വണ്ടിപ്പെരിയാറിലെ ആറുവയസ്സുകാരിയുടെ കൊലപാതകം... മൂന്നുവയസ്സുമുതല് കുട്ടി പീഡനത്തിനിരയായെന്ന് കുറ്റപത്രം
വണ്ടിപ്പെരിയാറില് ആറുവയസ്സുകാരിയെ പീഡിപ്പിച്ചശേഷം കെട്ടിത്തൂക്കി കൊലപ്പെടുത്തിയ കേസില് പൊലീസ് കുറ്റപത്രം സമര്പ്പിച്ചു. ബലാത്സംഗം, കൊലപാതകം എന്നീ കുറ്റങ്ങളും പോക്സോ വകുപ്പും ചുമത്തിയാണ് പെണ്കുട്ടിയുടെ അയല്വാസിയായ പ്രതി അര്ജുനെതിരെ (22) തൊടുപുഴ പോക്സോ കോടതിയില് കുറ്റപത്രം സമര്പ്പിച്ചത്. 300 പേജുള്ള കുറ്റപത്രത്തില് 65 സാക്ഷികളെയും 250 പേരുടെ മൊഴിയും ഉള്പ്പെടുത്തിയിട്ടുണ്ട്.
തേയില എസ്റ്റേറ്റ് ലയത്തില് താമസിച്ചിരുന്ന പെണ്കുട്ടിയെ ജൂണ് 30നാണ് കൊല്ലപ്പെട്ടനിലയില് കണ്ടത്. വണ്ടിപ്പെരിയാര് സി.ഐ ടി.ഡി. സുനില്കുമാറിന്റെ നേതൃത്വത്തിലുള്ള അന്വേഷണത്തില് നാലുദിവസത്തിനകം പ്രതി അറസ്റ്റിലായി. പ്രതിക്ക് പരമാവധി ശിക്ഷ ഉറപ്പാക്കാനും സ്വാഭാവിക ജാമ്യം തടയാനുമാണ് അറസ്റ്റിലായി 90 ദിവസം തികയും മുമ്ബ് കുറ്റപത്രം സമര്പ്പിച്ചത്. കുട്ടിക്ക് മൂന്ന് വയസ്സുള്ളപ്പോള് മുതല് അര്ജുന് പീഡിപ്പിച്ചിരുന്നതായും പ്രകൃതിവിരുദ്ധ പീഡനം നടന്നതായും കൊലക്കുശേഷം തെളിവ് നശിപ്പിക്കാന് ശ്രമിച്ചതായും കുറ്റപത്രത്തില് പരാമര്ശമുണ്ട്. മിഠായി നല്കിയാണ് കുട്ടിയെ വശീകരിച്ചിരുന്നത്.
സംഭവദിവസം കുട്ടിയുടെ മാതാപിതാക്കള് ജോലിക്കുപോയ സമയം ഇയാള് വീട്ടിലെത്തി. പീഡനത്തിനിടെ ബോധരഹിതയായ കുട്ടിയെ വീട്ടിലെ കയറില് കെട്ടിത്തൂക്കി എന്നാണ് പ്രതിയുടെ മൊഴി. ഇയാള് ഇപ്പോള് ജില്ല ജയിലില് റിമാന്ഡിലാണ്. കളിക്കുന്നതിനിടെ ഷാള് കഴുത്തില് കുരുങ്ങി മരിച്ചതാണെന്നാണ് ആദ്യം എല്ലാവരും കരുതിയത്.
പോസ്റ്റ്മോര്ട്ടത്തിലാണ് കൊലപാതകമാണെന്ന് തെളിഞ്ഞത്. പെണ്കുട്ടിയുടെ ദേഹത്തുനിന്ന് പ്രതിയുടെ മുടി ഉള്പ്പെടെ ശാസ്ത്രീയ തെളിവുകള് പൊലീസ് ശേഖരിച്ചിരുന്നു. സംഭവ ദിവസം അര്ജുനൊപ്പം ഉണ്ടായിരുന്ന സുഹൃത്തുക്കള്, ലയത്തിലെ തൊഴിലാളികള് എന്നിവരില്നിന്നും മിഠായി വാങ്ങാറുണ്ടായിരുന്ന കടക്കാരനില്നിന്നും തെളിവുകള് ശേഖരിച്ചിട്ടുണ്ട്.
https://www.facebook.com/Malayalivartha