ഓടിക്കൊണ്ടിരുന്ന കാറിന് തീപിടിച്ചു. പാലക്കാട് മലമ്പുഴ ഡാം ഉദ്യാന സന്ദര്‍ശനം കഴിഞ്ഞു മടങ്ങുകയായിരുന്ന കുടുംബത്തിന്റെ കാര്‍ ആയിരുന്നു മന്തക്കാട് ജംങ്ങ്ഷനില്‍ വെച്ച്‌ തീപ്പിടിച്ചത്.

ഇന്ന് വൈകിട്ടായിരുന്നു സംഭവം. തേങ്കുറിശി, വിളയന്‍ചാത്തന്നൂര്‍ പത്മാഞ്ജനത്തില്‍ വിജയകുമാറിന്റെ ഹോണ്ട മൊബിലിയോ കാറിനാണ് ഓടികൊണ്ടിരിക്കുമ്പോള്‍ തീപ്പിടിച്ചത്.

കാറിനു പുറകിലായി വന്നിരുന്ന ഓട്ടോറിക്ഷ ഡ്രൈവറാണ് കാറില്‍ പുകയുയരുന്നത് കണ്ടത്. മന്തക്കാട് കവലയിലുണ്ടായിരുന്നവര്‍ ബഹളം വെച്ച്‌ കാര്‍ നിര്‍ത്തിക്കുകയായിരുന്നു. കാറിലുണ്ടായിരുന്ന യാത്രക്കാര്‍ സുരക്ഷിതരായി പുറത്തിറങ്ങിയതിന് ശേഷമാണ് തീ ആളിപ്പടര്‍ന്നത്.

ബോണറ്റിനുള്ളില്‍ നിന്ന് തീപ്പടര്‍ന്നതാണ് കാരണം. കാറിന്‍്റെ എഞ്ചിന്‍ഭാഗം പൂര്‍ണ്ണമായും കത്തിനശിച്ചു. സമീപത്തുണ്ടായിരുന്നവര്‍ സമീപത്തെ കനാലില്‍ നിന്നും വെള്ളം കോരിയൊഴിച്ചാണ് തീ കെടുത്തിയത്. മലമ്ബുഴ പോലീസും, അഗ്നിശമന സേനാ ഉദ്യോഗസ്ഥരും സ്ഥലത്തെത്തി. വാഹനത്തില്‍ വിജയകുമാറിനോടൊപ്പം ഭാര്യയും മക്കളും അമ്മയും, ചെറിയമ്മയുമാണ് ഉണ്ടായിരുന്നത്.