അതിദയനീയമായ വാര്‍ത്തയാണ് വരുന്നത്. കരള്‍ രോഗിയായ ഭാരതീപുരം പൂവണത്തുംമൂട് ശ്രീവിലാസത്തില്‍ എസ്.അനിയുടെ (ഷൈജു 46) അപ്രതീക്ഷിതമായ മരണത്തില്‍ അമ്പരന്നിരിക്കുകയാണ് ബന്ധുക്കള്‍. അനിയുടെ ചികിത്സയ്ക്കായി നെട്ടോട്ടമോടുന്നതിന് ഇടയ്ക്കാണ് ബസിലെ സംഭവവും തുടര്‍ന്ന് ജീവനൊടുക്കാന്‍ ശ്രമിച്ചതും.

ആ കെഎസ്ആര്‍ടിസി ബസ് യാത്രയാണ് അനിയുടെ ജീവിതത്തിലെ താളം തെറ്റിച്ചത്. അവശനായി കെഎസ്ആര്‍ടിസി ബസിലെ സീറ്റില്‍ കിടന്നപ്പോള്‍ മദ്യപനെന്ന് ആരോപിച്ചു കണ്ടക്ടര്‍ മര്‍ദിച്ചതില്‍ മനംനൊന്തു ജീവനൊടുക്കാന്‍ ശ്രമിച്ച അനി മരിച്ചു. സംഭവത്തില്‍ പുനലൂര്‍ കെഎസ്ആര്‍ടിസി ഡിപ്പോയിലെ കണ്ടക്ടര്‍ ആര്‍.രാജീവിനെ പ്രതിയാക്കി പൊലീസ് കേസെടുത്തു. കോണ്‍ഗ്രസ് നേതാവ് ഏരൂര്‍ നെട്ടയം രാമഭദ്രന്‍ കൊലക്കേസില്‍ പ്രതിയായി പിന്നീട് മാപ്പുസാക്ഷിയായ ആളാണു രാജീവ്.

നവംബര്‍ 20ന് തിരുവനന്തപുരത്തു നിന്നു പുനലൂരിലേക്കുള്ള യാത്രയ്ക്കിടെ വെമ്പായത്തു വച്ച് കണ്ടക്ടറുടെ മര്‍ദനമേറ്റെന്നു കാട്ടി അനി പരാതി നല്‍കിയിരുന്നു. മെഡിക്കല്‍ കോളജ് ആശുപത്രിയിലെ ചികിത്സ കഴിഞ്ഞ് തുടര്‍ ചികിത്സയ്ക്കായി പുനലൂര്‍ ഗവ. താലൂക്ക് ആശുപത്രിയിലേക്കു സഹോദരനോടൊപ്പം പോകുകയായിരുന്നു. സീറ്റില്‍ കിടന്ന അനിയെ മദ്യപനെന്നു കരുതി കണ്ടക്ടര്‍ അപമാനിക്കുകയും വലിച്ചെഴുന്നേല്‍പിച്ചു മര്‍ദിക്കുകയും ചെയ്‌തെന്നു പരാതിയില്‍ പറയുന്നു. കണ്ടക്ടറുടെ പരാതിപ്രകാരം വട്ടപ്പാറ പൊലീസ് അന്നു കസ്റ്റഡിയില്‍ എടുത്തെങ്കിലും നിജസ്ഥിതി ബോധ്യപ്പെട്ടു വിട്ടയച്ചു.

മര്‍ദനത്തെത്തുടര്‍ന്നു രോഗം വഷളായതോടെ അനിയെ പുനലൂര്‍ ഗവ. താലൂക്ക് ആശുപത്രിയില്‍ പ്രവേശിപ്പിച്ചു. ഇവിടെനിന്ന് ഈ മാസം 3ന് ഏരൂരിലെ അമ്മയുടെ വീട്ടിലെത്തിയാണ് ജീവനൊടുക്കാന്‍ ശ്രമിച്ചത്. തിരുവനന്തപുരം ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ രാവിലെ 10നു മരിച്ചു.

ഡിജിപിക്കും കെഎസ്ആര്‍ടിസി എംഡിക്കും മനുഷ്യാവകാശ കമ്മിഷനും നല്‍കിയ പരാതികളില്‍ നടപടി ഇല്ലാത്തതില്‍ മനംനൊന്താണ് ജീവനൊടുക്കാന്‍ ശ്രമിച്ചതെന്നു ബന്ധുക്കള്‍ പരാതിപ്പെട്ടു. സുമംഗലയാണു ഭാര്യ. മക്കള്‍ അഭിജിത്ത്, അഭിനന്ദ്.

മെഡിക്കല്‍ കോളെജ് ആശുപത്രിയിലെ പരിശോധനയ്ക്ക് ശേഷം കേശവദാസപുരത്ത് നിന്നും പുനലൂര്‍ ഡിപ്പോയിലെ ബസിലായിരുന്നു മടക്കം. ക്ഷീണിതനായിരുന്ന അനി പുറകിലെ സീറ്റില്‍ കിടന്നുറങ്ങി. ഇതു കണ്ട് വന്ന കണ്ടക്ടര്‍ രാജീവ്, മദ്യപനെന്ന് വിളിച്ച് അനിയെ വഴക്ക് പറഞ്ഞെന്നും മ!ര്‍ദ്ദിച്ചെന്നുമാണ് ബന്ധുക്കള്‍ പറയുന്നത്. ഗുരുതര രോഗിയായിരുന്ന അനിയുടെ ആരോഗ്യാവസ്ഥ ഇതോടെ വഷളായി. പുനലൂര്‍ താലൂക്ക് ആശുപത്രിയില്‍ ചികിത്സയിലിരിക്കെ കഴിഞ്ഞ വെള്ളിയാഴ്ച രാത്രി, ആരോടും പറയാതെ വീട്ടിലെത്തിയാണ് അനി ആത്മഹത്യക്ക് ശ്രമിച്ചത്.

രോഗിയാണെന്ന വിവരം സഹോദരന്‍ പറഞ്ഞിട്ടും തടുക്കാന്‍ ശ്രമിച്ചിട്ടും കണ്ടക്ടര്‍ മര്‍ദ്ദിച്ചെന്നാണ് ബന്ധുക്കള്‍ പറയുന്നത്. ബഹളത്തിന് പിന്നാലെ ബസ് വട്ടപ്പാറ പൊലീസ് സ്‌റ്റേഷനിലെത്തിച്ചപ്പോള്‍, പൊതുസ്ഥലത്ത് ബഹളമുണ്ടാക്കിയതിന് അനിക്കെതിരെ പൊലീസ് കേസെടുത്തെന്നും പെറ്റിയടക്കാന്‍ ആവശ്യപ്പെട്ടെന്നും ആരോപണമുണ്ട്.

തന്റെ സീറ്റില്‍ കാലുവെച്ചിരുന്നത് ചോദ്യം ചെയ്തപ്പോള്‍ അനിയാണ് തന്നെ മര്‍ദ്ദിച്ചതെന്ന് കണ്ടക്ടര്‍ രാജീവിന്റെ വിശദീകരണം. രാജീവിനെതിരെ മനുഷ്യാവകാശ കമ്മീഷനും കെഎസ്ആര്‍ടി എംഡിക്കും നെടുമങ്ങാട് പൊലീസിനും അനി പരാതി നല്‍കിയിരുന്നു. പരാതി കെഎസ്ആര്‍ടിസി വിജിലന്‍സ് പരിശോധിക്കുകയാണെന്നാണ് പുനലൂര്‍ യൂണിറ്റ് ഓഫീസറുടെ വിശദീകരണം.