വീട്ടില്‍ കലഹം പതിവ്... ലഹരിക്ക് അടിമ.... കുടുംബ കലഹത്തില്‍ മര്‍ദ്ദനമേറ്റ യുവാവ് മരിച്ചു, പിതാവിനെയും സഹോദരനെയും അറസ്റ്റ് ചെയ്ത് പോലീസ്.

ആലത്തൂര്‍ ചിറ്റിലഞ്ചേരി പാട്ടയില്‍ പാട്ടയില്‍ രതീഷ് (39) ആണ് മരിച്ചത്. തിങ്കളാഴ്ച രാത്രിയാണ് സംഭവം നടന്നത്. 11.15ന് ആശുപത്രിയിലെത്തിച്ചപ്പോഴേക്കും മരിച്ചിരുന്നു. സംഭവത്തില്‍ രതീഷിന്റെ പിതാവ് ബാലന്‍ (69), സഹോദരന്‍ പ്രമോദ് (35) എന്നിവരെ ആലത്തൂര്‍ പൊലീസ് അറസ്റ്റ് ചെയ്തു.

വീട്ടില്‍ ബഹളമുണ്ടാവുന്നത് നിത്യസംഭവമായതിനാല്‍ അയല്‍വാസികള്‍ ഇടപെടാറില്ലായിരുന്നു. തിങ്കളാഴ്ച പകല്‍ രതീഷ് കൊടുവാള്‍കൊണ്ട് പിതാവിനെ ആക്രമിക്കാന്‍ ശ്രമിച്ചതായും രാത്രിയും വീട്ടുകാരുമായും പിതാവ് ബാലനുമായും വഴക്കുണ്ടാക്കിയെന്നും ബാലന്‍ കഴിച്ചുകൊണ്ടിരിക്കെ ഭക്ഷണപാത്രം തട്ടിത്തെറിപ്പിച്ചെന്നും പറയുന്നു.

ബാലന് നേരെ ആക്രമണത്തിന് മുതിര്‍ന്നപ്പോള്‍ സഹോദരന്‍ പ്രമോദ് പിടിച്ചുമാറ്റാന്‍ ചെന്നതായും ഈ സമയം അയാള്‍ക്കെതിരെ തിരിഞ്ഞതായും തുടര്‍ന്നുണ്ടായ അടിപിടിയിലാണ് അവശ നിലയിലായതെന്നുമാണ് പൊലീസ് പറയുന്നത്.

ആഴ്ചയില്‍ ഒന്നിലധികം പ്രാവശ്യം രതീഷിനെതിരെ പൊലീസില്‍ നാട്ടുകാരുടെയും മറ്റും ഫോണ്‍വിളി വരാറുണ്ടെന്നും ആലത്തൂര്‍ സ്‌റ്റേഷനില്‍ രതീഷിനെതിരെ മുമ്പും കേസുണ്ടെന്നും പൊലീസ് പറഞ്ഞു. സംഭവസമയം വീട്ടിലുണ്ടായിരുന്ന സഹോദരി അടുത്തുള്ള വീടുകളിലെത്തി വിവരമറിയിച്ചതിനെ തുടര്‍നന്ന് സമീപവാസികളെത്തിയാണ് രതീഷിനെ ആശുപത്രിയിലെത്തിച്ചത്.

അതേസമയം വീട്ടുകാരോട് രതീഷ് വഴക്കുണ്ടാക്കുക പതിവായിരുന്നെന്ന് നാട്ടുകാര്‍ പൊലീസിനോട് പറഞ്ഞു. രതീഷ് ലഹരി ഉപയോഗിക്കാറുണ്ടായിരുന്നെന്നും പൊലീസിന് വിവരം ലഭിച്ചിട്ടുണ്ട്.