വ്യവസായ നടത്തിപ്പില്‍ സംശയങ്ങളുണ്ടെങ്കിൽ ഹെല്പ് ഡെസ്ക്കിലേക്ക് വിളിക്കാൻ അവസരം. വ്യവസായ സംരംഭങ്ങള്‍ക്ക് വേണ്ട അനുമതികള്‍ സമയ ബന്ധിതമായി ലഭ്യമാക്കുന്നതിന് സഹായിക്കുന്ന ഓണ്‍ലൈന്‍ ഏകജാലക സംവിധാനമായ കെ-സ്വിഫ്‌റ്റിന്റെ ഭാഗമായി വ്യവസായികള്‍ക്കുള്ള വിവിധ സംശയങ്ങളും ആകുലതകളും ദൂരീകരിക്കുന്നതിനുള്ള കോള്‍ സെന്‍റര്‍ പ്രവര്‍ത്തിക്കാൻ ഒരുങ്ങുന്നത്.

"1800 890 1030" എന്ന ടോള്‍ഫ്രീ നമ്ബറോടുകൂടിയ കോള്‍ സെന്‍റര്‍ ഹെല്പ് ഡെസ്ക് നിലവില്‍ രാവിലെ എട്ട് മണി മുതല്‍ രാത്രി എട്ട് മണി വരെ ഇവർക്കുമായി പ്രവര്‍ത്തനനിരതമാണ്. സംസ്ഥാനത്തെ വ്യാവസായിക അന്തരീക്ഷത്തെ ഉത്തേജിപ്പിക്കുന്നതിനും ഇതിനുവേണ്ട വിധത്തിലുള്ള പ്രോത്സാഹനം നല്‍കുന്നതിനും വേണ്ടി നിരവധി നടപടികളാണ് സര്‍ക്കാര്‍ കൈക്കൊള്ളാൻ ഒരുങ്ങുന്നത്.

ഇതിന്റെ ഭാഗമായി ആരംഭിച്ച കോള്‍ സെന്ററിലൂടെ വ്യവസായികളുടെയും സംരംഭകരുടെയും സംശയങ്ങളും ആശങ്കകളും ദൂരീകരിക്കുകയാണ് ചെയ്യുക. കഴിഞ്ഞ ഒരുവര്‍ഷ കാലയളവില്‍ ഇന്‍വെസ്റ്റ് കേരള ഹെല്പ് ഡെസ്കിലൂടെ വ്യവസായ സംരംഭകരുടെ 8,601 സംശയങ്ങള്‍ക്ക് പരിഹാരം കണ്ടെത്തിയിട്ടുമുണ്ട്. ഈ കാലയളവില്‍ ഹെല്പ് ഡെസ്കിലേക്ക് ഒരു ദിവസം ശരാശരി 27 കോളുകള്‍ വന്നിട്ടുമുണ്ട്.

അതേസമയം സംശയനിവാരണത്തിന് 15 ദിവസം സമയം അനുവദിച്ചിട്ടുണ്ടെങ്കിലും ശരാശരി 3.88 ദിവസങ്ങള്‍ക്കുള്ളില്‍തന്നെ ഒരു സംശയത്തിനോ പ്രശ്നത്തിനോ പരിഹാരം നല്കാന്‍
സാധിച്ചിട്ടുണ്ട് എന്നും അധികൃതർ വ്യക്തമാക്കി. ഇതിനോടകം തന്നെ ഹെല്പ് ഡെസ്ക് വഴി സംശയങ്ങള്‍ ആരാഞ്ഞ 88.28% സംരംഭകരും ഈ സംവിധാനത്തെ പറ്റി വളരെ നല്ല അഭിപ്രായമാണ് രേഖപ്പെടുത്തിയിരിക്കുന്നത്.