ള ആഗ്രഹമാണ് ഇന്ന് ഞങ്ങള് പങ്കുവെച്ചതെന്ന് ക്ലിമ്മീസ് കത്തോലിക്ക ബാവ പറഞ്ഞു. യോഗത്തിന് ശേഷം നടത്തിയ വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
ചങ്ങനാശേരി ആര്ച് ബിഷപ് യോഗത്തില് വരുമെന്ന് അറിയിച്ചിരുന്നെങ്കിലും പിന്നീട് എത്താന് അസൗകര്യമുണ്ടെന്ന് പറഞ്ഞു. അത് മറ്റെന്തെങ്കിലും കാരണം കൊണ്ടാണോ എന്ന് അറിയില്ലെന്നും അദ്ദേഹം പറഞ്ഞു. പാണക്കാട് മുനവ്വറലി ശിഹാബ് തങ്ങള്, ഗുരുരത്നം ജ്ഞാനതപസ്വി അടക്കമുള്ളവര് യോഗത്തില് പങ്കെടുത്തു.
മതത്തിന്റെ പേരില് സ്പര്ധ ഉണ്ടാകാതെ സമാധാനം നിലനിര്ത്തുന്ന അന്തരീക്ഷം ഉണ്ടാകുക എന്ന ഉദ്ദേശ്യമാണ് യോഗത്തില് ഉണ്ടായിട്ടുള്ളതെന്നും, ആരെയും അപലിക്കാനോ ന്യായീകരിക്കാനോ അല്ല, ഇത്തരത്തില് ഒരു സാഹചര്യം ഇവിടെ ഇല്ലാതിരിക്കുക എന്ന ആഗ്രഹത്തിലാണ് യോഗം ചേര്ന്നതെന്നും മുനവ്വറലി തങ്ങള് പറഞ്ഞു. യോഗത്തെ മുസ്ലിം ലീഗ് സ്വാഗതം ചെയ്തിട്ടുണ്ടെന്നും സമസ്ത പിന്തുണച്ചിട്ടുണ്ടെന്നും മുനവ്വറലി വ്യക്തമാക്കി.
https://www.facebook.com/Malayalivartha
