സര്‍ക്കാര്‍ ജീവനക്കാര്‍ക്ക് ഈ വര്‍ഷം ലീവ് സറണ്ടറില്ല.... സര്‍ക്കാര്‍ ജീവനക്കാരുടെ ഏണ്‍ഡ് ലീവ് സറണ്ടര്‍ ആനുകൂല്യം മരവിപ്പിച്ച നടപടി 2022 മാര്‍ച്ച് 31വരെ നീട്ടി സര്‍ക്കാര്‍ ഉത്തരവിറക്കി.

കൊവിഡ് മൂലമുള്ള സാമ്പത്തിക പ്രതിസന്ധി കണക്കിലെടുത്താണിതെന്ന് ധനകാര്യ അഡിഷണല്‍ ചീഫ് സെക്രട്ടറി ആര്‍.കെ. സിംഗിന്റെ ഉത്തരവില്‍ സൂചിപ്പിച്ചു. ലാസ്റ്റ് ഗ്രേഡ്, പാര്‍ട്ട് ടൈം ജീവനക്കാരെ ഇതില്‍ നിന്ന് ഒഴിവാക്കിയിട്ടുണ്ട്.

കൊവിഡ് മൂലം ഇത് മൂന്നാം തവണയാണ് ലീവ് സറണ്ടര്‍ ആനുകൂല്യം തുടര്‍ച്ചയായി മരവിപ്പിക്കുന്നത്. കഴിഞ്ഞ വര്‍ഷം ആദ്യം ലീവ് സറണ്ടര്‍ തുക പി.എഫില്‍ ലയിപ്പിച്ചിരുന്നു. അതിന് ശേഷം 2020 നവംബര്‍ 15നും 2021 ജൂലായ് 26നും തുടര്‍ന്ന് ഇന്നലെയും ലീവ് സറണ്ടര്‍ ആനുകൂല്യം മരവിപ്പിച്ചു.

ജൂലായില്‍ ഇറക്കിയ ഉത്തരവില്‍ നവംബര്‍ 30 വരെയാണ് മരവിപ്പിച്ചിരുന്നത്. അതിന്റെ കാലാവധി തീര്‍ന്നതിന് പിന്നാലെയാണ് ഇന്നലെ വീണ്ടും ഉത്തരവിറക്കിയത്.

ഒരു വര്‍ഷത്തെ അവകാശപ്പെട്ട അവധിയില്‍ ഉപയോഗിക്കാത്ത മുപ്പത് ദിവസത്തെ അവധിയാണ് സറണ്ടര്‍ ചെയ്ത് പണം വാങ്ങുന്നത്. ഇത് ഒരു മാസത്തെ ശമ്പളത്തിന് തുല്യമായ തുകയാണ് ലീവ് സറണ്ടറായി കിട്ടുന്നത്.