മൂന്നുപെൺക്കുട്ടികൾ ഒന്നിച്ച് കൈ കോർത്ത് നടന്ന് നീങ്ങുന്നു ... അതിൽ രണ്ടുപ്പേരെ കാണ്മാനില്ല....സിസിടിവി ക്യാമറാ ദൃശ്യങ്ങളിൽ പെൺകുട്ടികൾക്ക് ഭയമോ അങ്കലാപ്പോ ഒന്നുമില്ല... പത്താം ക്ലാസ്, പ്ലസ്ടു വിദ്യാർത്ഥികളായ പെൺകുട്ടികളെ കാണാതായ സംഭവത്തിൽ ദുരൂഹത തുടരുന്നു.

ഓൺലൈൻ ക്ലാസിനു ശേഷം കാണാതായ പെൺകുട്ടികളെ കണ്ടെത്തുന്നതിനായി പൊലീസ് സംഘം അന്വേഷണം ആരംഭിച്ചിട്ടുണ്ട്. പെൺകുട്ടികൾ നാഗമ്പടം ബസ് സ്റ്റാൻഡിലും, റെയിൽവേ സ്റ്റേഷനിലും എത്തിയതായി പൊലീസ് കണ്ടെത്തിയിട്ടുണ്ട്. എന്നാൽ, ഇവിടെ നിന്നും എങ്ങോട്ട് പോയി എന്ന കാര്യത്തിലാണ് ദുരൂഹത തുടരുന്നത്.

അച്ഛനുമമമ്മയും ജോലിയ്ക്കു പോയി; കുട്ടികൾ വീടു വിട്ടു പോയി

മാതാപിതാക്കൾ വെള്ളിയാഴ്ച ജോലിയ്ക്കു പോയപ്പോഴാണ് പെൺകുട്ടികളെ കാണാതാകുന്നത്. രാവിലെ മാതാവും പിതാവും ജോലിയ്ക്കായി പോയപ്പോൾ കുട്ടികൾ വീട്ടിലുണ്ടായിരുന്നു. അവധിയായതിനാൽ ഇരുവരും ക്ലാസിൽ പങ്കെടുത്തിരുന്നില്ല. വൈകിട്ട് മാതാപിതാക്കൾ വീട്ടിലെത്തി നോക്കിയപ്പോഴാണ് പെൺകുട്ടികളെ രണ്ടു പേരെയും കാണാനില്ലെന്നു കണ്ടെത്തിയത്. തുടർന്നു, ഇവർ പൊലീസിൽ പരാതി നൽകുകയായിരുന്നു. പരാതിയുടെ അടിസ്ഥാനത്തിൽ പൊലീസ് സംഘം കേസെടുത്ത് അന്വേഷണം നടത്തി.

വില്ലനായത് മൊബൈൽ ഫോണോ?

പെൺകുട്ടികളെ കാണാതായതിനു പിന്നിൽ മൊബൈൽ ഫോണിന്റെ ഇടപെടലും തള്ളിക്കളയാനാവില്ല. പെൺകുട്ടികളെ വെള്ളിയാഴ്ച വൈകിട്ടോടെയാണ് കാണാതായിരിക്കുന്നത്. ഈ സമയം കുട്ടികളുടെ കയ്യിൽ മൊബൈൽ ഫോണുണ്ടായിരുന്നു. എന്നാൽ, കുട്ടികളെ കാണാതായതിനു ശേഷം ഫോൺ സ്വിച്ച് ഓഫ് ആകുകയായിരുന്നു. ഈ സാഹചര്യത്തിൽ ഇരുവരെയും കാണാതായതിന്റെ ദുരൂഹതയാണ് പൊലീസിനെ കുഴക്കുന്നത്.

അവസാനം കണ്ടത് റെയിൽവേ സ്റ്റേഷനിൽ

പെൺകുട്ടികളെ അവസാനം കണ്ടത് റെയിൽവേ സ്‌റ്റേഷനിലാണെന്നു പൊലീസ് കണ്ടെത്തിയിട്ടുണ്ട്. ഇതിനു ശേഷം പെൺകുട്ടികളെപ്പറ്റി പൊലീസിനു വിവരമൊന്നും ലഭിച്ചില്ല. പെൺകുട്ടികളെ റെയിൽവേ സ്റ്റേഷനിൽ കണ്ടെത്തിയതിനെ തുടർന്നു പൊലീസ് പ്രദേശത്തെ സിസിടിവി ക്യാമറകൾ പൊലീസ് പരിശോധിച്ചിരുന്നു. ഇവിടെ നിന്നു പെൺകുട്ടികളുടെ ദൃശ്യങ്ങൾ പൊലീസിനു ലഭിച്ചിട്ടുണ്ട്.

ഇവർക്കൊപ്പം ഈ സമയത്ത് മറ്റൊരു പെൺകുട്ടി കൂടി ഉണ്ടായിരുന്നു. ഇതേ തുടർന്നു പൊലീസ് സംഘം ഈ പെൺകുട്ടിയെ കണ്ടെത്തി ചോദ്യം ചെയ്തിരുന്നു. കാണാതായ പെൺകുട്ടികളുടെ ബന്ധുവായ പെൺകുട്ടി തന്നെയാണ് നാഗമ്പടം ബസ് സ്റ്റാൻഡിൽ വച്ച് ഇരുവരുടെയും കൂടെ ഉണ്ടായിരുന്നത് . എന്നാൽ, പെൺകുട്ടികൾ എവിടെ പോയതാണ് എന്ന് അറിയില്ലെന്നാണ് ഈ പെൺകുട്ടി പോലീസിനോട് പറഞ്ഞിരിക്കുന്നത് .ഏതായാലും പോലീസ് അന്വേഷണം ഊർജ്ജിതമാക്കിയിട്ടുണ്ട്.