വയസാന്‍ കാലത്ത് ജീവിതം ഇങ്ങനെ മാറിമറിയുമെന്ന് മരട് പൂപ്പനപ്പറമ്പില്‍ പി.ആര്‍. ജയപാലന്‍ സ്വപ്നത്തില്‍ പോലും വിശ്വസിച്ചിരുന്നില്ല. താന്‍ അനുഭവിച്ച വേദനയ്ക്കും ഒറ്റപ്പെടലിനുമെല്ലാം അന്ത്യം കുറിച്ചിരിക്കുകയാണ്. ജയപാലനെ കാണാന്‍ സുഹൃത്തുക്കളുടേയും ബന്ധുക്കളുടേയും തിരക്കാണ്.

ഓട്ടോറിക്ഷ ഓടിക്കലിന് താത്കാലിക അവധി നല്‍കി കൊച്ചുമകളുമായി കളിച്ചും ചിരിച്ചും സന്തോഷമായി വീട്ടിലിരിക്കുകയായിരുന്നു കോടീശ്വരന്‍ ജയപാലന്‍ ഇന്നലെ. ഓണം ബമ്പറായ 12 കോടി നേടിയ ജയപാലനുമായി സന്തോഷം പങ്കിടാന്‍ ഇന്നലെ ബന്ധുക്കളും ഒട്ടേറെ സുഹൃത്തുക്കളുമെത്തി. ഞായറാഴ്ച നറുക്കെടുത്ത ബമ്പര്‍ ടിക്കറ്റ് ബാങ്കില്‍ ഏല്പിച്ചശേഷം തിങ്കളാഴ്ച രാത്രിയിലാണ് ജയപാലന്‍ വിവരം പുറത്തുവിട്ടത്.

കൊച്ചുമകള്‍ വൈശിഖ എത്തിയതായിരുന്നു ജയപാലന്റെ ഇന്നലത്തെ ഏറ്റവും വലിയ സന്തോഷം. മകന്‍ വൈശാഖിന്റെ മകളാണ് വൈശിഖ. മരുമകള്‍ കാര്‍ത്തികയ്ക്ക് ആലപ്പുഴയില്‍ പോസ്റ്റ് ഓഫീസിലാണ് ജോലി. മൂന്നു വയസുകാരിയായ മകള്‍ വൈശിഖയും അമ്മയ്‌ക്കൊപ്പം ആലപ്പുഴയിലാണ് താമസം. കൊച്ചുമകളെ കളിപ്പിച്ചും സംസാരിച്ചും കഴിയുകയായിരുന്നു ഇന്നലെ മുഴുവന്‍. മുത്തച്ഛനൊപ്പം കളിയും ചിരിയുമായി വൈശിഖയും ആഹ്‌ളാദം പകര്‍ന്നു.

കോഴിക്കോട്ട് ഹോമിയോ മെഡിക്കല്‍ കോളേജില്‍ ഹൗസ് സര്‍ജന്‍സി ചെയ്യുന്ന മകന്‍ ഡോ. വിഷ്ണുവും ഇന്നലെ വീട്ടിലെത്തി. കുടുംബം മുഴുവന്‍ ഒന്നിച്ചതിന്റെ സന്തോഷത്തിലാണെന്ന് ജയപാലന്‍ പറഞ്ഞു.

ചോറ്റാനിക്കരയിലെ ഹോമിയോ മെഡിക്കല്‍ കോളേജില്‍ ജോലി ചെയ്യുന്ന ഭാര്യ മണിക്ക് ഇന്നലെ നൈറ്റ് ഡ്യൂട്ടിയായിരുന്നു. വൈകിട്ട് ഓട്ടോറിക്ഷയില്‍ ഓഫീസില്‍ വിടാന്‍ രാവിലെ തീരുമാനിച്ചെങ്കിലും അതിഥികള്‍ വന്നതോടെ വേണ്ടെന്നുവച്ചു. നാട്ടുകാരും കൂട്ടുകാരും സഹപ്രവര്‍ത്തകരായ ഓട്ടോ തൊഴിലാളികളുമുള്‍പ്പെടെ ഇന്നലെ വീട്ടിലെത്തി. കോടീശ്വരനായതിന്റെ ഭാവമൊന്നുമില്ലാതെ എല്ലാവരെയും സ്വീകരിച്ചു. മരടിലേക്ക് ഭാഗ്യം കൊണ്ടുവന്നയാള്‍ എന്നാണ് നാട്ടുകാര്‍ ഇപ്പോള്‍ വിളിക്കുന്നതെന്ന് ജയപാലന്‍ പറഞ്ഞു.

ഏറെ നാടകീയ നിമിഷങ്ങള്‍ക്കൊടുവിലാണ് കഴിഞ്ഞ ദിവസം ഈ വര്‍ഷത്തെ തിരുവോണം ബമ്പര്‍ ഭാഗ്യശാലിയെ കണ്ടെത്തിയത്. തൃപ്പൂണിത്തുറ മരട് സ്വദേശിയായ ജയപാലന്‍ ആയിരുന്നു ആ ഭാഗ്യവാന്‍. ഈ മാസം പത്തിനെടുത്ത ടിക്കറ്റിലൂടെയാണ് ഓട്ടോ ഡ്രൈവറായ ജയപാലന്‍ കോടിപതിയായത്. ഈ അവസരത്തില്‍ ബമ്പറിലൂടെ 12 കോടി കയ്യില്‍ വന്നെങ്കിലും പഴയപോലെ ഓട്ടോ ഓടിച്ച് മുന്നോട്ട് പോകാനാണ് തീരുമാനമെന്ന് ജയപാലന്‍ പറഞ്ഞത്.

പണം എങ്ങനെ ചെലവാക്കണമെന്നതിനെക്കുറിച്ച് ധാരണയുണ്ട്. ആര്‍ഭാടമായി ജീവിക്കുന്നയാളല്ല ഞാന്‍. ഓട്ടോ ഓടിക്കുന്നത് തുടരണമെന്നാണ് ആഗ്രഹം. വന്ന വഴി മറക്കരുതല്ലോ. ഓട്ടോ ഓടിച്ചത് കൊണ്ടാണല്ലോ ഞാനീ ലോട്ടറി എടുത്തത്. അതുകൊണ്ട് തന്നെ ഈ തൊഴിലിനോട് നമ്മള്‍ കൂറുപുലര്‍ത്തണ്ടേ എന്നും ജയപാലന്‍ പറയുന്നു.

തൃപ്പൂണിത്തുറ മീനാക്ഷി ലോട്ടറീസില്‍ നിന്നും വിറ്റുപോയ Te 645465 എന്ന നമ്പറിനായിരുന്നു ഒന്നാം സമ്മാനം. ഇവിടെ നിന്നാണ് ജയപാലന്‍ ടിക്കറ്റെടുത്തത്. നേരത്തെ ഒമ്പതാം തിയതി 5000 രൂപയുടെ സമ്മാനം ഇദ്ദേഹത്തിന് അടിച്ചിരുന്നു. 10 ന് ആ ടിക്കറ്റ് മാറാനായാണ് പോയത്. അന്ന് അടിച്ച പൈസക്ക് ഒരു ബമ്പറും 5 ടിക്കറ്റ് വേറെയും എടുത്തു. ഫാന്‍സി നമ്പറായി തോന്നിയത് കൊണ്ടാണ് ആ ടിക്കറ്റ് തന്നെയെടുത്തതെന്നും ജയപാലന്‍ കഴിഞ്ഞ ദിവസം പറഞ്ഞിരുന്നു. കുറച്ച് കടമുണ്ട്. അത് തീര്‍ക്കണം. രണ്ട് സിവില്‍ കേസുണ്ട്. അതും തീര്‍ക്കണം. പിന്നെ മക്കളുണ്ട്. പെങ്ങള്‍മാര്‍ക്കും കുറച്ച് പൈസ കൊടുക്കണം. അതൊക്കെ തന്നെയാണ് ആഗ്രഹമെന്നും ജയപാലന്‍ പറഞ്ഞിരുന്നു.