അധ്യാപകര്‍ ജാഗ്രതൈ! അഞ്ചുവര്‍ഷം തുടര്‍ച്ചയായി അവധിയെടുത്ത ശേഷം തിരികെ ജോലിയില്‍ പ്രവേശിച്ചില്ലെങ്കില്‍ പുറത്താകും. തുടര്‍ച്ചയായ അഞ്ചുവര്‍ഷം അവധിയെടുത്ത ശേഷം ജോലിക്ക് തിരികെ കയറിയില്ലെങ്കില്‍ എയ്ഡഡ് സ്‌കൂള്‍ അധ്യാപകര്‍ ജോലിയില്‍ നിന്ന് പുറത്താകുമെന്ന് ഹൈക്കോടതി.

ജസ്റ്റിസ് എ.കെ. ജയശങ്കരന്‍ നമ്പ്യാര്‍, ജസ്റ്റിസ് സി.പി. മുഹമ്മദ് നിയാസ് എന്നിവരടങ്ങുന്ന ഡിവിഷന്‍ബെഞ്ചിന്റേതാണ് ഉത്തരവ്. അഞ്ചുവര്‍ഷത്തിന് ശേഷവും അവധി നീണ്ടാല്‍ സര്‍വീസ് അവസാനിച്ചതായി കണക്കാക്കുമെന്ന കെ.ഇ.ആറിലെ ചട്ടം 56(4) ന്റെ അടിസ്ഥാനത്തിലാണ് ഉത്തരവിറക്കിയത്.

മലപ്പുറം ചെങ്ങോട്ടൂര്‍ എ.എം.എല്‍.എസ്. അധ്യാപകനായിരിക്കേ 2005 സെപ്റ്റംബറില്‍ അഞ്ചുവര്‍ഷത്തെ അവധിയെടുത്ത് യു.കെ.യിലേക്കുപോയ എറണാകുളം സ്വദേശി ഷാജി പി. ജോസഫ് നല്‍കിയ ഹര്‍ജിയാണ് കോടതി പരിഗണിച്ചത്.

ഹര്‍ജിക്കാരന് 2010-ല്‍ അഞ്ചുവര്‍ഷം കൂടി അവധി നീട്ടി നല്‍കി. 2015 -ല്‍ അഞ്ചുവര്‍ഷം കൂടി അവധി വേണമെന്നാവശ്യപ്പെട്ട് അപേക്ഷ നല്‍കിയപ്പോള്‍ മാനേജര്‍ നിഷേധിച്ചു. ഇതിനെതിരേയാണ് ഹൈക്കോടതിയെ സമീപിച്ചത്.

സര്‍ക്കാര്‍ സ്‌കൂളിലെ അധ്യാപകര്‍ക്ക് 20 വര്‍ഷംവരെ തുടര്‍ച്ചയായി അവധി അനുവദിക്കാന്‍ വ്യവസ്ഥയുള്ളപ്പോള്‍ അതേ ആനുകൂല്യം എയഡഡ് സ്‌കൂള്‍ അധ്യാപകര്‍ക്ക് നിഷേധിക്കാനാകില്ലെന്നായിരുന്നു ഹര്‍ജിക്കാരന്റെ വാദം. ഈ വാദം തള്ളിയ കോടതി മാനേജരുടെ ഉത്തരവില്‍ തെറ്റില്ലെന്ന് വിലയിരുത്തി ഹര്‍ജി തള്ളി.

അതേസമയം സര്‍ക്കാര്‍, സ്വകാര്യ എയ്ഡഡ് അധ്യാപകര്‍ക്ക് കേരള വിദ്യാഭ്യാസ ചട്ടം ഒരുപോലെ ബാധകമാണെങ്കിലും ദീര്‍ഘാവധിയുടെ കാര്യത്തില്‍ എയ്ഡഡ് അധ്യാപകര്‍ക്ക് അഞ്ചുവര്‍ഷത്തിലധികം അനുവദനീയമല്ലെന്നാണ് ഡിവിഷന്‍ബെഞ്ച് ചൂണ്ടിക്കാട്ടിയിരിക്കുന്നത്.