പെരിയ ഇരട്ടക്കൊലക്കേസ് പ്രതികള്‍ ജയില്‍ മാറ്റം ആവശ്യപ്പെട്ട് കോടതിയില്‍.... ഹര്‍ജി ഡിസംബര്‍ 29ന് പരിഗണനയില്‍. കേസില്‍ സിബിഐ കഴിഞ്ഞ ദിവസം അറസ്റ്റ് ചെയ്തവമാണ് ജയില്‍ മാറ്റം ആവശ്യപ്പെടുന്നത്.

നിലവില്‍ എറണാകുളം ജില്ലാ ജയിലില്‍ കഴിയുന്ന പ്രതികള്‍ക്ക് കണ്ണൂര്‍ സെന്‍ട്രല്‍ ജയിലേക്ക് മാറാനാണ് താത്പര്യം. ഹര്‍ജി ഫയലില്‍ സ്വീകരിച്ച കോടതി ഡിസംബര്‍ 29ന് പരിഗണിക്കാം എന്നറിയിച്ചു. എന്നാല്‍ ജയില്‍ മാറണമെന്ന പ്രതികളുടെ ആവശ്യം ഒരുതരത്തിലും അംഗീകരിക്കരുതെന്നാണ് സിബിഐ ആവശ്യപ്പെടുന്നത്.



അതേസമയം പെരിയ ഇരട്ടക്കൊലക്കേസില്‍ സി.പി.എം. നേതാവും മുന്‍ എം.എല്‍.എയുമായ കെ.വി. കുഞ്ഞിരാമന്‍ ഇന്ന് കോടതിയില്‍ ഹാജരായില്ല. കുഞ്ഞിരാമന്‍ അടക്കം നാല് പ്രതികള്‍ അവധി ചോദിച്ചു. സി.പി.എം. നേതാവ് മണികണ്ഠന്‍ അടക്കം മറ്റ് പ്രതികള്‍ കൊച്ചി സി.ജെ.എം. കോടതിയില്‍ എത്തി. പെരിയ ഇരട്ടകൊലകേസില്‍ സി.ബി.ഐ. കുറ്റപത്രം സമര്‍പ്പിച്ച് വിചാരണ നടപടികളിലേക്ക് കടക്കും മുന്‍പാണ് എല്ലാ പ്രതികളോടും ഹാജരാവാന്‍ കൊച്ചി ചീഫ് ജുഡീഷ്യല്‍ മജിസ്ട്രേറ്റ് കോടതി ഉത്തരവിട്ടത്.

ക്രൈം ബ്രാഞ്ചും സിബിഐയും അറസ്റ്റ് ചെയ്ത പ്രതികള്‍ ജയിലില്‍ നിന്ന് വീഡിയോ കോണ്‍ഫ്രന്‍സ് വഴിയും മറ്റുള്ളവര്‍ നേരിട്ടും ഹാജരായി.

മുന്‍ എംഎല്‍എയും സി.പി.എം. കാസര്‍കോട് ജില്ലാ സെക്രട്ടറിയേറ്റ് അംഗവുമായ കെ.വി. കുഞ്ഞിരാമന്‍, സി.പി.എം. നേതാവ് കെ.വി. ഭാസ്‌കരന്‍, 23-ാം പ്രതി ഗോപന്‍ വെളുത്തോളി, 24-ാം പ്രതി സന്ദീപ് വെളുത്തോളി എന്നിവര്‍ ഹാജരായില്ല.

നോട്ടീസ് ലഭിക്കാന്‍ വൈകിയതിനാലാണ് ഹാജരാകാത്തതെന്ന് കുഞ്ഞിരാമന്റെ അഭിഭാഷകന്‍ കോടതിയില്‍ പറഞ്ഞു. ഇവരോട് 22 ന് ഹാജരാവന്‍ കോടതി നിര്‍ദേശിച്ചു. കോടതിയില്‍ എത്തിയ കാഞ്ഞങ്ങാട് ബ്ലോക്ക് പഞ്ചായത്ത് പ്രസിഡന്റ് കെ. മണികണ്ഠന്‍, സി.പി.എം. കാഞ്ഞങ്ങാട് ഏരിയ കമ്മിറ്റിയംഗം എന്‍. ബാലകൃഷ്ണന്‍, 11-ാം പ്രതി ആലക്കോട് മണി എന്നിവര്‍ക്ക് ജാമ്യം നീട്ടി നല്‍കി.സി.ബി.ഐ. അറസ്റ്റ് ചെയ്ത പ്രതികളുടെ റിമാന്‍ഡ് കാലാവധി ഈ മാസം 29 വരെ നീട്ടി.