ദിലീപിനെ സംബന്ധിച്ചടുത്തോളം ഏറെ നിര്‍ണായകമായ ദിവസങ്ങളാണ് കടന്ന് പോകുന്നത്. കേസ് ശക്തമാക്കുന്നതിന്റെ ഭാഗമായി അന്വേഷണ സംഘം യോഗം ചേര്‍ന്നു. മാത്രമല്ല സായി ശങ്കറില്‍ നിന്നും കൂടുതല്‍ തെളിവുകള്‍ ശേഖരിക്കുകയും ചെയ്തു. ഇതിന് പിന്നാലെ നടിയെ തട്ടിക്കൊണ്ടുപോയി പീഡിപ്പിച്ചെന്ന കേസിലെ സാക്ഷികളെ സ്വാധീനിക്കാനും തെളിവുകള്‍ നശിപ്പിക്കാനും ശ്രമിച്ചതായി ആരോപിച്ച് എട്ടാം പ്രതി നടന്‍ ദിലീപിന്റെ ജാമ്യം റദ്ദാക്കാന്‍ സമര്‍പ്പിച്ച ഹര്‍ജി വിചാരണക്കോടതി 26നു വീണ്ടും പരിഗണിക്കും.

ഇത് ദിലീപിന് കുരുക്കാകുമെന്നാമ് കരുതുന്നത്. കോടതി നിര്‍ദേശിച്ചിരുന്ന വ്യവസ്ഥകള്‍ ദിലീപ് ലംഘിച്ചതായി ചൂണ്ടിക്കാട്ടിയാണു ജാമ്യം റദ്ദാക്കാന്‍ പ്രോസിക്യൂഷന്‍ അപേക്ഷ സമര്‍പ്പിച്ചത്. തുടരന്വേഷണത്തില്‍ അന്വേഷണ സംഘത്തിനു ലഭിച്ച സാക്ഷിമൊഴികളുടെയും ഡിജിറ്റല്‍ തെളിവുകളുടെയും അടിസ്ഥാനത്തിലാണു വിചാരണയും സാക്ഷിവിസ്താരവും അട്ടിമറിക്കാന്‍ പ്രതിഭാഗം അഭിഭാഷകരുടെ ഒത്താശയോടെ ദിലീപ് ശ്രമിച്ചതായി ആരോപണം ഉയര്‍ന്നത്.

ദിലീപിന്റെ ഫോണാണ് നിര്‍ണായകമാകുന്നത്. രഹസ്യസ്വഭാവമുള്ള വിചാരണ രേഖകള്‍ ദിലീപിന്റെ ഫോണില്‍ കണ്ടെത്തിയതു സംബന്ധിച്ചു പ്രതിഭാഗത്തോടു വിശദീകരണം തേടണമെന്ന പ്രോസിക്യൂഷന്റെ അപേക്ഷയും വിചാരണ ക്കോടതിയുടെ പരിഗണനയിലുണ്ട്. ഇത്തരം രേഖകള്‍ ചോര്‍ന്നതു സംബന്ധിച്ചു കോടതി ജീവനക്കാരുടെ മൊഴിയെടുക്കാനായി അന്വേഷണ സംഘം സമര്‍പ്പിച്ച അപേക്ഷയും 26നു പരിഗണിക്കും. മേയ് 31നു തുടരന്വേഷണ റിപ്പോര്‍ട്ട് സമര്‍പ്പിക്കാന്‍ വിചാരണക്കോടതി നിര്‍ദേശം നല്‍കി.

അന്വേഷണം ശക്തമാക്കാന്‍ ക്രൈംബ്രാഞ്ച് നിര്‍#ണായക നീക്കം തുടങ്ങി. നടിയെ തട്ടിക്കൊണ്ടുപോയി പീഡിപ്പിച്ച കേസിലെ തുടരന്വേഷണം പൂര്‍ത്തിയാക്കാന്‍ ഹൈക്കോടതി മേയ് 30 വരെ സമയം അനുവദിച്ച സാഹചര്യത്തില്‍ അന്വേഷണ പുരോഗതി വിലയിരുത്താന്‍ ക്രൈംബ്രാഞ്ച് എഡിജിപി എസ്. ശ്രീജിത്തിന്റെ നേതൃത്വത്തില്‍ അന്വേഷണ ഉദ്യോഗസ്ഥര്‍ യോഗം ചേര്‍ന്നു. തുടരന്വേഷണം നടത്തുന്ന ഡിവൈഎസ്പി ബൈജു എം. പൗലോസിന്റെ ടീമും അന്വേഷണ ഉദ്യോഗസ്ഥരെ വകവരുത്താന്‍ ഗൂഢാലോചന നടത്തിയെന്ന കേസ് അന്വേഷിക്കുന്ന എസ്പി മോഹനചന്ദ്രന്റെ ടീമും യോഗത്തില്‍ പങ്കെടുത്തു.

പരമാവധി തെളിവുകള്‍ ശേഖരിക്കാനാണ് അന്വേഷണ സംഘം ശ്രമിക്കുന്നത്. കേസില്‍ തെളിവു നശിപ്പിക്കാന്‍ കൂട്ടുനിന്ന സൈബര്‍ വിദഗ്ധന്‍ സായ് ശങ്കറിനെ ഇന്നലെ വീണ്ടും ചോദ്യം ചെയ്തു. സായ് ശങ്കര്‍ പ്രതികളുടെ ഫോണില്‍ നിന്നു മായ്ച്ചു കളഞ്ഞ മുഴുവന്‍ ഡിജിറ്റല്‍ ഫയലുകളും വീണ്ടെടുക്കാനുള്ള ശ്രമത്തിലാണ് അന്വേഷണ സംഘം. കേസില്‍ കൂടുതലായി ചോദ്യം ചെയ്യേണ്ടവരുടെ പുതിയ പട്ടികയും അന്വേഷണ സംഘം തയാറാക്കി.

എട്ടാം പ്രതി ദിലീപിന്റെ ഭാര്യ കാവ്യാ മാധവനെ ചോദ്യം ചെയ്യുന്നതു സംബന്ധിച്ച വിശദമായ ചര്‍ച്ച അന്വേഷണ സംഘം നടത്തി. ഇതിന്റെ വിശദാംശങ്ങള്‍ പുറത്തുവിട്ടിട്ടില്ല. നടിയെ പീഡിപ്പിച്ച കേസില്‍ മാധ്യമങ്ങള്‍ക്കു വിവരങ്ങള്‍ ചോര്‍ത്തി നല്‍കിയ പൊലീസ് ഉദ്യോഗസ്ഥര്‍ക്കെതിരെ നിയമപരമായ നടപടി സ്വീകരിക്കണമെന്നാവശ്യപ്പെട്ട് ഹൈക്കോടതി അഭിഭാഷകന്‍ നല്‍കിയ കത്ത് 24നു ചേരുന്ന ബാര്‍ കൗണ്‍സില്‍ യോഗം പരിഗണിക്കും.

അഭിഭാഷകനും കക്ഷികളും തമ്മിലുള്ള സംഭാഷണത്തിന് ഇന്ത്യന്‍ തെളിവു നിയമപ്രകാരം സംരക്ഷണമുള്ളതാണെന്നും അഭിഭാഷകനും കക്ഷിയും തമ്മിലുള്ള സംഭാഷണത്തില്‍ അന്വേഷണം നടത്തരുതെന്നു പൊലീസ് ഉദ്യോഗസ്ഥര്‍ക്കു നിര്‍ദേശം നല്‍കണമെന്നും അഡ്വ. വി. സേതുനാഥ് നല്‍കിയ കത്തില്‍ പറഞ്ഞിരുന്നു. എന്നാല്‍ അതിജീവിതയായ നടി നല്‍കിയ പരാതിയില്‍ ദിലീപിന്റെ അഭിഭാഷകരുടെ മറുപടി തേടിയിരുന്നെങ്കിലും ഇതുവരെ ലഭിച്ചില്ലെന്നു ബാര്‍ കൗണ്‍സില്‍ പ്രസിഡന്റ് കെ.എന്‍. അനില്‍കുമാര്‍ പറഞ്ഞു.