ഹരിദാസന് കൊലക്കേസ്... നിജില് ദാസ് ഒളിവില് കഴിയുമ്പോള് ഉപയോഗിച്ചത് രേഷ്മയുടെ മകളുടെ പേരിലുള്ള സിം കാര്ഡ്
ഹരിദാസന് കൊലക്കേസിലെ പ്രതിയായ ആര്എസ്എസ് നേതാവ് നിജില് ദാസിന് അധ്യാപിക രേഷ്മ കൂടുതല് സഹായങ്ങള് ചെയ്തതിന്റെ തെളിവുകള് പോലിസിന് ലഭിച്ചു. പിണറായി പാണ്ട്യാലമുക്കിലെ വീട് ഒളിക്കാന് നല്കിയതിന് പുറമെ സ്വന്തം മകളുടെ മൊബൈല് സിം കാര്ഡും രേഷ്മ നിജില്ദാസിന് നല്കിയതായാണ് വിവരം.
പ്ലസ് വണ് വിദ്യാര്ഥിനിയായ മകളുടെ പേരിലുള്ള സിം കാര്ഡാണ് രേഷ്മ നിജില് ദാസിന് നല്കിയിരുന്നതെന്ന് അന്വേഷണ സംഘം കണ്ടെത്തി. രേഷ്മയുടെ വീട്ടില് ഒളിവില് കഴിയുമ്പോള് ഈ സിം കാര്ഡാണ് നിജില് ഉപയോഗിച്ചത്. ഈ സിം ഉപയോഗിച്ച് നിജില് നിരവധി തവണ ഭാര്യയെ വിളിച്ചിരുന്നെന്നും കണ്ടെത്തിയിട്ടുണ്ട്. നിജിലും രേഷ്മയും ഉപയോഗിച്ച മൊബൈല് ഫോണുകളും പോലിസ് കസ്റ്റഡിയില് എടുത്തിട്ടുണ്ട്.
ഹരിദാസന് വധക്കേസില് 14, 15 പ്രതികളാണ് നിജിലും രേഷ്മയും.വധക്കേസ് പ്രതിയാണെന്ന് അറിഞ്ഞുകൊണ്ടാണ് നിജില് ദാസിന് രേഷ്മ ഒളിത്താവളം ഒരുക്കിയതെന്നാണ് പോലിസിന്റെ റിമാന്ഡ് റിപോര്ട്ടില് പറയുന്നത്. തലശേരി ജുഡീഷ്യല് മജിസ്ട്രേറ്റ് കോടതിയില് നിന്നും ജാമ്യം ലഭിച്ച രേഷ്മ ഇപ്പോള് അണ്ടല്ലൂരിലെ വീട്ടിലാണുള്ളത്.
സിപിഎം പ്രവര്ത്തകന്റെ കൊലപാതകത്തിലെ മുഖ്യ പ്രതിയെ ഒളിവില് കഴിയാന് പലവിധ സൗകര്യങ്ങളൊരുക്കിയിട്ടും ദുര്ബല വകുപ്പുകളാണ് രേഷ്മക്കെതിരേ പോലിസ് ചുമത്തിയത്.ബിജെപിയുടെ സ്ഥിരം അഭിഭാഷകനായ പി പ്രേമരാജനാണ് രേഷ്മയ്ക്ക് വേണ്ടി കോടതിയില് ഹാജാരായത്. ബിജെപിയുടെ മണ്ഡലം ജനറല് സെക്രട്ടറി അജേഷാണ് ജാമ്യത്തില് ഇറങ്ങിയ രേഷ്മയെ ജയിലില് നിന്ന് സ്വീകരിക്കാന് എത്തിയത്.
ഹരിദാസന് വധക്കേസിലെ പ്രതിക്ക് വാടക വീട് നല്കിയതില് അറസ്റ്റിലായ രേഷ്മയെ, ജോലി ചെയ്തിരുന്ന അമൃത വിദ്യാലയത്തില് നിന്നു സസ്പെന്ഡ് ചെയ്തിരുന്നു. സസ്പെന്ഷന് പിന്നാലെ രേഷ്മ ജോലി രാജി വെച്ചതായാണ് വിവരം. സ്കൂളിന്റെ പേരിനെ ബാധിക്കാതിരിക്കാനുള്ള സ്വാഭാവിക നടപടിയാണിതെന്നും കേസിന്റെ പശ്ചാത്തലത്തിലാണ് നടപടി സ്വീകരിക്കുന്നതെന്നുമാണ് സ്കൂള് അധികൃതര് വ്യക്തമാക്കിയത്.
അതിന് പിന്നാലെയാണ് തലശേരി അമൃത വിദ്യാലയത്തിലെ ജോലി രാജിവെച്ചെന്ന് രേഷ്മ അറിയിച്ചത്. ഏറെ നാളായി ഇവിടെ അദ്ധ്യാപികയായി പ്രവര്ത്തിച്ചുവരുകയായിരുന്നു രേഷ്മ. ഇവിടെ ഇംഗ്ലീഷ് ഇന്സ്ട്രക്ടറായാണ് രേഷ്മ ജോലി ചെയ്തിരുന്നത്.
വെള്ളിയാഴ്ച പുലര്ച്ചെയാണ് പുന്നോല് ഹരിദാസ് വധക്കേസിലെ പ്രതി നിജില് ദാസിനെയും വീട്ടുടമസ്ഥനായ പ്രശാന്തിന്റെ ഭാര്യ രേഷ്മയെയും അറസ്റ്റ് ചെയ്തത്. മുഖ്യമന്ത്രി പിണറായി വിജയന്റെ വീട്ടില്നിന്ന് ഏതാനും മീറ്റര് മാത്രം അകലെയാണ് നിജില്ദാസ് ഒളിവില് കഴിഞ്ഞിരുന്ന വീട്.
https://www.facebook.com/Malayalivartha
