രോഗം ഗുരുതരമായിട്ടും ആശുപത്രിയിലെത്തിക്കാതെ ഭര്‍ത്താവ് ചികിത്സയ്ക്ക് എത്തിച്ചത് ആലുവയിലെ മന്ത്രവാദിയുടെ അടുത്ത്... ഇന്നലെ പുലര്‍ച്ചയോടെ യുവതി മരിച്ചു, പോലീസ് നിര്‍ദ്ദേശത്തെ തുടര്‍ന്ന് മൃതദേഹം വടകര ജില്ലാ ആശുപത്രിയിലെ മോര്‍ച്ചറിയിലേക്ക് മാറ്റി, പോസ്റ്റ്‌മോര്‍ട്ടം ഇന്ന് നടത്തും, യുവതിയുടെ ബന്ധുവിന്റെ പരാതിയില്‍ അസ്വാഭാവിക മരണത്തിന് കേസെടുത്ത് വളയം പൊലീസ് അന്വേഷണം തുടങ്ങി.

കല്ലാച്ചി ചെട്ടീന്റെവിട ജമാലിന്റെ ഭാര്യ നൂര്‍ജഹാനാണ് (44) ദാരുണാന്ത്യമുണ്ടായത്. കുനിങ്ങാട് കിഴക്കയില്‍ നൂര്‍ജഹാന്‍ മന്‍സിലില്‍ മൂസ കുഞ്ഞയിഷ ദമ്പതികളുടെ മകളാണ്. ജാതിയേരി കല്ലുമ്മലിലെ വാടക വീട്ടില്‍ നിന്ന് തിങ്കളാഴ്ച പുലര്‍ച്ചെയാണ് നൂര്‍ജഹാനെ ഭര്‍ത്താവ് ജമാല്‍ ആംബുലന്‍സില്‍ ആലുവയിലേക്ക് കൊണ്ടുപോയത്.

മരണവിവരം ഇന്നലെ പുലര്‍ച്ചെ നാലു മണിയോടെ ഭാര്യാമാതാവിനെ ഫോണില്‍ വിളിച്ച് പറഞ്ഞു. യുവതിയുടെ മാതൃസഹോദരീ പുത്രന്‍ ഫൈസലിന്റെ പരാതിയില്‍ അസ്വാഭാവിക മരണത്തിന് കേസെടുത്ത് വളയം പൊലീസ് അന്വേഷണം ആരംഭിച്ചു. മന്ത്രവാദ ചികിത്സയെ തുടര്‍ന്നാണ് മരണമെന്ന് പരാതിയിലെ ആരോപണം.

ആറ് മാസം മുമ്പ് ചര്‍മ്മ സംബന്ധമായ രോഗം ബാധിച്ച യുവതിക്ക് ഭര്‍ത്താവ് ജമാല്‍ വീട്ടില്‍ ചികിത്സ നല്‍കുകയായിരുന്നു. യുവതിയുടെ വിവരം അറിയാതെ ബന്ധുക്കള്‍ അന്വേഷിച്ചെത്തിയപ്പോഴാണ് രോഗം ബാധിച്ച് ഗുരുതരാവസ്ഥയിലാണെന്ന് അറിഞ്ഞത്.

തുടര്‍ന്ന് അവര്‍ ഇടപെട്ട് യുവതിയെ കോഴിക്കോട്ടെ സ്വകാര്യ ആശുപത്രിയില്‍ ചികിത്സിപ്പിച്ചിരുന്നു. കഴിഞ്ഞ ദിവസം വീണ്ടും രോഗം കടുത്തതോടെ തുടര്‍ചികിത്സ നടത്താന്‍ തയ്യാറാകാതെ ജമാല്‍ ആലുവയിലെ മന്ത്രവാദ കേന്ദ്രത്തിലേക്ക് കൊണ്ടുപോയത്.