സംസ്ഥാനത്തെ രാഷ്ട്രീയ കൊലപാതകങ്ങള്‍ ലോക്കല്‍ നേതാക്കളില്‍ നിന്നും സംസ്ഥാന നേതാക്കളിലേക്ക് പോകുന്ന ഗുരുതരമായ കാഴ്ചയാണ് കഴിഞ്ഞ ദിവസം കാണാനായത്. ആലപ്പുഴ ജില്ലയില്‍ രാഷ്ട്രീയപ്പകയില്‍ തകര്‍ന്നത് രണ്ടു കുടുംബങ്ങളാണ്. ശനിയാഴ്ച രാത്രി 8 മണിക്കാണ് മണ്ണഞ്ചേരി പൊന്നാടിനു സമീപം എസ്ഡിപിഐ സംസ്ഥാന സെക്രട്ടറി കെ.എസ്.ഷാന്‍ (38) വെട്ടേറ്റു മരിച്ചത്. ഞായറാഴ്ച രാവിലെ ആറരയോടെ ആലപ്പുഴ വെള്ളക്കിണറില്‍ ബിജെപി ഒബിസി മോര്‍ച്ച സംസ്ഥാന സെക്രട്ടറി രണ്‍ജീത് ശ്രീനിവാസ് (45) വീട്ടില്‍ അമ്മയുടെയും ഭാര്യയുടെയും മുന്നില്‍ വെട്ടേറ്റു മരിച്ചു.

രണ്ടു സംഭവങ്ങളും തമ്മില്‍ ബന്ധമുണ്ടോ എന്നു പൊലീസ് അന്വേഷിക്കുന്നുണ്ട്. മണ്ണഞ്ചേരിയില്‍ പൊലീസും ദ്രുതകര്‍മ സേനയും ചേര്‍ന്ന് റൂട്ട് മാര്‍ച്ച് നടത്തി. എഡിജിപി വിജയ് സാഖറെയുടെ നേതൃത്വത്തിലുള്ള പ്രത്യേകസംഘം അന്വേഷണം ഏറ്റെടുത്തു.

രാഷ്ട്രീയപ്പകയില്‍ നിരപരാധികളുടെ ജീവനെടുത്ത രണ്ട് അരുംകൊലകളില്‍ കേരളം നടുങ്ങിനില്‍ക്കെ തുടര്‍ ആക്രമണങ്ങള്‍ ഉണ്ടാവാതിരിക്കാന്‍ അതീവ ജാഗ്രതയിലാണ് പൊലീസ്. സമാധാനം നിലനിറുത്താന്‍ ഇന്ന് ആലപ്പുഴയില്‍ സര്‍വകക്ഷിയോഗം ചേരും.

മണിക്കൂറുകള്‍ക്കിടെ ആലപ്പുഴയില്‍ നടന്ന ഇരട്ടക്കൊലപാതകത്തില്‍ ജീവന്‍ നഷ്ടമായത് എസ്.ഡി.പി.ഐ സംസ്ഥാന സെക്രട്ടറിക്കും ബി.ജെ.പിയുടെ ഒ.ബി.സി മോര്‍ച്ച സംസ്ഥാന സെക്രട്ടറിക്കുമാണ്. ശനിയാഴ്ച രാത്രി ഏഴരയ്ക്ക് മണ്ണഞ്ചേരി സ്‌കൂള്‍ കവലയ്ക്ക് കിഴക്ക് കുപ്പേഴം ജംഗ്ഷന് സമീപം റോഡില്‍ വച്ചുണ്ടായ ആക്രമണത്തിലാണ് എസ്.ഡി.പി.ഐ സംസ്ഥാന സെക്രട്ടറി പൊന്നാട് അല്‍ഷാ ഹൗസില്‍ അഡ്വ. കെ.എസ്.ഷാന്‍ കൊല്ലപ്പെട്ടത്. പിന്നാലെ, ഞായറാഴ്ച രാവിലെ ഏഴു മണിയോടെ ബി.ജെ.പി ഒ.ബി.സി മോര്‍ച്ച സംസ്ഥാന സെക്രട്ടറി ആലപ്പുഴ വെള്ളക്കിണര്‍ കുന്നുംപറമ്പ് അഡ്വ. രണ്‍ജിത്ത് ശ്രീനിവാസനെ വീട്ടില്‍ കയറി വെട്ടിക്കൊല്ലുകയായിരുന്നു.

2016 ലെ നിയമസഭ തിരഞ്ഞെടുപ്പില്‍ അമ്പലപ്പുഴ നിയോജക മണ്ഡലത്തിലും 2019ലെ പാര്‍ലമെന്റ് തിരഞ്ഞെടുപ്പില്‍ ആലപ്പുഴയിലും എസ്.ഡി.പി.ഐ സ്ഥാനാര്‍ത്ഥിയായിരുന്നു ഷാന്‍. 2016ല്‍ ആലപ്പുഴ നിയമസഭാ മണ്ഡലത്തില്‍ ബി.ജെ.പി സ്ഥാനാര്‍ത്ഥിയായിരുന്നു രണ്‍ജിത്ത്. ആദ്യ ആക്രമണത്തിന് പിന്നില്‍ ആര്‍.എസ്.എസും, രണ്ടാമത്തെ സംഭവത്തില്‍ എസ്.ഡി.പി.ഐയുമാണെന്ന പരസ്പരം ആരോപണം ഉയര്‍ന്നു.

രണ്ടു സംഭവങ്ങളിലുമായി 52 പേരെ പൊലീസ് കസ്റ്റഡിയിലെടുത്തു. ഇവരെ വിശദമായി ചോദ്യം ചെയ്യുകയാണെന്നും ആരെയും അറസ്റ്റ് ചെയ്തിട്ടില്ലെന്നും ജില്ലാ പൊലീസ് മേധാവി ജി. ജയദേവ് അറിയിച്ചു. കസ്റ്റഡിയിലുള്ളവരില്‍ ഷാനെ കൊലപ്പെടുത്താന്‍ വാടക വാഹനം തരപ്പെടുത്തി നല്‍കിയ മണ്ണഞ്ചേരി സ്വദേശി പ്രസാദ്, വെണ്‍മണി സ്വദേശി കൊച്ചുകുട്ടന്‍ എന്നിവരും ഉള്‍പ്പെടും. അക്രമികള്‍ എത്തിയ കാറും കസ്റ്റഡിയിലെടുത്തു.

രണ്‍ജിത്തിനെ ആക്രമിക്കാനെത്തിയവര്‍ക്ക് അകമ്പടി പോയതെന്ന് കരുതുന്ന ആംബുലന്‍സും കസ്റ്റഡിയിലെടുത്തിട്ടുണ്ട്.കഴിഞ്ഞ ഫെബ്രുവരിയില്‍ എസ്.ഡി.പി.ഐ പ്രവര്‍ത്തകരുടെ ആക്രമണത്തില്‍ ചേര്‍ത്തല വയലാറില്‍ ആര്‍.എസ്.എസ് ഗഡനായക് നന്ദു കൃഷ്ണ (22) കൊല്ലപ്പെട്ടിരുന്നു. ഈ കേസിലെ തിരിച്ചടിയാണോ ഷാനിന്റെ കൊലപാതകമെന്ന് പൊലീസ് സംശയിക്കുന്നു.

ഇന്നലത്തെ ആക്രമണങ്ങള്‍ക്ക് പിന്നാലെ, നന്ദു വധക്കേസിലെ ഒന്നും രണ്ടും നാലും പ്രതികളായവരുടെ വയലാറിലെ വീടുകളും അക്രമിക്കപ്പെട്ടു. സംസ്ഥാനത്താകെ പോലീസ് ജാഗ്രത പുലര്‍ത്തുകയാണ്. സംഘര്‍ഷത്തിന് എത്രയും വേഗം അയവ് വരുത്താനുള്ള ശ്രമത്തിലാണ്.