അതീവ സുരക്ഷാ മേഖലയായ കൊച്ചി കപ്പല്‍ശാലയില്‍ രാജ്യവിരുദ്ധ സന്ദേശം കണ്ടെത്തിയ സംഭവം അതീവ ഗൗരവത്തോടെ കേന്ദ്ര ഇന്റലിജന്‍സ് ഏജന്‍സികള്‍ പരിശോധിക്കുന്നു. നിര്‍മാണത്തിലിരിക്കുന്ന കപ്പലിന്റെ ഭിത്തിയില്‍ 'ഐ ലവ് പാക്കിസ്ഥാന്‍' എന്ന് കോറിയിട്ട നിലയില്‍ കണ്ടെത്തിയത് ആസൂത്രിതമായ നുഴഞ്ഞുകയറ്റത്തിന്റെ ലക്ഷണമാണോ എന്ന സംശയമാണ് സുരക്ഷാ വിഭാഗങ്ങള്‍ ഉയര്‍ത്തുന്നത്. രാജ്യത്തിന്റെ പരമാധികാരത്തെ വെല്ലുവിളിക്കുന്ന ഈ നീക്കം വലിയ സുരക്ഷാ വീഴ്ചയായാണ് വിലയിരുത്തപ്പെടുന്നത്.

സംഭവത്തില്‍ ഭാരതീയ ന്യായസംഹിതയിലെ 152-ാം വകുപ്പ് (രാജ്യദ്രോഹം) പ്രകാരം കേസെടുത്ത് അന്വേഷണം ഊര്‍ജിതമാക്കിയിട്ടുണ്ടെങ്കിലും, പ്രതികള്‍ ആരാണെന്നതില്‍ ഇതുവരെ വ്യക്തത വന്നിട്ടില്ല. കപ്പല്‍ശാലയുടെ സുരക്ഷാ സംവിധാനങ്ങളെ നോക്കുകുത്തിയാക്കി ഇത്തരം ഒരു സന്ദേശം എഴുതാന്‍ കഴിഞ്ഞു എന്നത് ഗൗരവമേറിയ അന്വേഷണത്തിന് വഴിയൊരുക്കിയിരിക്കുകയാണ്. തന്ത്രപ്രധാനമായ സ്ഥാപനത്തില്‍ ചാരന്മാര്‍ നുഴഞ്ഞുകയറി നിരീക്ഷണം നടത്തുന്നുണ്ടോ എന്ന് സംശയിക്കേണ്ടിയിരിക്കുന്നുവെന്ന് സുരക്ഷാ വിദഗ്ധര്‍ ചൂണ്ടിക്കാട്ടുന്നു.

യുകെയിലെ നോര്‍ത്ത് സ്റ്റാര്‍ ഷിപ്പിങ്ങിനായി നിര്‍മിക്കുന്ന കപ്പലിലാണ് വിദ്വേഷ സന്ദേശം പതിഞ്ഞത്. സിസിടിവി ക്യാമറകള്‍ ഇല്ലാത്ത നിര്‍മാണ മേഖലയില്‍ വെച്ചാണ് ഇത് സംഭവിച്ചത് എന്നത് സുരക്ഷാ പാളിച്ചകളുടെവ്യാപ്തി വര്‍ധിപ്പിക്കുന്നു. ഫെബ്രുവരി 25-നും ജൂണ്‍ 10-നും ഇടയിലുള്ള കാലയളവില്‍ ഇത് നടന്നുവെന്നാണ് നിഗമനം. ഈ കാലയളവില്‍ കപ്പല്‍ശാലയില്‍ ജോലി ചെയ്ത കരാര്‍ ജീവനക്കാരും താത്കാലിക തൊഴിലാളികളും ഉള്‍പ്പെടെയുള്ളവരുടെ വിവരങ്ങള്‍ സമഗ്രമായി പരിശോധിക്കാനാണ് തീരുമാനം.

പ്രത്യേക അന്വേഷണ സംഘം രൂപീകരിച്ച് മുന്നോട്ട് പോകുമ്പോള്‍, കപ്പല്‍ശാലയിലെ മുഴുവന്‍ ജീവനക്കാരുടെയും പശ്ചാത്തല പരിശോധന വീണ്ടും നടത്താന്‍ നിര്‍ദ്ദേശം നല്‍കിയിട്ടുണ്ട്.