നെടുമങ്ങാട് തൊളിക്കോട് വിതുരയില്‍ ഭാര്യാ പിതാവിനെ മരുമകന്‍ കൊലപ്പെടുത്തിയ കേസിന്റെ വിചാരണ തിരുവനന്തപുരം ആറാം അഡിഷണല്‍ സെഷന്‍സ് കോടതി മുമ്പാകെ തിങ്കളാഴ്ച ആരംഭിക്കും.

നവംബര്‍ 15 മുതല്‍ 20 വരെ വിവിധ തീയതികളിലായി 29 സാക്ഷികള്‍ ഹാജരാകാന്‍ ജഡ്ജി കെ.എന്‍. അജിത്കുമാര്‍ ഉത്തരവിട്ടു. തിങ്കളാഴ്ച മൂന്നു സാക്ഷികളെയാണ് വിസ്തരിക്കുന്നത്.

വിതുര ചേന്നന്‍പാറ പന്നിയോട്ട്മൂല വസന്തവിലാസം വീട്ടില്‍ സുന്ദരനെ (60) ഇരുമ്പ് കത്രിക കൊണ്ട് കുത്തി കൊലപ്പെടുത്തിയെന്നാണ് കേസ്. മരണപ്പെട്ട സുന്ദരന്റെ മകള്‍ പ്രിയയുടെ ഭര്‍ത്താവും പനവൂര്‍ വില്ലേജില്‍ ചുള്ളിമാനൂര്‍ കടുവാച്ചിറ പാറയീവിളാകത്ത് വീട്ടില്‍ സുന്ദരേശന്‍ മകന്‍ വിനോദ് എന്നുവിളിക്കുന്ന രാഗേഷ്(35) ആണ് കേസിലെ പ്രതി. 2017 നവംബര്‍ 18 ലായിരുന്നു കേസിനാസ്പദമായ സംഭവം നടന്നത്. മരണപ്പെട്ട സുന്ദരന്‍ , ഭാര്യ വസന്ത , മകള്‍ പ്രിയ , പ്രതി രാഗേഷ് എന്നിവര്‍ സുന്ദരന്റ വീട്ടിലായിരുന്നു താമസിച്ചിരുന്നത്.


മകളെ പ്രതി രാഗേഷ് നിരന്തരമായി ഉപദ്രവിക്കുന്നത് സുന്ദരന്‍ ചോദ്യം ചെയ്യുമായിരുന്നു. കൃത്യ ദിവസം ഉച്ചയോടു കൂടി വിട്ടിലെത്തിയ പ്രതി ആഹാരം വിളമ്പാന്‍ ഭാര്യ പ്രിയയോട് ആവശ്യപ്പെട്ടിരുന്നു.

ഭക്ഷണം വിളമ്പാന്‍ വൈകിയതില്‍ പ്രതി ഭാര്യയെ ചീത്തവിളിക്കുകയും ദേഹോപദ്രവം ഏല്‍പ്പിക്കുകയും ചെയ്തത് മരണപ്പെട്ട സുന്ദരന്‍ തടസ്സപ്പെടുത്തിയതിനെ തുടര്‍ന്ന് സുന്ദരനും പ്രതിയും തമ്മില്‍ വാക്കേറ്റത്തില്‍ ഏര്‍പ്പെടുകയും പ്രതി തന്റെ അലമാരയില്‍ സൂക്ഷിച്ചിരുന്ന ഇരുമ്പ് കത്രിക ഉപയോഗിച്ച് പ്രിയയുടെയും സുന്ദരന്റെ ഭാര്യ വസന്തയുടെയും കണ്‍മുന്നില്‍ വച്ച് സുന്ദരനെ കുത്തി കൊലപ്പെടുത്തുകയായിരുന്നു.


വീട്ടുകാരുടെ നിലവിളിയെ തുടര്‍ന്ന് നാട്ടുകാര്‍ ഓടിക്കൂടിയപ്പോള്‍ പ്രതി ഓടി രക്ഷപ്പെടുകയായിരുന്നു. ക്യത്യം കഴിഞ്ഞ് മൂന്നാം ദിവസം വിതുര പോലീസ് പ്രതിയെ കസ്റ്റഡിയിലെടുത്തു.

പ്രതി ഇപ്പോഴും ജുഡീഷ്യല്‍ കസ്റ്റഡിയിലാണ്. കൊല്ലപ്പെട്ട സുന്ദരന്റെ ഭാര്യ വസന്ത, മകള്‍ പ്രിയ, മകന്‍ പ്രദീപ് എന്നിവര്‍ കേസിലെ ഒന്നുമുതല്‍ മൂന്നു വരെ സാക്ഷികളാണങ്കിലും മകന്‍ പ്രദീപ് 2020 ല്‍ മരണപ്പെട്ടു.