കേരളത്തിലെ ഏറ്റവും നല്ല ഫാർമർ പ്രൊഡ്യൂസർ കമ്പനി മയ്യിൽ പഞ്ചായത്തിലേതാണ് - മയ്യിൽ റൈസ് പ്രൊഡ്യൂസർ കമ്പനിയാണെന്ന് ഡോ.തോമസ് ഐസക്ക്. അദ്ദേഹത്തിന്റെ കുറിപ്പിന്റെ പൂർണ്ണ രൂപം ഇങ്ങനെ; കേരളത്തിലെ ഏറ്റവും നല്ല ഫാർമർ പ്രൊഡ്യൂസർ കമ്പനി മയ്യിൽ പഞ്ചായത്തിലേതാണ് - മയ്യിൽ റൈസ് പ്രൊഡ്യൂസർ കമ്പനി.

രാജ്യത്തെ 20 കർഷക കൂട്ടായ്മകളുമായി പ്രധാനമന്ത്രി നടത്തിയ സംവാദത്തിലേയ്ക്ക് കേരളത്തിൽ നിന്നു തെരഞ്ഞെടുക്കപ്പെട്ട ഏക സംരംഭകരാണ് മയ്യിൽ റൈസ് പ്രൊഡ്യൂസേഴ്സ്. നബാർഡ് ഗ്രേഡിംഗിൽ ഏറ്റവും ഉയർന്ന എ ഗ്രേഡിലാണ് കമ്പനി.

2017-ലാണ് പ്രൊഡ്യൂസർ കമ്പനി രൂപംകൊണ്ടത്. അതിനുശേഷം നെൽ വിസ്തൃതി 300 ഹെക്ടറിൽ നിന്നും 583 ഹെക്ടറായി വർദ്ധിച്ചു. ഉൽപ്പാദനക്ഷമത 2154 കിലോഗ്രാം / ഹെക്ടറിൽ നിന്ന് 4320 കിലോഗ്രാം / ഹെക്ടറായി ഉയർന്നു. മൊത്തം നെല്ല് ഉൽപ്പാദനം 646 ടണ്ണിൽ നിന്ന് 2518 ടണ്ണായി ഉയർന്നു.

എന്താണ് വിജയരഹസ്യം?
അടിത്തറയിട്ടത് ജനകീയാസൂത്രണകാലം മുതലുള്ള തരിശുപാടങ്ങളിൽ കൃഷിയിറക്കാനുള്ള പ്രോജക്ടുളാണ്. ജെയിംസ് മാത്യു എംഎൽഎയുടെ നീർത്തടവികസന പരിപാടി പുതിയൊരു സുസ്ഥിര അടിത്തറ നൽകി. 10 വീതം കൃഷിക്കാരുടെ സൂക്ഷ്മ കൂട്ടായ്മകളുടെയും വാർഡുതലത്തിലുള്ള കൂട്ടായ്മകളുടെയും ശൃംഖല സൃഷ്ടിക്കപ്പെട്ടു.

ആലപ്പുഴയിലെ ജോയ് സെബാസ്റ്റ്യന്റെ സഹായത്തോടെ മയ്യിലെ പഞ്ചായത്തുകളെ ബന്ധിപ്പിച്ചുകൊണ്ട് സൃഷ്ടിച്ച വീഡിയോ കോൺഫറൻസിംഗും ക്ലസ്റ്ററുകളുടെ രൂപീകരണത്തിന് ഏറെ സഹായകരമായി. ആസൂത്രണ ബോർഡിൽ നിന്ന് കൃഷിയുടെ ചീഫ് ഡോ. നാഗേഷ് തുടക്കം മുതൽ തളിപ്പറമ്പ് വികസന പരിപാടിയുടെ സഹായിയായി ഉണ്ടായിരുന്നു.

മയ്യിൽ റൈസ് പ്രൊഡ്യൂസർ കമ്പനിയുടെ മറ്റൊരു സവിശേഷത ശാസ്ത്രീയ കാർഷിക കൃഷി പരിപാലനത്തിനു നൽകിയ പ്രാധാന്യമാണ്. കാർഷിക സർവ്വകലാശാല, കെസിപിഎം മങ്കൊമ്പ്, കൃഷി വിജ്ഞാന കേന്ദ്രം തുടങ്ങിയവരുടെയെല്ലാം സജീവപങ്കാളിത്തം മയ്യിൽ ഉണ്ടായിരുന്നു. ആദ്യം നെല്ല് പോഷകപരിപാലന പാക്കേജ്. അതിനെത്തുടർന്ന് നെൽകൃഷിക്കുള്ള സ്റ്റാൻഡേർഡ് ഓപ്പറേഷൻ പ്രോട്ടോക്കോൾ.

ഇവയെക്കുറിച്ച് കൃഷിക്കാരെ ബോധവൽക്കരിച്ചു. മയ്യിൽ നിന്നുള്ള ഒരു സംഘത്തെ മങ്കൊമ്പിൽ വിട്ടു പരിശീലിപ്പിച്ചു. ഇതോടൊപ്പം നെൽകൃഷിയുടെ യന്ത്രവൽക്കരണവും കൊണ്ടുവന്നു. ട്രാക്ടർ,മിനി ട്രാക്ടർ, ട്രില്ലർ, നുരിയന്ത്രം, നടീൽ യന്ത്രം, കോണോവീസർ, കംബെൻഡ് ഹാർവെസ്റ്റർ മുതലായ യന്ത്രങ്ങൾ പ്രൊഡ്യൂസർ കമ്പനിക്ക് സ്വന്തമായി ഉണ്ട്.
പ്രൊഡ്യൂസർ കമ്പനിയുടെ ഒരു തനതായ പ്രവർത്തനം മൂല്യവർദ്ധിത ഉൽപ്പന്നങ്ങളിലേയ്ക്കു നീങ്ങിയതാണ്.

നെല്ലിനു 17 രൂപ ലഭിച്ച സ്ഥാനത്ത് നെല്ല് സംഭരിച്ച് അരിയായി വിറ്റ് ലാഭവിഹിതമടക്കം ഒരുകിലോ നെല്ലിന് 30 രൂപ വില നൽകുന്നതിനുള്ള ഒരു തന്ത്രത്തിനു രൂപ നൽകി. മിനി റൈസ് മിൽ സാങ്കേതികവിദ്യയാണ് മയ്യിൽ സ്വീകരിച്ചത്. കമ്പനിയുടെ നേതൃത്വത്തിൽ 10 വികേന്ദ്രീകൃത നെല്ല് സംസ്കരണ യൂണിറ്റുകളും 15 സ്വകാര്യ സംരംഭകരുടെയും 25 പാടശേഖര സമിതികളുടെയും 50 മിനി മില്ലുകൾ ഇന്ന് മയ്യിലുണ്ട്.

സ്വന്തം നെല്ല് കുത്തി അരിയാക്കുന്നതിനും ഇവ ചുറ്റുമുള്ളവർക്ക് കുത്തിക്കൊടുക്കുന്നതിനും ഉപയോഗിക്കുന്നു. ത്രിതലപഞ്ചായത്തുകളുടെ പ്ലാൻ ഫണ്ടുകളും കൃഷി വകുപ്പിന്റെ സ്കീമുകളിൽ നിന്നുള്ള ധനസഹായവും നബാർഡിന്റെ ധനസഹായവുമെല്ലാം സംയോജിപ്പിക്കുന്നതിന് മയ്യിൽ വിജയിച്ചു.

എല്ലാറ്റിലുമുപരി നെൽകൃഷിയെ നാടിന്റെ അഭിമാനമാക്കി മാറ്റി. ലൈബ്രറികളിലും പാടശേഖര സമിതികളിലും അയൽക്കൂട്ടങ്ങളിലുമെല്ലാം സുലഭമായ സാമൂഹ്യ മൂലധനത്തെ പദ്ധതിക്കായി പ്രയോജനപ്പെടുത്തി. ഇതിനായി ശിൽപ്പശാലകളും മറ്റും മാത്രമല്ല കൈവിത്തിടൽ, നാട്ടുപൊലി, വയൽ നടത്തം, കലാകാരന്മാരുടെയും മന്ത്രിമാരുടെയും സന്ദർശനങ്ങൾ, പത്ര-റേഡിയോ-ടെലിവിഷൻ മാധ്യമങ്ങളിലെ പരിപാടികൾ ഇവയെല്ലാം വലിയ ഭാവനയോടെ ഉപയോഗപ്പെടുത്തി.

ഇപ്പോൾ മയ്യിൽ റൈസ് പ്രൊഡ്യൂസർ കമ്പനിയിൽ 417 കൃഷിക്കാർ ഓഹരി ഉടമകളായുണ്ട്. 2020-21 വർഷത്തെ വാർഷിക വിറ്റുവരവ് 2 കോടി രൂപയാണ്. കൃത്യമായി ലാഭവിഹിതവും നൽകുന്നു. കമ്പനിയുടെ ചെയർമാൻ കെ.കെ. രാമചന്ദ്രനും മാനേജിംഗ് ഡയറക്ടർ റ്റി.കെ. ബാലകൃഷ്ണനും സി.ഇ.ഒ യു. ജനാർദ്ദനനുമാണ്. ജനാർദ്ദനനെക്കുറിച്ച് ഞാൻ വേറെ എഴുതുന്നുണ്ട്.

ജനകീയാസൂത്രണകാലം മുതലുള്ള മയ്യിലെ തുടർച്ചകളിലൊന്നാണ് ജനാർദ്ദനനും പി.കെ. വിജയനും. മയ്യിലിന്റെ കാർഷിക മുന്നേറ്റത്തിന്റെ ഭാവിയെക്കുറിച്ചുള്ള ശിൽപ്പശാലയിലാണു ഞാൻ പങ്കെടുത്തത്. ശ്രദ്ധിച്ചൊരു കാര്യം കമ്പനി ഡയറക്ടർമാരും ജനപ്രതിനിധികളും എല്ലാവരും തമ്മിലുള്ള സൗഹൃദവും അനൗപചാരികതയുമാണ്.

എവിടെയാണ് പഞ്ചായത്ത് അവസാനിക്കുന്നത്, എവിടെയാണ് കമ്പനി തുടങ്ങുന്നത് എന്ന് ആർക്കും പറയാനാവില്ല. ഈ സംയോജനത്തെയാണ് സിനർജി (synergy) എന്നു പറയുന്നത്. അധികാരവികേന്ദ്രീകരണത്തിനു സൃഷ്ടിക്കാൻ കഴിയുന്ന സിനർജിയുടെ ഉത്തമ ഉദാഹരണമാണ് മയ്യിൽ.