പെരിയ ഇരട്ടക്കൊലക്കേസിലെ കൊലയാളികളെ രക്ഷിക്കാന്‍ നികുതിപ്പണം ധൂര്‍ത്തടിച്ച ഇടത് സര്‍ക്കാര്‍ മാപ്പു പറയണമെന്ന് കെ.പി.സി.സി അധ്യക്ഷന്‍ കെ. സുധാകരന്‍. സമൂഹത്തോട് ബഹുമാനവും പ്രതിബദ്ധതയുമുള്ള ഒരു സര്‍ക്കാറാണെങ്കില്‍ യഥാര്‍ഥ പ്രതികളെ പിടിക്കാനായുള്ള അന്വേഷണം തടയാന്‍ സുപ്രീംകോടതി വരെ പോയി ഖജനാവിലെ പണം ധൂര്‍ത്തടിക്കില്ല. എ.കെ.ജി മന്ദിരത്തില്‍ നിന്നോ അഴീക്കോടന്‍ മന്ദിരത്തില്‍ നിന്നോ കൊണ്ടുവരുന്ന കാശല്ല ചെലവഴിക്കുന്നത്. മന്ത്രിമാരുടെ വീടുകളില്‍ നിന്ന് കൊണ്ടുവരുന്ന പണമല്ല. സാധാരണക്കാരുടെ നികുതിപ്പണമാണ്. കൊലയാളികളെ രക്ഷിക്കാന്‍ നികുതിപ്പണം ചെലവിട്ട സര്‍ക്കാര്‍ കേരള സമൂഹത്തോട് മാപ്പു പറയണം -സുധാകരന്‍ പറഞ്ഞു.

സി.ബി.ഐ അന്വേഷണത്തിലൂടെ കേസില്‍ നീതി കിട്ടുമെന്നാണ് പ്രതീക്ഷ. സി.പി.എമ്മിന്‍റെ ലോക്കല്‍ കമ്മിറ്റി സെക്രട്ടറി ഉള്‍പ്പെടെ പ്രതിയാണ്. പകല്‍ പോലെ വ്യക്തമായ കാര്യങ്ങളാണ് നടന്നത്. കൊല നടന്ന ശേഷം പ്രതികള്‍ പാര്‍ട്ടി ഓഫിസില്‍ തമ്ബടിച്ചതൊക്കെ നൂറുകണക്കിനാളുകള്‍ കണ്ടതാണ്. ജനം കണ്ടുനിന്ന കാര്യങ്ങളാണ് നടന്നത്. അങ്ങനെയൊരു കൊലപാതകമാണ് കേരളത്തിലെ പൊലീസിനെ കൊണ്ട് അന്വേഷിപ്പിച്ച്‌ ഇല്ലാതാക്കാന്‍ നാണംകെട്ട സര്‍ക്കാര്‍ ശ്രമിച്ചത്.

വലിയ ഗൂഢാലോചനയുടെ ഫലമാണ് പെരിയ ഇരട്ടക്കൊല. താഴെത്തട്ടിലെ പ്രവര്‍ത്തകര്‍ ചെയ്തതല്ല. സി.പി.എമ്മിന്‍റെ കോട്ടകൊത്തളത്തില്‍ രാഷ്ട്രീയപ്രവര്‍ത്തനം നടത്തിയ രണ്ട് കുട്ടികള്‍ നിലനില്‍ക്കുന്നത് അപകടമാണെന്ന് കണ്ടാണ് ഇല്ലാതാക്കിയത്. അറസ്റ്റ് ഇവിടെയൊന്നും നില്‍ക്കില്ല. ഇനിയും മുകളിലോട്ട് പോകും. അപ്പോഴാണ് യഥാര്‍ഥ പ്രതി ആരാണെന്ന് ഈ നാട് മനസിലാക്കുകയെന്നും സുധാകരന്‍ പറഞ്ഞു.