ഗുരുവായൂരപ്പന്റെ ഭക്തര്‍ ലോകത്തെമ്പാടുമുണ്ട്. അതില്‍ ലക്ഷപ്രഭുക്കള്‍ പതിനായിരക്കണക്കിന് പേരുണ്ട്. ആ ഒരു ഉറപ്പിലാണ് ഗുരുവായൂരപ്പന് കാണിക്കയായി ലഭിച്ച ഥാര്‍ ജീപ്പ് ലേലത്തില്‍ വയ്ക്കാന്‍ ഗുരുവായൂര്‍ ദേവസ്വം തീരുമാനിച്ചത്. ഗുരുവായൂരപ്പന്റെ ഥാര്‍ വാങ്ങാന്‍ കൂട്ട ഇടിയായിരിക്കും. 50 ലക്ഷം വരെയെങ്കിലും ലേലം പോകും. പക്ഷെ മനപ്പായസം കുടിച്ചത് വെറുതേയായി. ഒരു ഭക്തനും ലേലത്തില്‍ പങ്കെടുത്തില്ല. ആകെ പങ്കെടുത്തത് ബഹ്‌റൈനില്‍ ജോലിയുള്ള ഇടപ്പള്ളി സ്വദേശി അമല്‍ മുഹമ്മദ് അലി മാത്രം. ലേലം പിടിച്ചതോ 15.10 ലക്ഷം രൂപയ്ക്ക്. അതോടെ ദേവസ്വം വെട്ടിലായി.

ബഹ്‌റൈനില്‍ ജോലിയുള്ള ഇടപ്പള്ളി സ്വദേശി അമല്‍ മുഹമ്മദ് അലിക്കായി, സുഹൃത്ത് സുഭാഷ് പണിക്കരാണ് ലേലത്തില്‍ പങ്കെടുത്തത്. 21 ലക്ഷം വരെ ലേലം വിളിക്കാനും കൂടുതല്‍ തുകയ്ക്ക് മറ്റാരെങ്കിലും ഉണ്ടെങ്കില്‍ തന്നെ ബന്ധപ്പെടാനും അമല്‍ അറിയിച്ചിരുന്നതായി സുഭാഷ് പണിക്കര്‍ മാദ്ധ്യമങ്ങളോട് നടത്തിയ വെളിപ്പെടുത്തലാണ് വിവാദത്തിന് കാരണമായത്. ഈ മാസം 21ന് ചേരുന്ന ദേവസ്വം ഭരണ സമിതി യോഗത്തിന് ശേഷമേ കാര്‍ കൈമാറൂവെന്ന് ചെയര്‍മാന്‍ വ്യക്തമാക്കി. അതേസമയം, ദേവസ്വം നിലപാട് മാറ്റിയാല്‍ നിയമനടപടി അടക്കമുള്ളവ ആലോചിക്കുമെന്ന് സുഭാഷ് പണിക്കര്‍ അറിയിച്ചു.

സുഭാഷ് പണിക്കര്‍ മാത്രമാണ് ലേലത്തില്‍ പങ്കെടുത്തത്. 15 ലക്ഷമായിരുന്നു അടിസ്ഥാന വില. നിരതദ്രവ്യമായി കെട്ടേണ്ടത് നാല്‍പതിനായിരം രൂപയും. പത്രവാര്‍ത്തയിലൂടെ മാത്രമാണ് ലേലത്തിന്റെ കാര്യം അറിയിച്ചത്. ഓണ്‍ലൈനിലൂടെ ലേലത്തിന് നിരവധി പേര്‍ ശ്രമിച്ചെങ്കിലും നിരതദ്രവ്യം അടയ്ക്കാന്‍ ഒരാളൊഴികെ ആരും തയ്യാറായില്ല എന്ന ന്യായമാണ് ദേവസ്വം അധികൃതര്‍ പറയുന്നത്.

ഗുരുവായൂര്‍ ക്ഷേത്രത്തിലേക്ക് ഒരാഴ്ച മുമ്പാണ് മഹീന്ദ്ര ആന്‍ഡ് മഹീന്ദ്ര പുതിയ എഡിഷന്‍ ഥാര്‍ വഴിപാടായി സമര്‍പ്പിച്ചത്. വിവരം അറിഞ്ഞത് മുതല്‍ ധാരാളം ഭക്തര്‍ ഥാര്‍ വാങ്ങാന്‍ ആഗ്രഹമറിയിച്ച് ദേവസ്വത്തെ സമീപിച്ചു. ഇത് പരിഗണിച്ചാണ് പൊതുലേലം നടത്തി വാഹനം വില്‍ക്കാന്‍ ദേവസ്വം തീരുമാനിച്ചത്. 15 ലക്ഷമാണ് അടിസ്ഥാന വില നിശ്ചയിച്ചത്.

വാഹന വിപണിയില്‍ തരംഗമായി മാറിയിരിക്കുന്ന ഏറ്റവും പുതിയ മഹീന്ദ്ര ന്യൂ ഥാര്‍ ഫോര്‍ വീല്‍ െ്രെഡവ് മഹീന്ദ്രാ ആന്റ് മഹീന്ദ്രാ ലിമിറ്റഡാണ് നാലാം തിയതി രാവിലെ നടയ്ക്കല്‍ സമര്‍പ്പിച്ചത്. റെഡ് കളര്‍ ഡീസല്‍ ഓപ്ഷന്‍ ലിമിറ്റഡ് എഡിഷനാണ് സമര്‍പ്പിക്കപ്പെട്ടത്. ആരെയും ആകര്‍ഷിക്കുന്ന നിറമായതിനാല്‍ വിപണിയില്‍ നല്ല ഡിമാന്റുള്ള എസ്‌യുവിയാണ്. വിപണിയില്‍ 13 മുതല്‍ 18 ലക്ഷം വരെ വിലയുള്ളതാണ് വണ്ടി. 2200 സിസിയാണ് എന്‍ജിന്‍.

ഗുരുവായൂര്‍ കിഴക്കേ നടയില്‍ നടന്ന ചടങ്ങില്‍ ദേവസ്വം ചെയര്‍മാന്‍ അഡ്വ കെബി മോഹന്‍ദാസിന് വാഹനത്തിന്റെ താക്കോല്‍ മഹീന്ദ്രാ ആന്റ് മഹീന്ദ്രാ ലിമിറ്റഡിന്റെ ചീഫ് ഓഫ് ഗ്ലോബല്‍ പ്രോഡക്ട് ഡവലപ്‌മെന്റ് ആര്‍ വേലുസ്വാമി കൈമാറുകയായിരുന്നു.

2020 ഒക്ടോബര്‍ രണ്ടിനാണ് രാജ്യത്തെ പ്രമുഖ ആഭ്യന്തര വാഹന നിര്‍മ്മാതാക്കളായ മഹീന്ദ്ര ആന്‍ഡ് മഹീന്ദ്ര പുതിയ ഥാര്‍ എസ്‌യുവിയെ വിപണിയില്‍ അവതരിപ്പിച്ചത്. എത്തി ഒരുവര്‍ഷത്തിനിടെ വിപണിയില്‍ കുതിക്കുകയാണ് ഥാര്‍. വാഹനം ഇതുവരെ ബുക്ക് ചെയ്ത ഉപഭോക്താക്കളില്‍ 40 ശതമാനം പേരും മിലേനിയല്‍സ് (1981നും 1996നും ഇടയില്‍ ജനിച്ചവര്‍) ആണെന്നാണ് മഹീന്ദ്ര വ്യക്തമാക്കുന്നു. ഇത് വരെ ഥാര്‍ ബുക്ക് ചെയ്തവരില്‍ 50 ശതമാനം പേര്‍ ഓട്ടോമാറ്റിക് വേരിയന്റുകളാണ് ബുക്ക് ചെയ്തിരിക്കുന്നതെന്നും കണക്കുകള്‍ വ്യക്തമാക്കുന്നു. മാത്രമല്ല 25 ശതമാനത്തോളം പേര്‍ തിരഞ്ഞെടുത്തിരിക്കുന്നത് പെട്രോള്‍ വേരിയന്റുകളാണെന്നും കമ്പനി പറയുന്നു.

എന്തായാലും ലേലത്തോടെ ഥാറിന്റെ പ്രശസ്തിയും വാങ്ങുന്നവന്റെ പ്രശസ്തിയും ലേലത്തോടെ ഉയര്‍ന്നു. മരുന്നിന് പോലുമില്ലാത്ത ഭക്തരേയും കണ്ടു. ഗുരുവായൂരപ്പന്‍ കടാക്ഷിച്ചിട്ടും അമല്‍ മുഹമ്മദ് അലിയെ ദേവസ്വം കടാക്ഷിക്കുമോയെന്ന് കണ്ടറിയാം.