ചര്‍ച്ച വഴിമുട്ടിയതോടെ കെ.എസ്.ആര്‍.ടി.സി. വീണ്ടുമൊരു സമരത്തിലേക്ക്.... ശമ്പളകാര്യത്തില്‍ ഉറപ്പില്ല.... സര്‍ക്കാരുമായി ആലോചിക്കാതെ ഉറപ്പുനല്‍കാന്‍ കഴിയില്ലെന്ന് മന്ത്രി ആന്റണി രാജു, ശമ്പളമില്ലെങ്കില്‍ ജോലിചെയ്യില്ലെന്ന നിലപാടില്‍ സ്ഥാപനത്തിലെ ഭരണ-പ്രതിപക്ഷ യൂണിയനുകള്‍.

സമരത്തില്‍നിന്ന് പിന്തിരിപ്പിക്കാന്‍ അംഗീകൃത സംഘടനാനേതാക്കളെ ചൊവ്വാഴ്ച മന്ത്രി ആന്റണി രാജു വെവ്വേറെയാണ് ചര്‍ച്ചയ്ക്കു വിളിച്ചത്. സി.ഐ.ടി.യു., ബി.എം.എസ്., ഐ.ടി.എന്‍.ടി.യു.സി. യൂണിയനുകള്‍ ശമ്പളക്കാര്യത്തില്‍ വിട്ടുവീഴ്ചയ്ക്ക് തയ്യാറായില്ല.

കെ.എസ്.ആര്‍.ടി.സിയില്‍ അഞ്ചാം തീയതിക്കുള്ളില്‍ ശമ്പളം നല്‍കുന്ന കാര്യത്തില്‍ അംഗീകൃത തൊഴിലാളി സംഘനടകളുടെ യോഗത്തിലും മന്ത്രി ആന്റണി രാജു ഉറപ്പു നല്‍കിയില്ല. ഗതാഗതവകുപ്പിന് മാത്രമായി ഇക്കാര്യത്തില്‍ ഒന്നും ചെയ്യാനാവില്ലെന്നും ധനവകുപ്പുമായി സംസാരിക്കാമെന്നുമായിരുന്നു സംഘടനകളുമായി വെവ്വേറെ നടത്തിയ ചര്‍ച്ചയില്‍ മന്ത്രി പറഞ്ഞത്.

് മന്ത്രിയോട് പ്രധാനമായും മൂന്നു സംഘടനകളും ശമ്പളക്കാര്യത്തിലെ ഉറപ്പാണ് ആവശ്യപ്പെട്ടത ്. ഇക്കാര്യത്തില്‍ ഉറപ്പുകളൊന്നും ലഭിക്കാത്തതിനാല്‍ പണിമുടക്കുമായി മുന്നോട്ടുപോകാനാണ് ടി.ഡി.എഫിന്റെയും ബി.എം.എസിന്റെയും തീരുമാനം.





ഏപ്രിലിലെ ശമ്പളം മേയ് അഞ്ചിന് ലഭിച്ചില്ലെങ്കില്‍ ആറിന് പണിമുടക്കാന്‍ ഇരു സംഘടനകളും നോട്ടീസ് നല്‍കി കഴിഞ്ഞു. പണിമുടക്കിന്റെ കാര്യം കൂടിയാലോചിച്ച് തീരുമാനിക്കുമെന്നും ശമ്പളം സമയബന്ധിതമായി ലഭിക്കുമെന്നാണ് പ്രതീക്ഷയെന്നും സി.ഐ.ടി.യു ഭാരവാഹികള്‍.


ഇന്ധനച്ചെലവാണ് പ്രധാനമായും പ്രതിസന്ധിക്ക് കാരണമായി ആന്റണി രാജു ചൂണ്ടിക്കാട്ടിയത്. ലോണ്‍ തിരിച്ചടവുകൂടി കഴിഞ്ഞാല്‍ പിന്നെ കളക്ഷനില്‍ കാര്യമായിട്ടൊന്നും ബാക്കിയുണ്ടാകില്ലെന്നും മന്ത്രി പറയുന്നു. മോണിറ്ററിംഗ് കമ്മിറ്റിഷെഡ്യുളുകള്‍ പുനക്രമീകരിക്കുന്നതില്‍ യൂണിയനുകളുടെ ആവശ്യം മന്ത്രി പരിഗണിച്ചു. ഇത് പ്രകാരം ഓര്‍ഡിനറി ബസ്സുകള്‍ക്ക് ജില്ല തലത്തിലും ഫാസ്റ്റ് പാസഞ്ചറുകള്‍ക്കും സൂപ്പര്‍ ക്ലാസ് സര്‍വീസുകള്‍ക്കും സോണല്‍ തലത്തലും മോണിറ്ററിംഗ് കമ്മിറ്റികള്‍ രൂപീകരിക്കും. ഇതില്‍ യൂണിയന്‍ പ്രതിനിധികളെയും ഉള്‍പ്പെടുത്തും.


അതേസമയം കൊവിഡിന് ശേഷം കെ.എസ്.ആര്‍.ടി.സി ബസുകളില്‍ യാത്രക്കാരുടെ എണ്ണം കുറവാണെന്നും ഈ സാഹചര്യത്തില്‍ തൊഴിലാളി യൂണിയനുകള്‍ പണിമുടക്കിലേക്ക് പോയി സ്ഥാപനത്തെ പ്രതിരോധത്തിലാക്കരുതെന്നും അദ്ദേഹം പറഞ്ഞു.