'പറഞ്ഞുവന്നത് എന്റെ കൈപ്പുണ്യത്തെക്കുറിച്ചാണ്, ഞാന് ദീപം കൊളുത്തിയത് കൊണ്ടാണത്രേ സിനിമ വന് ഹിറ്റായത് എന്ന് ഞാന് തന്നെ പ്രചരിപ്പിക്കുന്നുമുണ്ട്. അതിനാല് പ്രിയപ്പെട്ടവരെ ഇത് ഒരന്ധവിശ്വാസമാക്കി പ്രചരിപ്പിച്ച് എന്നെ ഇനിയും ഭദ്രദീപം കൊളുത്തുവാന് വിളിക്കുക...'കനകം കാമിനി കലഹം എന്ന ചിത്രത്തിന്റെ അണിയറ പ്രവര്ത്തകരെ അഭിനന്ദിച്ച് നടന് ജോയ് മാത്യു.
കഴിഞ്ഞ ദിവസം ഒടിടി വഴി റിലീസ് ആയ 'കനകം കാമിനി കലഹം' എന്ന ചിത്രത്തിന് മികച്ച പ്രേക്ഷക പിന്തുണയാണ് ലഭിക്കുന്നത്. ഇപ്പോഴിതാ ചിത്രത്തിന്റെ അണിയറ പ്രവര്ത്തകരെ അഭിനന്ദിച്ച് നടന് ജോയ് മാത്യു രംഗത്ത് എത്തിയിരിക്കുകയാണ്. ലൈംഗിക ചുവയും ദ്വയാര്ത്ഥ പ്രയോഗങ്ങളുമാണ് കോമഡി എന്ന് തെറ്റിദ്ധരിച്ചിരുന്ന പ്രേക്ഷകരെ യഥാര്ത്ഥ കോമഡിയും ദാമ്പത്യ ജീവിതത്തിലെ യാഥാര്ത്ഥ്യവും ബോദ്ധ്യപ്പെടുത്തുന്ന ഒരു ക്ലാസിക് ആയി ചിത്രം മാറിയെന്നും അദ്ദേഹം അഭിപ്രായപ്പെടുകയുണ്ടായി. ഫേസ്ബുക്ക് കുറിപ്പിലൂടെയാണ് താരം രംഗത്തെത്തിയിരിക്കുന്നത്.
സിനിമയുടെ തുടക്കത്തില് തന്നെ താന് ദീപം തെളിയിച്ചതിനെക്കുറിച്ചും അദ്ദേഹം കുറിപ്പില് പറയുന്നുണ്ട്. താന് വിളക്ക് കൊളുത്തിയത് കൊണ്ടാണ് ചിത്രം വന് ഹിറ്റായതെന്ന് താന് തന്നെ പ്രചരിപ്പിക്കുന്നുണ്ടെന്നും അദ്ദേഹം തമേശ രൂപേണ കുറിക്കുകയുണ്ടായി.
ഫേസ്ബുക്ക് പോസ്റ്റിന്റെ പൂര്ണ്ണരൂപം;
ചില കൈപ്പുണ്യങ്ങള്
കഠിനമായ കൊറോണക്കാലത്ത് മുപ്പത് ദിവസം ഒരേ ഹോട്ടലില് ഒരേ മുറിയില് ഒരുമിച്ചു താമസിച്ചു സൃഷ്ടിച്ചെടുത്ത ഒരു കലാസൃഷ്ടിയുടെ ആരംഭത്തിനു വിളക്ക് കൊളുത്തുവാന് നിര്മാതാവും നായകനുമായ നിവിന് പൊളിയും രതീഷ് ബാലകൃഷ്ണന് പൊതുവാളും നിര്ബന്ധിച്ചപ്പോള് ഞാനാ കടുംകൈ ചെയ്തു -തുടര്ന്നുള്ള ഓരോ ദിവസങ്ങളിലും ചിത്രീകരണത്തിലേ പുരോഗതിയും സംവിധായകന്റെ സര്ഗ്ഗാത്മകതയും സഹപ്രവര്ത്തകരുടെ ആവേശവും കണ്ടറിഞ്ഞപ്പോള് എനിക്കുറപ്പായി ഇത് കാലത്തെ കവച്ചുവെക്കുന്ന ഒരു സൃഷ്ടിയായിരിക്കുമെന്ന് -ഇപ്പോഴിതാ ദിവസവും സന്ദേശങ്ങള് വരുന്നു ,അധികവും ഞാന് കരയുന്നത് കണ്ടു ചിരിച്ചവര് അയക്കുന്നതാണ് - ഒരു നടന് എന്ന നിലയില് അത് എനിക്ക് നല്കുന്ന ഊര്ജ്ജം വലുതാണ് -
ലൈംഗിക ചുവയും ദ്വയാര്ത്ഥ പ്രയോഗങ്ങളുമാണ് കോമഡി എന്ന് പ്രേക്ഷകരെ തെറ്റിദ്ധരിച്ചിരുന്ന പ്രേക്ഷകരെ യഥാര്ത്ഥ കോമഡിയും ദാമ്ബത്യ ജീവിതത്തിലെ യാഥാര്ഥ്യവും ബോധ്യപ്പെടുത്തുന്ന ഒരു ക്ലാസ്സിക് ആയി മാറി കനകം കാമിനി കലഹം എന്നാണ് ദിവസവും വരുന്ന റിപ്പോര്ട്ടുകള് സൂചിപ്പിക്കുന്നത് . ഇത്തരം ഒരു വെല്ലുവിളി ഏറ്റെടുക്കാന് ധൈര്യം കാണിച്ച നിവിന് പോളിക്കും സംവിധായകന് രതീഷിനും സഹപ്രവര്ത്തകര്ക്കും ഛായാഗ്രാഹകന് വിനോദ് ഇല്ലം പള്ളിക്കും മറ്റു എല്ലാ അണിയറശില്പികള്ക്കും നന്ദി .
പറഞ്ഞുവന്നത് എന്റെ കൈപ്പുണ്യത്തെക്കുറിച്ചാണ്, ഞാന് ദീപം കൊളുത്തിയത് കൊണ്ടാണത്രേ സിനിമ വന് ഹിറ്റായത് എന്ന് ഞാന് തന്നെ പ്രചരിപ്പിക്കുന്നുമുണ്ട്. അതിനാല് പ്രിയപ്പെട്ടവരെ ഇത് ഒരന്ധവിശ്വാസമാക്കി പ്രചരിപ്പിച്ച് എന്നെ ഇനിയും ഭദ്രദീപം കൊളുത്തുവാന് വിളിക്കുക. പ്രതിഫലം ആരും കാണാതെ പോക്കറ്റിലിട്ടു തന്നാല് നിങ്ങള്ക്ക് വിജയം ഉറപ്പ്.
https://www.facebook.com/Malayalivartha
