പിങ്ക് പൊലീസ് വിദ്യാര്ത്ഥിനിയെ അപമാനിച്ചെന്ന വിവാദം... നഷ്ടപരിഹാരം നല്കാനാവില്ലെന്ന സര്ക്കാര് നിലപാടിനെതിരെ ഹൈക്കോടതി
പിങ്ക് പൊലീസ് ഉദ്യോഗസ്ഥ അപമാനിച്ച എട്ടു വയസുകാരിക്കു നഷ്ടപരിഹാരം നല്കാനാവില്ലെന്ന സര്ക്കാര് നിലപാട് അംഗീകരിക്കാനാവില്ലെന്ന് ഹൈക്കോടതി. സര്ക്കാര് തീരുമാനം ആശ്ചര്യപ്പെടുത്തുന്നതാണെന്നും ജസ്റ്റിസ് ദേവന് രാമചന്ദ്രന് വാക്കാല് അഭിപ്രായപ്പെട്ടു.
പൊലീസ് ഉദ്യോഗസ്ഥ പെണ്കുട്ടിയെ അപമാനിച്ചിട്ടില്ലെന്നും സാക്ഷികളുടെ വെളിപ്പെടുത്തലിന്റെ അടിസ്ഥാനത്തിലാണ് പെണ്കുട്ടിയും പിതാവും ആവശ്യങ്ങള് ഉന്നയിക്കുന്നതെന്നും സര്ക്കാര് സത്യവാങ്മൂലത്തില് പറഞ്ഞു.
ഉദ്യോഗസ്ഥയുടെ ഭാഗത്തുനിന്ന് ബോധപൂര്വം മോശമായ പെരുമാറ്റമുണ്ടായിട്ടില്ല. മൊബൈല് ഫോണ് മോഷ്ടിക്കപ്പെട്ടുവെന്ന തെറ്റിദ്ധാരണയാണ് സംഭവങ്ങള്ക്കു കാരണമായത്. പെണ്കുട്ടി മാനസികാഘാതത്തില്നിന്നു മുക്തയായതായി ക്ലിനിക്കല് സൈക്കോളജിസ്റ്റിന്റെ റിപ്പോര്ട്ടുണ്ട്. കോടതി ഇതു കണക്കിലെടുക്കണമെന്നും സര്ക്കാര് ബോധിപ്പിച്ചു.
പെണ്കുട്ടിയുടെ മൗലികാവകാശം ലംഘിക്കപ്പെട്ടതായി കണ്ടെത്തിയിട്ടില്ല. പൊലീസിന്റെ ഭാഗത്ത് നിയമലംഘനം ഉണ്ടായിട്ടില്ല. നഷ്ടപരിഹാരം നല്കുന്നത് പൊലീസിനെ ബാധിക്കും. ജനം നിയമം കയ്യിലെടുക്കും. അനാവശ്യ പരാതികള് ഉയരും. പൊലീസ് ഉദ്യോഗസ്ഥക്കെതിതെ നടപടി എടുത്തിട്ടുണ്ടെന്നും സര്ക്കാര് അറിയിച്ചു. കുട്ടി കരഞ്ഞത് എന്തിനാണെന്നു വ്യക്തമാക്കണമെന്ന് ആവശ്യപ്പെട്ട കോടതി സംഭവത്തിന്റെ വിഡിയോ ഹാജരാക്കാന് നിര്ദേശിച്ചു. സര്ക്കാര് നഷ്ടപരിഹാരം നല്കണമെന്ന പെണ്കുട്ടിയുടെ ഹര്ജിയാണ് കോടതിയുടെ പരിഗണനയിലുള്ളത്. കേസ് ബുധനാഴ്ച വീണ്ടും പരിഗിക്കും. പെണ്കുട്ടിക്കു നഷ്ടപരിഹാരം നല്കണമെന്നും എത്ര നല്കാനാവുമെന്ന് അറിയിക്കണമെന്നും ഹൈക്കോടതി പൊലീസിനോട് നിര്ദേശിച്ചിരുന്നു.
ഇതേത്തുടര്ന്നാണ് സര്ക്കാര് നിലപാട് അറിയിച്ചത്.കുട്ടിക്കു മാനസിക പിന്തുണ നല്കാമെന്നാണ് കഴിഞ്ഞതവണ കേസ് പരിഗണിച്ചപ്പോള് സര്ക്കാര് പറഞ്ഞത്. എന്നാല് അതു മാത്രമാണോ കുട്ടിക്ക് ആവശ്യമെന്നും ചോദിച്ച കോടതി, നീതി കിട്ടിയെന്ന് കുട്ടിക്കു തോന്നണമെന്നു പറഞ്ഞിരുന്നു.
കേസ് വെള്ളപൂശാനാണ് പൊലീസ് ശ്രമിക്കുന്നത്. പൊലീസ് ഉദ്യോഗസ്ഥയെ സ്ഥലം മാറ്റിയതുകൊണ്ട് പരിഹാരമാവവുമോയെന്നും കോടതി ചോദിച്ചിരുന്നു. പൊലീസ് ഉദ്യോഗസ്ഥ ഭീഷണിപ്പെടുത്തിയ ശേഷം കുട്ടി കരഞ്ഞില്ലെന്ന് ഡിജിപിയുടെ റിപ്പോര്ട്ടില് പറയുന്നത് ആരെ സംരക്ഷിക്കാനാണെന്നും ചോദിച്ച കോടതി, വിഡിയോ ദൃശ്യങ്ങളില് കാര്യങ്ങള് വ്യക്തമാണെന്നു പറഞ്ഞിരുന്നു. ജനം കൂടിയപ്പോഴാണ് കുട്ടി കരഞ്ഞതെന്ന് ഡിജിപി പറയുന്നത് തെറ്റാണ്. സര്ക്കാര് പ്ലീഡര് വസ്തുതകള് വളച്ചൊടിക്കാന് ശ്രമിക്കുകയാണെന്നും കോടതി പറഞ്ഞു.
https://www.facebook.com/Malayalivartha
