റീസര്വേയില് അധികഭൂമി കണ്ടെത്തിയാൽ പതിച്ചുനൽകാനുള്ള ഓര്ഡിനന്സ് ഉടന്, ഫീസ് ഈടാക്കാനും സര്ക്കാര് ആലോചന, നിരക്ക് റവന്യൂവകുപ്പ് തീരുമാനിക്കും
റീസര്വേയില് അധികഭൂമി കണ്ടെത്തിയാൽ തിരിച്ചുനല്കാന് ഇപ്പോള് വ്യവസ്ഥയില്ലെങ്കിലും ഇതിനായി ഉടൻ ഓര്ഡിനന്സ് കൊണ്ടുവരും.ഭൂമിയുടെ വിസ്തീര്ണം കൂടുതലെന്ന് കണ്ടെത്തിയാല് അത് ഉടമസ്ഥര്ക്ക് പതിച്ചുകിട്ടാനുള്ള നിയമം തയ്യാറാക്കാന് ലാന്ഡ് റവന്യൂ കമ്മിഷണറെ ചുമതലപ്പെടുത്തി.
അധികഭൂമിക്ക് ഉടമസ്ഥാവകാശം നല്കാറില്ല. നികുതി അടയ്ക്കാനേ അനുവദിക്കാറുള്ളൂ. ഇത് നിയമനടപടികളിലേക്ക് നീങ്ങാറാണ് പതിവ്. ഭൂമി കൈമാറുമ്പോഴും അധികഭൂമിക്ക് വിലകിട്ടാറില്ല. അവസ്ഥയ്ക്ക് പരിഹാരം കണ്ടെത്താനാണ് നിയമം. ബുധനാഴ്ച റവന്യൂ സെക്രട്ടേറിയറ്റ് യോഗത്തില് കരട് ചര്ച്ചചെയ്യും.
അധികഭൂമി ഉടമസ്ഥന് പതിച്ചുനല്കാന് ചെറിയ ഫീസ് ഈടാക്കാനും സര്ക്കാര് ഉദ്ദേശിക്കുന്നുണ്ട്. ഫീസ് വിപണിവിലയ്ക്കോ ന്യായവിലയ്ക്കോ ആനുപാതികമാക്കരുതെന്ന അഭിപ്രായം സര്ക്കാരിനുണ്ട്. എത്ര ഈടാക്കണമെന്ന കാര്യത്തിൽ റവന്യൂവകുപ്പ് തീരുമാനമെടുക്കും.
റീസര്വേയില് അളവുവ്യത്യാസം കണ്ടെത്തിയ ഒന്നരലക്ഷത്തോളം കേസുകള് സംസ്ഥാനത്ത് ഇപ്പോഴുണ്ട്. തുടങ്ങാനിരിക്കുന്ന ഡിജിറ്റല് സര്വേ പൂര്ത്തിയാവുമ്പോള് കേസുകളുടെ എണ്ണം ഇനിയും ഉയരാനുള്ള സാധ്യത ഏറെയായിരുന്നു. നിയമം പ്രാബല്യത്തില് വരുന്നതോടെ ഡിജിറ്റല് റീസര്വേയിലുണ്ടാകുന്ന വ്യത്യാസവും എളുപ്പത്തില് ക്രമീകരിക്കാനാവും.
https://www.facebook.com/Malayalivartha
