രഞ്ജി ട്രോഫിയില്‍ കേരളത്തിന് തകര്‍പ്പന്‍ തുടക്കം. മേഘാലയയെ ഇന്നിങ്‌സിനും 166 റണ്‍സിനുമാണ് പരാജയപ്പെടുത്തിയത്. നാല് വിക്കറ്റ് വീഴ്ത്തിയ ബേസിലിന്റേയും മൂന്ന് വിക്കറ്റെടുത്ത ജലജ് സക്‌സേനയുടേയും ബൗളിങ്ങ് മികവില്‍ മേഘാലയ രണ്ടാം ഇന്നിങ്‌സില്‍ 191 റണ്‍സിന് പുറത്താവുകയായിരുന്നു.

ജയത്തോടെ ഏഴ് പോയിന്റ കേരളം സ്വന്തമാക്കി. ഒന്നാം ഇന്നിങ്സില്‍ കേരളം ഒന്‍പതു വിക്കറ്റ് നഷ്ടത്തില്‍ 505 റണ്‍സെടുത്ത് ഡിക്ലയര്‍ ചെയ്യുകയായിരുന്നു. സ്കോര്‍: മേഘാലയ - 148 & 191, കേരളം - 505/9 ഡിക്ലേയര്‍ഡ്. കേരളത്തിന്റെ അടുത്ത മത്സരം ഫെബ്രുവരി 24 മുതല്‍ 27 വരെ ഗുജറാത്തിനെതിരെയാണ്. 357 റണ്‍സ് ലീഡ് വഴങ്ങി രണ്ടാം ഇന്നിങ്‌സിന് ഇറങ്ങിയ മേഘാലയയുടെ തുടക്കം തന്നെ പാളിച്ചയോടെയായിരുന്നു. ഏകദിന ശൈലിയില്‍ തകര്‍ത്തടിച്ച്‌ 70 പന്തില്‍ 75 റണ്‍സ് നേടിയ ചിരാഗ് ഖുറാനയാണ് മേഘാലയയുടെ ടോപ് സ്കോറര്‍.

ആദ്യ ഇന്നിങ്‌സില്‍ നാല് വിക്കറ്റെടുത്തിരുന്ന അരങ്ങേറ്റക്കാരന്‍ ഏദന്‍ രണ്ടിന്നിങ്‌സിലുമായി ആറു വിക്കറ്റ് വീഴ്ത്തി. എട്ടു വിക്കറ്റ് നഷ്ടത്തില്‍ 454 റണ്‍സ് എന്ന നിലയില്‍ മൂന്നാം ദിനം ബാറ്റിങ് തുടങ്ങിയ കേരളത്തിനായി വത്സല്‍ ഗോവിന്ദ് സെഞ്ചുറി പൂര്‍ത്തിയാക്കി. 193 പന്തില്‍ എട്ടു ഫോറും ഒരു സിക്‌സും സഹിതം വത്സല്‍ 106 റണ്‍സ് നേടി. വെറ്ററന്‍ താരം എസ്. ശ്രീശാന്തിന്റെ പിന്തുണയിലാണ് വത്സല്‍ മൂന്നക്കത്തിലെത്തിയത്. 43 പന്ത് നേരിട്ട് പ്രതിരോധിച്ചു കളിച്ച ശ്രീശാന്ത് 19 റണ്‍സെടുത്തു.

നേരത്തെ, ഓപ്പണര്‍മാരായ രോഹന്‍ എസ്. കുന്നുമ്മല്‍ (107), പി. രാഹുല്‍ (147) എന്നിവര്‍ സെഞ്ച്വറി നേടിയിരുന്നു. 140.4 ഓവറില്‍ 505 റണ്‍സെടുത്താണ് കേരളം ഇന്നിങ്സ് അവസാനിപ്പിച്ചത്. ഓപ്പണര്‍ പി. രാഹുലാണ് കേരളത്തിന്റെ ടോപ് സ്കോറര്‍. 239 പന്തില്‍ 17 ഫോറും ഒരു സിക്സും സഹിതമായിരുന്നു രാഹുലിന്റെ ഇന്നിങ്സ്.