'രാഷ്ട്രീയം കൊണ്ടും ജീവിതം കൊണ്ടും ഞാന് എന്നെ തിരുത്തുന്നു. ഇസ്ലാമിന്റെ പരിസരത്ത് ഇനിയുണ്ടാവില്ല. നിരവധി പിണക്കങ്ങള്ക്ക് ഇത് കാരണമായെന്ന് വരാം. പക്ഷേ എനിക്ക് എന്നോട് നീതി പുലര്ത്താതിരിക്കാന് ആവില്ല...' സംവിധായകന് അലി അക്ബറിനു പിന്നാലെ ഇസ്ലാം ഉപേക്ഷിച്ച് എഴുത്തുകാരന് കമല് സി നജ്മലും
സംവിധായകന് അലി അക്ബറിനു പിന്നാലെ എഴുത്തുകാരന് കമല് സി നജ്മലും ഇസ്ലാം ഉപേക്ഷിക്കുന്നതായി റിപ്പോർട്ട്. ഫേസ്ബുക്ക് പോസ്റ്റിലൂടെയാണ് കമല് സി താന് മതം ഉപേക്ഷിക്കുന്നതായി അറിയിച്ചിരിക്കുന്നത്. ഇസ്ലാമിന്റെ പരിസരത്ത് ഇനിയുണ്ടാവില്ലെന്നും തനിക്ക് സ്വയം നീതി പുലര്ത്താതിരിക്കാന് ആവില്ലെന്നും പറഞ്ഞാണ് കമല് സി ഇസ്ലാം മതം ഉപേക്ഷിക്കുന്നതായി വ്യക്തമാക്കിയിരിക്കുന്നത്.
അതേസമയം രണ്ടു വര്ഷം മുമ്പാണ് എഴുത്തുകാരന് കമല് സി ചവറ ഇസ്ലാം മതം സ്വീകരിച്ചത്. തുടര്ന്ന് തന്റെ പേര് കമല് സി നജ്മല് എന്നാണെന്ന് ഇദ്ദേഹം ഫേസ്ബുക്കിലൂടെ അറിയിച്ചത്. മുന് നക്സലൈറ്റ് നേതാവും സാംസ്കാരിക പ്രവര്ത്തകനുമായ നജ്മല് ബാബുവിന്റെ മൃതദേഹത്തോട് കാണിച്ച അനാദരവ് ചൂണ്ടിക്കാട്ടിയാണ് അന്ന് കമല് സി മതം മാറിയത്.
ഫേസ്ബുക്ക് കുറിപ്പ് ഇങ്ങനെ;
ഞാന് ഇസ്ലാമിലേക്ക് കടന്ന് വന്ന രാഷ്ട്രീയ സാഹചര്യം ഏവര്ക്കും അറിയാവുന്നതാണല്ലോ. അതിന് വലിയ മാറ്റങ്ങള് വന്നിട്ടില്ലെങ്കിലും പ്രതിരോധത്തിന്റെ രാഷ്ട്രീയത്തില് വ്യക്തത വരാതിരിക്കുകയും വര്ഗ്ഗീയതയ്ക്ക് ബദല് വര്ഗ്ഗീയത എന്ന സമീപനം സ്വീകരിക്കപ്പെടുകയും ചെയ്യുന്നു. മതാധിഷ്ഠിതമായ ഒരു പ്രതിരോധത്തില് ഇതു വരെയുള്ള അനുഭവങ്ങളും കാലവും എന്നെ വിശ്വസിക്കാന് പ്രേരിപ്പിക്കുന്നില്ല. പുരോഹിതന്മാര്ക്ക് പള്ള വീര്പ്പിക്കാനുള്ള ഒരിടമായി മത ധാര്മ്മികത മാറിക്കഴിഞ്ഞു. വര്ഗ്ഗീയ ഫാസിഷത്തിനെതിരേ മൗലിക വാദവും യാഥാസ്ഥിതികത്വവും ബദലാകുന്ന വഴി സമൂഹത്തെ കൂടുതല് അപകടത്തിലേക്ക് കൊണ്ട് പോവുമെന്ന് വിശ്വസിക്കുന്നു.
ഈ അടുത്തിടെ ഉണ്ടായ ചില സംഭവവികാസങ്ങള് ആ വിശ്വാസത്തിന് അടിവരയിടുന്നു. ന്യൂനപക്ഷ രാഷ്ട്രീയത്തെ മതപൗരോഹിത്യം അവരുടെ വാശിക്കും അബദ്ധജഡിലമായ വിശ്വാസങ്ങള്ക്കും ഉള്ള വഴിയായി മാറ്റുന്നു. ലോബികള്, വെറുപ്പിന്റെ ചെറിയ ചെറിയ കൂട്ടായ്മകള്, കോക്കസ് പ്രവര്ത്തനങ്ങള്, ചില വക്തികളില് മാത്രം കേന്ദ്രമായ കൂടിച്ചേരലുകള് ഇതെല്ലാം ഇസ്ലാമിനെ അതിന്റെ വെളിച്ചം കെടുത്താന് കാരണമാവുന്നു. യാഥാസ്ഥിതികത്വവും പിന്തിരിപ്പന് സമീപനങ്ങളും ഇസ്ലാമിനെ നാശത്തിലേക്ക് തന്നെ നയിച്ച് കൊണ്ടിരിക്കുന്നു. പ്രതീക്ഷയുടെ വരമ്പുകള് എവിടെയും ഇല്ല .
ഒരു രാഷ്ട്രീയ പ്രഖ്യാപനമെന്ന നിലയില് ഇസ്ലാമിലേക്ക് കടന്ന് വന്ന ആളാണ് ഞാന് . ഈ ചുരുങ്ങിയ കാലം കൊണ്ട് തന്നെ മലീമസമായ അതിന്റെ ചുറ്റുപാടുകള് എന്നെ ആ സമീപനത്തില് മാറ്റം വരുത്താല് പ്രേരിപ്പിക്കുന്നു. ന്യൂനപക്ഷ രാഷ്ട്രീയത്തിന് പ്രസക്തിയേറുമ്പോഴും മതാധിഷ്ഠിതമായ പ്രതിലോമ ശക്തികള് ഒന്നിനും പരിഹാരമല്ലെന്ന് തിരിച്ചറിയുന്നു. രാഷ്ട്രീയം കൊണ്ടും ജീവിതം കൊണ്ടും ഞാന് എന്നെ തിരുത്തുന്നു. ഇസ്ലാമിന്റെ പരിസരത്ത് ഇനിയുണ്ടാവില്ല. നിരവധി പിണക്കങ്ങള്ക്ക് ഇത് കാരണമായെന്ന് വരാം. പക്ഷേ എനിക്ക് എന്നോട് നീതി പുലര്ത്താതിരിക്കാന് ആവില്ല.
മതാധിഷ്ഠിതമായ പ്രതിരോധം ഭൂരിപക്ഷ വര്ഗ്ഗീയതയുടെ വിത്ത് കള്ക്ക് വളക്കൂറുള്ള മണ്ണ് നല്കിക്കൊണ്ടിരിക്കുന്നു. ഈ സാഹചര്യത്തില് ഞാന് എന്നെ തിരുത്തുന്നു. ഒരു മതത്തിന്റെ പ്രാതിനിധ്യത്തിലും ഇനി ഉണ്ടാവില്ലെന്ന് മാത്രമല്ല മതാതീതമായ കൂട്ടായ്മകള്ക്ക് ആഗ്രഹിക്കുന്നു. ഇത് തീര്ത്തും എന്റെ വ്യക്തിപരമായ കാര്യമാണ്. അത്തരം പ്രതിരോധ സ്ഥലങ്ങള് ഉപേക്ഷിക്കുന്നു.
എല്ലാവര്ക്കും നന്ദി.
https://www.facebook.com/Malayalivartha
