കുറച്ചു നാളായിട്ട് കണ്ടുകൊണ്ടിരിക്കുകയാണ് വിവാഹമോചനത്തെ ചുറ്റിപ്പറ്റിയുള്ള ചർച്ചകൾ. ഈ അടുത്തായിട്ട് ഉള്ള പരാതിയാണ് സ്ത്രീകൾക്ക് വിദ്യാഭ്യാസവും സ്വന്തം കാലിൽ നിൽക്കാനുള്ള കഴിവും കൂടുന്നതുകൊണ്ട് വിവാഹമോചനങ്ങൾ വർധിക്കുന്നത്രേ.. നല്ലതല്ലേ? സ്വന്തമായി വരുമാനവും ലോക പരിചയവും ഉണ്ടായപ്പൊ ഇയാൾ ഒരു ദിവസം എന്നെ ഇട്ടിട്ട് പോയിക്കഴിഞ്ഞാൽ ഞാൻ ഈ ഒരു കുഞ്ഞിനെയുമായി എന്ത് ചെയ്യും എന്ന് ആലോചിക്കേണ്ട ബാദ്ധ്യത പെണ്ണിനു കുറഞ്ഞു.. എന്ന് കുറിക്കുകയാണ് ഡോ. നെൽസൺ ജോസഫ്.

നെൽസൺ ജോസഫ് കുറിക്കുന്നു;

കുറച്ചു നാളായിട്ട് കണ്ടുകൊണ്ടിരിക്കുകയാണ് വിവാഹമോചനത്തെ ചുറ്റിപ്പറ്റിയുള്ള ചർച്ചകൾ.
" നമ്മുടെ സമൂഹത്തിൽ വിവാഹമോചനങ്ങൾ കൂടി വരുന്നുണ്ടോ? "
" വർധിച്ചുവരുന്ന വിവാഹമോചനങ്ങൾക്ക് കാരണമെന്താണ്? "
" വിവാഹപ്രായം ഉയർത്തുന്നത് വിവാഹമോചനം കുറയ്ക്കുമോ? "
" വിവാഹമോചനം സമൂഹത്തെ ദോഷകരമായി ബാധിക്കുന്നുണ്ടോ "
ശ്യേ....ഇങ്ങനെ പേടിക്കാതെടേയ്..

ഡിവോഴ്സിൻ്റെ എണ്ണം കൂടുന്നോ എന്നൊക്കെ കണക്കുകൾ നോക്കി തീരുമാനിക്കേണ്ടതാണ്.. അതവിടെ നിൽക്കട്ട്. ഈ അടുത്തായിട്ട് ഉള്ള പരാതിയാണ് സ്ത്രീകൾക്ക് വിദ്യാഭ്യാസവും സ്വന്തം കാലിൽ നിൽക്കാനുള്ള കഴിവും കൂടുന്നതുകൊണ്ട് വിവാഹമോചനങ്ങൾ വർധിക്കുന്നത്രേ.. നല്ലതല്ലേ? സ്വന്തമായി വരുമാനവും ലോക പരിചയവും ഉണ്ടായപ്പൊ ഇയാൾ ഒരു ദിവസം എന്നെ ഇട്ടിട്ട് പോയിക്കഴിഞ്ഞാൽ ഞാൻ ഈ ഒരു കുഞ്ഞിനെയുമായി എന്ത് ചെയ്യും എന്ന് ആലോചിക്കേണ്ട ബാദ്ധ്യത പെണ്ണിനു കുറഞ്ഞു..

ഞാൻ ആർക്കെങ്കിലും ഭാരമായാലോ എന്ന ചിന്ത ഇല്ലാതെയായി. പെണ്ണാണ് എല്ലാം സഹിക്കേണ്ടത് എന്ന മിഥ്യാ ധാരണ പോയി. ഭൂമിയോളം താഴണം എന്ന് പറഞ്ഞാൽ " എന്തിന് " എന്ന് തിരിച്ച് ചോദിക്കാമെന്നായി. ചുരുക്കിപ്പറഞ്ഞാൽ " എനിക്ക് ഒരു വ്യക്തി എന്ന നിലയിൽ ബഹുമാനം തരാത്ത ഒരാളുടെ കൂടെ ഞാൻ ജീവിതകാലം മുഴുവൻ എന്തിനു സഹിച്ച് കഴിയണം? " എന്ന് ചോദിക്കാനുള്ള ധൈര്യമായി.. കുറെയധികം വീടുകളിൽ എരിഞ്ഞടങ്ങിക്കൊണ്ടിരുന്ന, അല്ലെങ്കിൽ അങ്ങനെ ആവേണ്ടിയിരുന്ന പെണ്ണുങ്ങൾ " പോടാ പുല്ലേ " എന്ന് പറഞ്ഞിട്ട് ഇറങ്ങിപ്പോയി.. ആണേൽ കണക്കായിപ്പോയി.. ഇനിയിപ്പൊ അങ്ങനെയല്ലെന്ന് തന്നെ വയ്ക്കുക.

രണ്ട് വ്യക്തികൾ ഒന്നിച്ച് ജീവിക്കാൻ ശ്രമിച്ച് നോക്കുന്നു. എല്ലാവരും എല്ലാത്തിലും വിജയിക്കാത്തതുപോലെ ചിലപ്പൊ ആ ശ്രമവും വിജയിച്ചില്ലെന്ന് വരും... സ്വഭാവികമാണ് അത്. അപ്പൊ രണ്ട് പേരും തമ്മിൽ ആലോചിച്ച് രണ്ട് പേരും അവരവരുടെ വഴിക്ക് നീങ്ങാനുള്ള ആരോഗ്യകരമായ തീരുമാനം എടുക്കുന്നതിന് ആർക്കാണിത്ര വിഷമം?... ജീവിതകാലം മുഴുവൻ വീർപ്പുമുട്ടി ഒരു കൂരയ്ക്ക് കീഴെ കഴിയുന്നതിനെക്കാൾ സമാധാനമുണ്ടാവും. ഇനി എത്ര ബുദ്ധിമുട്ടാണെങ്കിലും എങ്ങനെയും സഹിച്ച് ജീവിക്കാൻ പ്രേരിപ്പിക്കുന്നവരുമുണ്ടാവും. യെന്തിന്?

" നാട്ടുകാർ എന്ത് വിചാരിക്കും? "
" അവര് ഇനി എന്നെക്കുറിച്ച് എന്ത് പറയും? "

ഒന്ന് പോ കൂവാ.... നാട്ടുകാരാണോ നിങ്ങക്ക് ചിലവിന് തരുന്നത്? ആണെങ്കിൽപ്പോലും നിങ്ങളുടെ ജീവിതം മൈക്രോമാനേജ് ചെയ്യാനും മാർക്കിടാനുമുള്ള അവകാശമൊന്നും ഒരു നാട്ടുകാരനുമില്ല. ഒരിക്കൽ വിവാഹിതരായാൽ പിന്നെ ജീവിതം മുഴുവൻ അവിടെ... അത് എന്ത് പ്രശ്നങ്ങളുണ്ടായാലും, ഏത് രീതിയിൽ അടിച്ചമർത്തപ്പെട്ടാലും സഹിക്കണം. ഭാര്യയും ഭർത്താവും തമ്മിൽ അടിമയും ഉടമയും തമ്മിലുള്ള ബന്ധമല്ല.. ചിന്താശേഷി കൂടുന്നതും സ്വയം പര്യാപ്തത കൂടുന്നതും കുടുംബങ്ങൾ തകർക്കുന്നു എന്നൊരു വാദം കണ്ടു. ചുമ്മാതാണ്.

പുറത്ത് എത്രയൊക്കെ വൈറ്റ് വാഷ് അടിച്ചാലും ഉള്ള് വിണ്ടു കീറി അസ്ഥിവാരം വരെ ദ്രവിച്ച് നിൽക്കുന്നിടത്തുനിന്ന് കുറെപ്പേർ ഇറങ്ങിപ്പോരാൻ തുടങ്ങിയെന്ന് മാത്രം. വിദ്യാഭ്യാസമുണ്ടെങ്കിലും കുടുംബം അവിടെയൊക്കെത്തന്നെ ഉണ്ടാവും. ഒരു വ്യക്തിക്ക് ലഭിക്കേണ്ട ബഹുമാനം, പരസ്പര ബഹുമാനത്തോടെ പെരുമാറിയാൽ..

എല്ലാവരും...ഭാര്യയും ഭർത്താവും...രണ്ട് വീട്ടുകാരും...എല്ലാവരും.. വിവാഹമോചനത്തിനെയും വിവാഹമോചിതരെയും തിരഞ്ഞുപിടിച്ച് മാർക്കിടുന്നതിനും ആകുലപ്പെടുന്നതിനും മുമ്പ് അതൊന്ന് ആലോചിക്ക്..