പോത്തന്‍കോട് സുധീഷ് കൊലക്കേസില്‍ മുഖ്യപ്രതി ഒട്ടകം രാജേഷ് പോലീസ് സേനയെ വട്ടം ചുറ്റിച്ചു. വര്‍ക്കലയില്‍ രാജേഷിനെ തപ്പിപ്പോയ പോലീസില്‍ ഒരാളെ നഷ്ടപ്പെടുകയും ചെയ്തു. വെള്ളത്തില്‍ വീണ് ഒരു പോലീസുകാരന്‍ മരിച്ചതോടെ പോലീസ് സേനയ്ക്ക് നാണക്കേടുമായി. അവസാനം ഒട്ടകം രാജേഷ് പിടിയിലായി.

കേസിലെ രണ്ടാം പ്രതിയാണ് ഒട്ടകം രാജേഷ്. തമിഴ്‌നാട്ടില്‍ നിന്നുമാണ് രാജേഷിനെ പിടികൂടിയത്. കേസിലെ ഒന്നാം പ്രതി സുധീഷ് ഉണ്ണി, മൂന്നാം പ്രതി മിഠായി ശ്യാം എന്നിവര്‍ കഴിഞ്ഞ ദിവസം പിടിയിലായിരുന്നു. പിടിയിലായ മിഠായി ശ്യാം കൊല്ലപ്പെട്ട സുധീഷിന്റെ ഭാര്യ സഹോദരനാണ്.

കൊലയ്ക്ക് ഉപയോഗിച്ച വാളും വെട്ടുകത്തികളും വെഞ്ഞാറമൂട് മൂളയം പാലത്തിനു സമീപത്തെ പറമ്പില്‍നിന്നു കണ്ടെത്തിയിരുന്നു. പ്രതികളെ ഇവിടെ എത്തിച്ചാണ് പോത്തന്‍കോട് പോലീസ് തെളിവെടുത്തത്.

ആറ്റിങ്ങല്‍ മങ്കാട്ടുമൂലയില്‍ നടന്ന രണ്ട് അക്രമ സംഭവങ്ങളുടെ തുടര്‍ച്ചയാണ് കല്ലൂരിലെ കൊലപാതകം. ഡിസംബര്‍ 11ന് ഉച്ചയ്ക്ക് 2.45ന് ബൈക്കുകളിലും ഓട്ടോയിലുമായി 11 അംഗ സംഘമാണ് സുധീഷിനെ കൊലപ്പെടുത്തിയത്. മംഗലപുരം, ആറ്റിങ്ങല്‍ സ്‌റ്റേഷനുകളില്‍ വധശ്രമം അടിപിടി കേസുകളില്‍ പ്രതിയാണ് മരിച്ച സുധീഷ്. ആറ്റിങ്ങള്‍ മങ്ങാട്ടുമൂലയില്‍ ഡിസംബര്‍ ആറിന് സുധീഷിന്റെ സംഘം വീട് ആക്രമിച്ചു രണ്ട് പേരെ വെട്ടിപ്പരിക്കേല്‍പ്പിച്ചിരുന്നു. പ്രത്യാക്രമണം തുടരുമെന്നു മനസിലാക്കിയ സുധീഷ് കല്ലൂര്‍ പാണന്‍ വിളയിലെ അമ്മയുടെ കുടുംബ വീട്ടില്‍ ഒളിവിലായിരുന്നു. സുധീഷിനെ ചൂണ്ടിക്കാണിച്ച് കൊടുത്തത് ഭാര്യാ സഹോദരനായ മിഠായി ശ്യാമാണ്.

പോത്തന്‍കോട് സുധീഷ് വധക്കേസില്‍ മുഖ്യ പ്രതിയായ ഒട്ടകം രാജേഷിനെ തിരഞ്ഞ് പോയ പോലീസ് സംഘം സഞ്ചരിച്ച വള്ളം മുങ്ങി കഴിഞ്ഞ ദിവസമാണ് പോലീസുകാരന്‍ മരിച്ചത്. അഞ്ചുതെങ്ങ് പണയില്‍ക്കടവിലായിരുന്നു സംഭവം. ആലപ്പുഴ സ്വദേശിയും എസ്.എ.പി. ക്യാമ്പിലെ പോലീസുകാരനുമായ ബാലുവാണ് മരിച്ചത്. വര്‍ക്കല സി.ഐ.യും മൂന്ന് പോലീസുകാരുമാണ് അപകടത്തില്‍പ്പെട്ടത്.

പോത്തന്‍കോട് കൊലക്കേസിലെ പ്രധാനപ്രതി ഒട്ടകം രാജേഷ് പോലീസുകാരെ വല്ലാതെ വട്ടം ചുറ്റിച്ചിരുന്നു. ഒട്ടകം രാജേഷ് അഞ്ചുതെങ്ങ് മേഖലയിലെ ഒരു തുരുത്തില്‍ ഒളിവില്‍ കഴിയുന്നതായി വിവരമുണ്ടായിരുന്നു. ഇതേത്തുടര്‍ന്നാണ് ഒരു സി.ഐ.യും മൂന്ന് പോലീസുകാരും അടങ്ങുന്ന സംഘം വള്ളത്തില്‍ തുരുത്തിലേക്ക് നീങ്ങിയത്. ഇവര്‍ യാത്രചെയ്തിരുന്ന വള്ളം കായലില്‍ മുങ്ങിപ്പോവുകയായിരുന്നു.

സി.ഐ.യെയും രണ്ട് പോലീസുകാരയെും ആദ്യം രക്ഷപ്പെടുത്തി കരയ്‌ക്കെത്തിച്ചിരുന്നു. ഇതിനിടെ എസ്.എ.പി. ക്യാമ്പിലെ പോലീസുകാരനായ ബാലുവിനെ കാണാതായത് ആശങ്കയ്ക്കിടയാക്കി. തുടര്‍ന്ന് നാട്ടുകാരും പോലീസും നടത്തിയ തിരച്ചിലിലാണ് ബാലുവിനെ അവശനിലയില്‍ കണ്ടെത്തിയത്. ഇദ്ദേഹത്തെ പിന്നീട് ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.

പോത്തന്‍കോട് സുധീഷ് കൊലക്കേസില്‍ പ്രതികളായ പത്ത് പേരെയും കഴിഞ്ഞ ദിവസങ്ങളില്‍ പോലീസ് പിടികൂടിയിരുന്നു. കേസിലെ രണ്ടാംപ്രതിയായ ഒട്ടകം രാജേഷ് മാത്രമായിരുന്നു പിടികിട്ടാനുള്ളത്. രാജേഷിനായി പെരുമാതുറ, അഞ്ചുതെങ്ങ്, വക്കം മേഖലകളില്‍ പോലീസ് വ്യാപകമായ അന്വേഷണം നടത്തിവരികയായിരുന്നു. ഇതിനിടയ്ക്കാണ് തമിഴ്‌നാട്ടില്‍ രാജേഷ് ഉണ്ടെന്ന് മനസിലായത്. ആ വഴിയ്ക്കും പോലീസ് അന്വേഷണം നടത്തി. അതോടെയാണ് രാജേഷ് പിടിയിലായത്.


അതേസമയം ഒരു പോലീസുകാരന്റെ ജീവനെടുത്ത സംഭവത്തില്‍ അന്വേഷണം നടക്കുന്നുണ്ട്. ആര് തെറ്റിദ്ധരിപ്പിച്ചിട്ടാണ് നീന്തലറിയാത്ത പോലീസുകാരനേയും കൊണ്ട് വള്ളത്തില്‍ പ്രതിയെ പിടിക്കാന്‍ വര്‍ക്കലയില്‍ പോയതെന്ന് വലിയ ആക്ഷേപമുണ്ട്. ഒട്ടകം രാജേഷിനെ പിടികിട്ടിയതോടെ എല്ലാം വള്ളിപുള്ളി തെളിയും.