കൊല്ലത്ത് ആള്‍താമസമില്ലാത്ത വീടിന്റെ പിന്‍ഭാഗത്ത് നട്ടു വളര്‍ത്തിയ കഞ്ചാവ് ചെടികള്‍ എക്‌സൈസ് പിടികൂടി. നീല ചടയന്‍ ഇനത്തിലെ കഞ്ചാവ് ചെടിക്ക് 8 അടി ഉയരം ഉണ്ടായിരുന്നു. ഗതാഗത കുരുക്കിനിടയില്‍ യാത്രക്കാരന്റെ കണ്ണില്‍ പെട്ടതായിരുന്നു ഇത്.

കൊല്ലം രണ്ടാം കുറ്റിയില്‍ പ്രതീക്ഷാ നഗറില്‍ താമസമില്ലാത്ത വീടിന്റെ പിന്‍ഭാഗത്ത് അടുക്കള വാതിലിന്റെ സമീപത്താണ് ആരൊ നട്ടുവളര്‍ത്തുന്ന രണ്ട് കഞ്ചാവ് ചെടികള്‍കണ്ടെത്തിയത്. ഒന്നിന് 8 അടിയും, മറ്റൊന്നിന് 5 അടിയോളവും ഉയരം വരും.

6 മാസത്തെ വളര്‍ച്ചയുമുണ്ട്. കഞ്ചാവ് കണ്ടെത്തിയ വീടിന് മുന്നിലെ വീതികുറഞ്ഞ റോഡില്‍ ഗതാഗത കുരുക്കുണ്ടായി. ഈ സമയം വളര്‍ന്നു നില്‍ക്കുന്ന കഞ്ചാവ് ചെടിയുടെ ഇതള്‍ ഒരു യാത്രകാരന്റെ ശ്രദ്ധയില്‍പ്പെട്ടു.

നാട്ടുകാര്‍ ഇതറിഞ്ഞതോടെ പൊലീസിനേയും എക്‌സൈസിനേയും വിവരം അറിയിക്കുകയായിരുന്നുവെന്ന് ഡിവിഷന്‍ കൗണ്‍സിലര്‍ സന്തോഷ് പറഞ്ഞു. കൊല്ലം ഡെപ്പ്യൂട്ടി കമ്മീഷണര്‍ ബി സുരേഷിന്റെ നേതൃത്വത്തില്‍ കഞ്ചാവ് പിടിച്ചെടുത്തു.