മലയാള താരസംഘടനയായ അമ്മയില്‍നിന്ന് രാജി വച്ചതിന് തൊട്ടുപിന്നാലെ സംഘടനയുടെ പ്രവര്‍ത്തനങ്ങളെയും നിലപാടുകളെയും രൂക്ഷമായി വിമര്‍ശിച്ച് മുതിര്‍ന്ന നടി മല്ലികാ സുകുമാരന്‍. സോഷ്യല്‍ മീഡിയയില്‍ പങ്കുവച്ച കുറിപ്പിലൂടെയായിരുന്നു താരത്തിന്റെ വിമര്‍ശനം. ഇംഗ്ലീഷ് ഭാഷയിലാണ് താരം കുറിപ്പ് പങ്കുവച്ചത്.

കേരള സര്‍ക്കാരിന്റെ ബഡ്ജറ്റ് തീരുമാനങ്ങളുടെ പശ്ചാത്തലത്തില്‍ 'അമ്മ' എങ്ങനെയാണ് പ്രവര്‍ത്തിക്കേണ്ടിയിരുന്നതെന്ന് വിശദീകരിക്കുന്നതാണ് കുറിപ്പ്. ബഡ്ജറ്റിലെ പ്രഖ്യാപനങ്ങള്‍ ഫലപ്രദമായി ഉപയോഗിച്ച് സിനിമാ മേഖലയെ മെച്ചപ്പെടുത്തുന്നതിന് കൃത്യമായ നിര്‍ദേശങ്ങള്‍ മുന്നോട്ട് വയ്ക്കുന്ന കുറിപ്പ് വലിയ കൈയ്യടികളോടൊണ് പ്രേക്ഷകര്‍ സ്വീകരിക്കുന്നത്.

അമ്മയ്ക്ക് ഒരു സുവര്‍ണ്ണാവസരമുണ്ടായിരുന്നെന്നും പക്ഷേ അത് വളര്‍ച്ചയ്ക്കുപകരം പരദൂഷണമാണ് തിരഞ്ഞെടുത്തതെന്നാണ് മല്ലികാ സുകുമാരന്‍ സോഷ്യല്‍ മീഡിയയില്‍ എഴുതിയത്. മലയാളസിനിമ 75 വര്‍ഷമായി കാത്തിരുന്ന കാര്യമാണ് ഈ ബഡ്ജറ്റിലൂടെ യാഥാര്‍ത്ഥ്യമായിരിക്കുന്നതെന്നും മല്ലികാ സുകുമാരന്‍ പറയുന്നു.

ബജറ്റില്‍ സിനിമാമേഖലയ്ക്ക് വ്യവസായ പദവി പ്രഖ്യാപിച്ച സാഹചര്യത്തില്‍ വികസനകാര്യങ്ങള്‍ ചര്‍ച്ചചെയ്യുന്നതിന് പകരം വ്യക്തിപരമായ പ്രശ്‌നങ്ങളും തമ്മിത്തല്ലുമാണ് അമ്മയില്‍ നടന്നതെന്നും മല്ലികാ സുകുമാരന്‍ കുറ്റപ്പെടുത്തി. വ്യവസായ പദവി എന്നത് ഒരു ട്രോഫിയല്ലെന്നും അതൊരു ഉത്തരവാദിത്തമാണെന്നും മല്ലികാ സുകുമാരന്‍ കുറിച്ചു.