കുട്ടിയുടെ കരച്ചില്‍ സഹിക്കാനാവാതെ കടുംകൈ..... ചികിത്സയ്ക്കായി എത്തിച്ച നവജാത ശിശുവിന്റെ മരണം കൊലപാതകം...കോട്ടയം മെഡിക്കല്‍ കോളജില്‍ നടത്തിയ പോസ്റ്റ്‌മോര്‍ട്ടത്തില്‍ മരണം തലയ്ക്ക് ഏറ്റ പരിക്കാണെന്ന് കണ്ടെത്തി, ഫോറന്‍സിക് വിദഗധര്‍ സ്ഥലത്തെത്തി പരിശോധന നടത്തി തെളിവുകള്‍ ശേഖരിച്ചു, അന്വേഷണത്തില്‍ അമ്മ അറസ്റ്റില്‍.

കോട്ടയത്ത് കൈപ്പുഴ നീണ്ടൂര്‍ പുളിയന്‍പറമ്പില്‍ ബെന്നി സേവ്യറുടെ ഭാര്യ ബ്ലസി പി. മൈക്കിളാണ് (21) അറസ്റ്റിലായത്. റാന്നിയിലെ ഒരു ആശ്രമത്തില്‍ അന്തേവാസികളായി കഴിഞ്ഞു വരവെയാണ് സംഭവം നടന്നത്. 27 ദിവസം പ്രായമുള്ള ആണ്‍കുട്ടിയെയാണ് ബ്ലസി ചികിത്സയ്ക്കായി റാന്നി താലൂക്ക് ആശുപത്രിയില്‍ എത്തിച്ചത്. ആ സമയം കുഞ്ഞ് മരിച്ചിരുന്നതായി കണ്ടെത്തിയിരുന്നു. ഇതിന്റെ അടിസ്ഥാനത്തില്‍ റാന്നി പോലീസ് അസ്വാഭാവിക മരണത്തിനു കേസെടുത്ത് അന്വേഷണം ആരംഭിക്കുകയായിരുന്നു.

കോട്ടയം മെഡിക്കല്‍ കോളജില്‍ നടത്തിയ പോസ്റ്റ്‌മോര്‍ട്ടത്തില്‍ തലയ്ക്ക് ഏറ്റ പരിക്കാണ് മരണം സംഭവിക്കാന്‍ കാരണമെന്ന്് കണ്ടെത്തി. തുടര്‍ന്ന് പത്തനംതിട്ട ജില്ലാ പോലീസ് മേധാവിയുടെ നിര്‍ദ്ദേശാനുസരണം ഫോറന്‍സിക് വിദഗധര്‍ സ്ഥലത്തെത്തി പരിശോധന നടത്തുകയും തെളിവുകള്‍ ശേഖരിക്കുകയും വിശദമായ അന്വേഷണത്തില്‍ കുട്ടിയുടെ മാതാവിനെ അറസ്റ്റ് ചെയ്യുകയുമായിരുന്നു.

മാസം തികയാതെ പ്രസവിച്ച കുട്ടിക്ക് സ്ഥിരമായി അസുഖങ്ങള്‍ ഉണ്ടാകാറുണ്ടായിരുന്നെന്ന് പറയുന്നു. കുട്ടിയുടെ കരച്ചില്‍ കാരണമുള്ള ദേഷ്യത്തില്‍ തല ശക്തിയായി ഭിത്തിയിലിടിപ്പിച്ചാണ് കൊലപ്പെടുത്തിയതെന്ന് അന്വേഷണത്തില്‍ തെളിഞ്ഞു.

ഒന്നര വര്‍ഷം മുമ്പ് കോട്ടയത്ത് ഒരു സ്വകാര്യ സ്ഥാപനത്തില്‍ പഠിച്ചു കൊണ്ടിരുന്ന ബ്ലസി, ബെന്നിയുടെ ഒപ്പം ഇറങ്ങിപ്പോരുകയായിരുന്നു. തുടര്‍ന്ന് പഠിക്കുവാന്‍ അസുഖക്കാരനായ കുഞ്ഞ് ശല്യമാകുമെന്ന ധാരണയിലാണ് കുട്ടിയെ ഇല്ലാതാക്കാന്‍ തീരുമാനിച്ചതെന്നാണ് പറയുന്നത്. ദിവസങ്ങളോളം ഇവരെ ചോദ്യം ചെയ്ത് ശാസ്ത്രീയ മാര്‍ഗത്തിലൂടെ അന്വേഷണം പൂര്‍ത്തീകരിച്ചാണ് അറസ്റ്റ് രേഖപ്പെടുത്തിയത്. കോടതിയില്‍ ഹാജരാക്കിയ പ്രതി റിമാന്‍ഡില്‍.