കേരളത്തിലെ സംഘടനാ പ്രശ്നങ്ങള്ക്ക് കാരണം നേതാക്കള് തമ്മിലുള്ള ആശയവിനിമയത്തിലെ പോരായ്മ; ഭാവിയില് പ്രശ്നങ്ങള് ഉണ്ടാകാതിരിക്കാന് നിര്ദേശം നല്കിയതായി എഐസിസി ജനറല് സെക്രട്ടറി തരീഖ് അന്വര്
നേതാക്കള് തമ്മിലുള്ള ആശയവിനിമയത്തിലെ പോരായ്മയാണ് കേരളത്തിലെ സംഘടനാ പ്രശ്നങ്ങള്ക്ക് കാരണമെന്ന് ഹൈക്കമാന്ഡ്. ഭാവിയില് ഇത്തരം പ്രശ്നങ്ങള് ഉണ്ടാകാതിരിക്കാന് നിര്ദേശം നല്കിയതായി കേരളത്തിന്റെ ചുമതലയുള്ള എഐസിസി ജനറല് സെക്രട്ടറി തരീഖ് അന്വര് പ്രതികരിച്ചു.
സെമി കേഡര് സംവിധാനം ഹൈക്കമാന്ഡ് അംഗീകരിച്ചിട്ടില്ലെന്നും, തീരുമാനം ചര്ച്ചകള്ക്ക് ശേഷമെന്നും തരീഖ് അന്വര് കൂട്ടിച്ചേര്ത്തു. എഐസിസി അംഗത്വത്തില് നിന്നുള്ള വി എം സുധീരന്റെ രാജി ഹൈക്കമാന്ഡ് അംഗീകരിച്ചില്ലെന്നും താരിഖ് അന്വര് ദില്ലിയില് പ്രതികരിച്ചു. അതേസമയം, പാര്ട്ടി വിട്ട് പോകുന്നവര്ക്ക് പോകാമെന്നും അദ്ദേഹം നിലപാട് വ്യക്തമാക്കി.
കേരളത്തിലെ കോണ്ഗ്രസ് നേതാക്കള്ക്ക് ഇടയില് ഇപ്പോഴും പ്രശ്നങ്ങള് ഉണ്ടെന്നു തന്നെയാണ് താരിഖ് അന്വറിന്റെ വാക്കുകള് വ്യക്തമാക്കുന്നത്. പുതിയ കെപിസിസി നേതൃത്വത്തിന്റെ പല തീരുമാനങ്ങളും കൂടി ആലോചനകള് ഇല്ലാതെ ഉള്ളതെന്ന സുധീരന് അടക്കമുള്ള മുതിര്ന്ന നേതാക്കളുടെ വാക്കുകള് ശരിവയ്ക്കുന്നതാണ് താരിഖ് അന്വറിന്റെ പ്രതികരണം.
കേരളത്തിലെ പ്രശ്നങ്ങളെക്കുറിച്ച് കോണ്ഗ്രസ് അധ്യക്ഷ സോണിയ ഗാന്ധിക്ക് റിപ്പോര്ട്ട് നല്കേണ്ടതിന്റെ ആവശ്യം നിലവിലില്ലെന്നും, പാര്ട്ടി വിട്ടു പോകുന്നവര് അധികാരവും പദവിയും തേടി പോകുന്നവരെന്നും തരീഖ് അന്വര് കൂട്ടിച്ചേര്ത്തു. സെമി കേഡര് സംവിധാനത്തെ കുറിച്ചും തീരുമാനം കൈകൊണ്ടിട്ടില്ല. കെപിസിസി പുനഃസംഘടന ഒക്ടോബര് അവസാനത്തോടെ പൂര്ത്തിയാക്കുമെന്നും അദ്ദേഹം വ്യക്തമാക്കി.
പുതിയ അധ്യക്ഷനും പുതിയ പ്രതിപക്ഷ നേതാവും വന്നിട്ടും സംസ്ഥാനത്തെ കാര്യങ്ങള് നല്ലരീതിയില് പോകാത്തതില് ഹൈക്കമാന്ഡ് അതൃപ്തിയിലാണ്.എന്നാല് വിഎം സുധീരന്റെ രാജിയിലും നേതൃത്വത്തിനു എതിര് അഭിപ്രായങ്ങള് ഉണ്ട്. അതുകൊണ്ട് തന്നെ രാജികാര്യത്തില് എഐസിസി തീരുമാനം എടുത്തിട്ടില്ല.
https://www.facebook.com/Malayalivartha
